Read KapsikiDC Cimə 25 Bible Online

Cimə 25 - KapsikiDC bible

Cimə 25

¹Ciməa David. Mahwətə, 'ya kazhɛre ŋa geva.

²Shala ta ɗa, te gha ve ghə 'ya, pəli ɗa ma hawe na ma. Sərəma ka jaga ta ɗa na kagha geza kənəa 'ya ma.

³Katenza hawe te mbeli nyi keve ghə te gha we. Ama hawe nde tenza te mbeli nyi kepahwe ŋa, pala pala tenza dzeve ta nci.

⁴Mahwətə, ncɛte ɗa hweŋkwa ta ŋa, tekete ɗa dzeghwa kala nya ɗe na.

⁵Beghe ɗa kwa hweŋkwa ta kaganda ta ŋa, teke ɗa ghena, kwa nza ŋkɛ gha ya kaShala nya kembele ɗa. Kave ghə 'ya te gha keveci keveci.

⁶Mahwətə, zəzəte ɗe ta ŋa ba'a ganyɛa ŋa nyi ncɛte na ghala veci!

⁷Zəzəma jaɗafa ta ɗa nyi se kawəzege, ya fete nyi menete 'ya na ma. Ama zəzəte ɗa tewəmbəreke ɗe ta ŋa, tewəmbəreke ganyɛa ŋa Mahwətə yawe.

⁸Kaganda ne, ganyɛke ba'a tiɗiɗi Mahwətə, kancɛ nda hweŋkwa ŋkɛ ke ka jaɗafa.

⁹Kabeghe ka titikwəa kɛfi ŋkɛ kwa hweŋkwa nya tiɗiɗi, kateke nda wəsə nya ɗe ŋkɛ ke hɛ.

¹⁰Pɛtɛa ghena ta Mahwətə kaɗe ba'a kakaganda kaŋa ka hawe va ghena ta jikə geva ta ŋkɛ.

¹¹Mahwətə yawe, kezha ncɛ zləvəa ŋa ne, kelemte ɗa fete ta ɗa nya wəba nya te wənə.

¹²Ma kenza wəndə kahawe va Mahwətə ne, kancɛ nda hweŋkwa nya kele ŋkɛ ŋkɛ.

¹³Katenza wəndəa shɛ mbe zeɗe nza, katenza hɛɗi kaŋa hwelefe ta ŋkɛ.

¹⁴Kanza Mahwətə le mbeli nyi kehawe ve, kancɛ nda jikə geva ta ŋkɛ ŋkɛ ke hɛ.

¹⁵Te Mahwətə nza ntsə ta ɗa keveci keveci, kwa nza ŋkɛ gheŋkɛ nde kele ɗa shave mbe keleŋa.

¹⁶Zhɛreke ɗa geva ba'a zhɛakɛ heli yitea 'ya, kwa nza ŋkɛ kwetɛŋe ɗa 'ya ba'a titikwə ya te 'ya.

¹⁷Tsekwe tseɗekwe wənəa ɗa. Mbelete ɗa va yirə ta mehele ta ɗa.

¹⁸Newema titikwə ba'a yaka nyi te 'ya, kelemte pɛtɛa jaɗafa ta ɗa te wənə.

¹⁹Newema ka jaga ta ɗa nyi kwele kwele, zlɛa nci ba'a mene berete ta nci laka 'ya.

²⁰Yate mpia ɗa ba'a mbelete ɗa. Gha ya kaŋkwa kewəfərə ta ɗa, pəli ɗa ma hawe na ma.

²¹Yakɛ ɗa kaganda ba'a nza tiɗiɗi, kwa nza ŋkɛ te gha ve ghə 'ya.

²²Shala yawe, mbeɗeke Israyɛl gi! Mbelemte ŋkɛ va pɛtɛa yaka nyi te gi!