Read KapsikiDC Cimə 27 Bible Online

Cimə 27 - KapsikiDC bible

Cimə 27

¹Ciməa David. Mahwətə ya kawaŋe ta ɗa ba'a kambele ta ɗa, va wa teghazlənə 'ya tse wa? Mahwətə ya kande ya mpia ɗa, va wa tebare bare 'ya tse wa?

²Ma kehendeke ɗa geva ka 'yaghwa mehele kezha pesle ɗa ne, katsa hɛ tehene ba'a kabete hɛ te hɛɗi, ghenci nyi kaka jaga ta ɗa ba'a kaka ɗema ntsə ta ɗa.

³Ma kehave ɗa mpa wəvəsəa ka sewajɛ ne, kateghazlənə 'ya tɛape we. Ya mbeli have ɗa mpa ne, katenza 'ya gwezlayɛ.

⁴Wəsə kwetɛŋe yasəkwə 'ya va Mahwətə, kwele kwele ɗehwe wəsəa shɛ 'ya: nza mbe ghɛa Mahwətə kala nza ta hɛa ɗa teghweme, kezha newe ganyɛa Mahwətə ba'a kezha mare ghɛa ŋkɛ.

⁵Kwa nza ŋkɛ katewəfərə ɗa ŋkɛ mbe ghwəlia ŋkɛ te vecia ndiremi, katewəfərə ɗa ŋkɛ talɛ wəmbala ta ghɛa ŋkɛ, kateve ɗa ŋkɛ gwezlayɛ kwa ghəa ghweme.

⁶Tsetsenya ne, le kema yitea ghweme tenewe ka ghema nyi kedzasle ɗa 'ya. Mbe ghɛa ŋkɛ ne, katedzeghe nda melɛ zlama 'ya ba'a kategha nda cimə 'ya ke Mahwətə.

⁷Mahwətə yawe, fate ɗa ŋa ɗa, 'ya kasəkwə, zhɛakɛ heli yitea 'ya ba'a zhɛnete ɗa gi!

⁸Ma kwa gezete na: Zele ɗa mə, a pa ne, ma 'ya zhɛnete: 'Ya kazele ŋa Mahwətə yawe,

⁹Wəfərəma kema ta ŋa na va 'ya ma, ŋkama mava ta ŋa na le wənə le wənə, gha nya kekemanakɛ ɗa ma. Sləma na yitea 'ya ma, wəfəyite ɗa ma na, gha nya kaShala nya kembele ɗa ma.

¹⁰Ma kewəfəyite ɗa yiteyɛ ɗa ba'a meyɛ ɗa ne, katekemaneve ɗa Mahwətə.

¹¹Mahwətə yawe, ncɛte ɗa hweŋkwa ta ŋa, beghe ɗa kwa hweŋkwa nya ganyɛ va mbeli nyi keceha ɗa.

¹²Ve ɗa ma na mbe dzeve ta ka ghema ta ɗa ma. Kwa nza ŋkɛ ne, fete yave ɗa ka negha fete tseŋwə ba'a berete yamene hɛ te 'ya.

¹³Nahe 'ya keɗepe katenewe wəshi ganjia Mahwətə 'ya te hɛɗi nya nza nya mbeli.

¹⁴Ndeke nda ghə ke Mahwətə. Hwepete ghə ba'a ntsə geva. Ndeke nda ghə ke Mahwətə.