Read KapsikiDC Cimə 31 Bible Online

Cimə 31 - KapsikiDC bible

Cimə 31

¹Se va wəndə nya te ghəa cimə. Ciməa David.

²Mahwətə yawe, gha ya kaŋkwa kewəfərə ta ɗa, pəli ɗa ma hawe na tɛape ma! Mbelemte ɗa laka nza ta ŋa tiɗiɗi.

³Zhɛrete sleme ta ŋa laka 'ya gi, mbelemte ɗa kahe kahe gi! Nza kakeleɓa nya berete kaŋa ɗa, kacɛ nya berete nya kembele ɗa.

⁴Kaganda ne, gha ya kakeleɓa ta ɗa nya berete, beghe ɗa ba'a ncɛte ɗa hweŋkwa kazləvəa ŋa.

⁵Yakɛ ɗa va dagalawe nya ŋate ɗa mbeli, kwa nza ŋkɛ gha ya kaŋkwa kewəfərə ta ɗa.

⁶'Ya kave mpi ɗa mbe dzeve ta ŋa, Mahwətə, nahe na mbeɗeke ɗa, gha nya kaShala nya kaganda.

⁷Kaɗe ntsə ta mbeli nyi kehawe va kweci shala 'ya we. Ma 'ya le ŋa ɗa ne, nahe 'ya kendeke nda ghə ke Mahwətə.

⁸Katetsa gaghwe tewəmbəreke ganyɛa ŋa, kwa nza ŋkɛ nahe na kenakɛ yaka ta ɗa ba'a keɗepete titikwə nya sa 'ya.

⁹Kevame ɗa na mbe dzeve ta nde jaga we, nahe na kekesakate ɗa te ŋkwa, nahe na kepeleyi ɗa waɗe.

¹⁰Mahwətə yawe, zhɛakɛ heli yitea 'ya, kwa nza ŋkɛ yaka ya te 'ya. Keghare ghare ntsə te 'ya va nehwene, kedene dene geva ta ɗa pɛtɛ.

¹¹Kiɗi yakiɗi mpia ɗa va yaka, tsagha yɛ va ta ɗa va ŋələvə. Dene yadene 'ya va yɛ jaɗafa ta ɗa, kefehwe fehwe yɛ 'yɛ'yɛa ɗa.

¹²Pɛtɛ ka jaga ta ɗa kaŋele ɗa, halama ka ghedəkwəa ɗa. Kaghazlənə mbeli nyi keɗepe ɗa va 'ya. Ma kenakɛ ɗa hɛ kwa hweŋkwa ne, kahwɛnji hɛ.

¹³Kala wəndə nya kemtenyɛ zaghəyite ɗa mbeli, yipə yipə nza ta ɗa le wəmbete nya kepesle pesle.

¹⁴Nahe 'ya kefate tseŋwə nyi sla ɗa mbeli, ghazlənə nde se kazhɛ ɗa te yayata ŋkwa. Pɛtɛ hɛ kejikəte mɛ yitea 'ya, ghena yatsa hɛ kezha za mpia ɗa.

¹⁵Ama 'ya ne, nahe 'ya kevate ghə te gha, gha Mahwətə. Ma 'ya gezete: «Gha ya kaShala ta ɗa.»

¹⁶Mbe dzeve ta ŋa yɛ hɛa ɗa, mbelemte ɗa va ka jaga nyi keghweze mɛ hwa 'ya.

¹⁷Ɓelaghe kema ta ŋa kənəa 'ya, 'ya nya kamava ta ŋa, mbelete ɗa laka ganyɛa ŋa.

¹⁸Mahwətə yawe, pəli ɗa ma hawe na vəa ŋkwa nya səkwə ŋa 'ya ma, ama vate hawe te ka 'yaghwa mehele. Nza hɛ tikə tikə kwa ghɛa mbelia kwahɛɗi!

¹⁹Ŋzlete nda mɛ ke ka tseŋwəa kɛfia shɛhɛ, ghena ŋkele ntsə, ghena fege ba'a ghena keɓelama ŋkwa yageze hɛ te wəndə nya tiɗiɗi.

²⁰Kwele kwele wəshi ganji nyi wəmbəyi nda na ke mbeli nyi kehawe va gha, nyi fə nda na ke mbeli nyi kewəfərə mbe gha kwa kema ta mbeli pɛtɛ.

²¹Kawəfərə hɛ na kwa kema ta ŋa, cakeɗake le ghweze mɛ ta mbeli. Kawəfərə hɛ na va ghena nyi ndiremi ndiremi.

²²Hana ŋa na Mahwətə yitea meŋele nya menete ganyɛa ŋa laka 'ya nya kese kala meleme nya have nda mpa mbeli.

²³Ketaze taze se mehele ta ɗa, ma 'ya sha se kazəzə: «Nahe na keŋkamte ɗa kwa ntsə ta ŋa.» Ama nahe na kefate səkwə ta ɗa vəa ŋkwa nya tsave ŋa lewela 'ya.

²⁴Ɗe mə Mahwətə, gheyɛ pɛtɛa mbeli nyi dɛŋe dɛŋe te. Kaya mbeli nyi keyɛ ŋkɛ Mahwətə, ama dzawe 'yɛ ka ŋkele ntsə ŋkɛ.

²⁵Nza mə bereteke ba'a hwepe mə ghə, gheyɛ pɛtɛa mbeli nyi keve ghə te Mahwətə!