Read KapsikiDC Cimə 22 Bible Online

Cimə 22 - KapsikiDC bible

Cimə 22

¹Se va wəndə nya te ghəa cimə. Kagha kala ŋwələa «Le nya te kiɗi ta ŋkwa.» Ciməa David.

²Shala ta ɗa, Shala ta ɗa, va wa sərəakɛ ɗa na wa? Katsa lewela 'ya, ama cakeɗake mbele ta ɗa.

³Shala ta ɗa, katsa ŋa lewela 'ya heveci ne, ama kazhɛne na we. Ma heviɗi ne, kakemave zhɛne mpi 'ya we.

⁴Ndagwara deke gha ya kaShala nya kaganda, mentishɛ na pelɛ pasla ta ŋa, gha nya tsahe ka Israyɛl.

⁵Nahe ka shihɛ n'yɛ kendeke ŋa ghəa nci, nahe na kembelete hɛ va nya ndeke ŋa ghəa nci hɛ.

⁶Nahe hɛ ketsave ŋa lewela, tagha gɛ, pa na mbelete hɛ. Nahe hɛ kendeke ŋa ghəa nci, tagha gɛ, kese na kapəli nda hawe ke hɛ we.

⁷Ama 'ya ne, zhandɛreɗɛa 'ya, kenza 'ya kawəndə ŋelɛ we, pɛtɛ mbeli kaŋele ɗa ba'a kaɗema kaɓela ɗa.

⁸Pɛtɛ mbeli nyi kenewe ɗa kaŋ'wəshi ɗa, kanɛlɛme ghɛni hɛ ba'a kakeɗeŋe ghə hɛ.

⁹Ma ke hɛ te ghəa ɗa: «Nahe ŋkɛ kendeke nda ghəa ŋkɛ ke Mahwətə. Yawa, ma nda kaɗe ŋkɛ ŋkɛ ne, mbelete ŋkɛ ba'a mbeɗeke ŋkɛ ŋkɛ gɛ!»

¹⁰Kaganda ne, nahe na kekelakawa ɗa sawa kwa hwəa meyɛ ɗa, nahe na keveyi ɗa gwezlayɛ te ŋ'wa ta nta.

¹¹Sawama ta ɗa kwa hwə ne, nahe 'ya kendeke ŋa ghəa ɗa, yakema geva ta ɗa ne, gha ya kaShala ta ɗa.

¹²Nzama na cakeɗake yitea 'ya ma, takwa takwa ndiremi yitea 'ya, wəndə kekemane ɗa shɛ we.

¹³Kadzasle ɗa mcɛmcɛli kwele kwele, kantəslə ɗa wəshi keseɗa nyi mbe Bashan.

¹⁴Kaghwene mɛ hɛ yitea 'ya kala nivɛrə nyi keslekwe wəsə ba'a nyi keghwəghwə.

¹⁵Kakiɗi berete ta ɗa kala yɛmə nya keshifə. Kakwekweraɗenji pɛtɛa 'yɛ'yɛa ɗa. Yipə yipə wənəa ɗa le ɗəkə, kaslɛwa geva wəshi nyi kwa hwəa ɗa.

¹⁶Keghwele ghwele berete ta ɗa kala kələ, ndeɓe nza ghɛnia ɗa yitea meghena. Nahe na keveyi ɗa mɛa kwele.

¹⁷Kadzasle ɗa wəvəsəa ka mefətekwə, kala kelɛa keti nzanji hɛ dzeyi yitea 'ya. Nahe hɛ kempahwemte yɛ dzeve ba'a yɛ seɗa ta ɗa.

¹⁸Kwele kwele pahe ɗa 'ya, wərə 'ya kaɓelate 'yɛ'yɛa ɗa. Mteghere bete ntsə ka jaga ta ɗa te 'ya.

¹⁹Kanehe yɛ lekwesa ta ɗa hɛ kwelɛ ghəa nci, kage karalamea ɗa hɛ le kwasheghediɗi.

²⁰Ama gha gɛ Mahwətə, nzama na cakeɗake ma! Ma gha nya kaberete ta ɗa gɛ ne, se kahe kahe kakemane ɗa!

²¹Mbelemte ɗa va kafayɛ, yakɛ mpia ɗa va pela ta kelɛa keti.

²²Mbelemte ɗa shave mbe mɛa nivɛrə ba'a va tereme ta sla gamba. Yawa, nahe na kezhɛnete ɗa!

²³Kategeze nda sləa ŋa 'ya ke ka kesaka meyɛ ɗa ba'a katetsahe ŋa 'ya hwa tsene ta mbeli:

²⁴Gheyɛ mbeli nyi kehawe va Mahwətə, tsahe mə ŋkɛ. Gheyɛ pɛtɛa hwelefefia Zhakob, ve mə zləvə te. Gheyɛ pɛtɛa ŋwalea Israyɛl, ghazlənə mə ve.

²⁵Kwa nza ŋkɛ ne, kese ŋkɛ kaɓelama ba'a kanegha nde titikwə nya kesa yaka we. Kese ŋkɛ kazhɛre nda wəmbə we. Ama nahe ŋkɛ kefate lewela ta ŋkɛ.

²⁶Va gha se tsahe ta ɗa hwa tsene nya wəba. Kateyipə meɗe mɛa ɗa 'ya kwa kema ta ka hawe va gha.

²⁷Katezeme wəshi kezeme ka titikwəa kɛfi behe behe. Katetsahe Mahwətə mbeli nyi kesepa ŋkɛ. Hɛyi hɛ Shala teghweme.

²⁸Katezəzə Mahwətə mbeli nyi te hɛɗi lema ba'a katezhɛne geva hɛ kase shɛ. Kategwəɗəŋə pɛtɛa hwelefefi kwa kema ta ŋkɛ.

²⁹Kwa nza ŋkɛ ne, Mahwətə ya kameghe, gheŋkɛ nde sleke hwelefefi.

³⁰Pɛtɛa mbeli nyi berete berete te hɛɗi lema kezehwe wəshi kezeme: ntiŋə ghə mbe hɛɗi va hɛ tsetsenya. Kagwəɗəŋə mbeli nyi ketempə, mbeli nyi keɗema kayate mpia nci kwa kema ta ŋkɛ.

³¹Katemene nda slene hwelefefia nci ke Mahwətə. Kategeze nda ghena ta ŋkɛ mbeli ke hwelefefia shɛhɛ.

³²Katezlape nza tiɗiɗia ŋkɛ mbeli, kategeze nda wəsə nya menete ŋkɛ mbeli ke hwelefe nya keteya!