Read KapsikiDC Cimə 19 Bible Online

Cimə 19 - KapsikiDC bible

Cimə 19

¹Se va wəndə nya te ghəa cimə. Ciməa David.

²Zləvəa Shala yancɛ ŋkwa nya pelɛ ghweme, slene nyi menete ŋkɛ yageze pɛtɛa yɛ saseregwa.

³Gheŋkɛ yageze nda veci ke veci nya kezele, gheŋkɛ yancɛ nda yayata viɗi ke viɗi nya kedzeyite.

⁴Geze ghena tahe ŋkɛ we, sla ghena ŋkɛ we, ŋwələ shɛ kafate mbeli we.

⁵Ama ndɛkwe hɛɗi lema va ghena ta nci nahe ghena shɛ kentsehe hwa'a te mendɛkwe ta hɛɗi lema. Pelɛagha ne, nahe Shala kemɓete nda cɛ lekwesa ke veci.

⁶Kasame ŋkɛ masheke kala za makwa nya keshave mbe cɛa ŋkɛ, kala nde dzeghe wampelɛa wampelɛa nya kezlama yitea hwɛ.

⁷Kasame ŋkɛ kwa zeweve ta ghweme, kapəkwə ŋkɛ kwa kwete zeweve ta ghweme, wəsə shɛ tewəfərə va ghyana ta ŋkɛ we.

⁸Tiɗiɗi wəsə mahalegəa Mahwətə, gheŋkɛ nde ve ŋkwa teghweme. Kaganda ghena nyi gezete Mahwətə, kave nda ntsehwele hɛ ke ka dewə ntsehwele.

⁹Tiɗiɗi wəshi nyi gezete Mahwətə, kave nda zlama hɛ ke wənə. Wɛŋe ghena nyi gezete Mahwətə, kawaŋe nda ŋkwa hɛ ke ntsə.

¹⁰Wəsə nya wɛŋe hawe va Mahwətə, kaghala ghala nza ŋkɛ. Kaganda ghena nyi tarete Mahwətə, nahe hɛ kenza tiɗiɗi pɛtɛ.

¹¹Zləvə ma te hɛ ke mze kwa tere tere, ke mze kwa tere tere nya wɛŋe kwele kwele. Zeɗe ma hɛ ke yɛməa mze, ke kwacaregesla ta yɛməa mze.

¹²Nahe ghena ta ŋa kendeke ɗa waŋe ke nde mene slene ta ŋa, zhɛme nya wəba ya va wəndə nya keyate hɛ.

¹³Wa nde nza kaɗepe fete nyi menete ŋkɛ wa? Kelemte ɗa fete nyi ɗepema 'ya te wənə.

¹⁴Yakɛ ɗa va mbeli nyi keŋkele ntsə, sleke ɗa ma hɛ ma. Tsagha ne, tiɗiɗi tenza 'ya, kaɗema jaɗafa nya wəba te 'ya.

¹⁵Nza ghena nyi kesame kwa mɛa ɗa ba'a zəzə nya kwa wənəa ɗa zeɗehwe ŋa, gha Mahwətə nya kakeleɓa ta ɗa ba'a nya kande ya ɗa.