Read KapsikiDC Cimə 33 Bible Online

Cimə 33 - KapsikiDC bible

Cimə 33

¹Gheyɛ mbeli nyi tiɗiɗi, tsa nda mə gaghwe ke Mahwətə. Megela ŋkɛ kezha tsahe ŋkɛ mbeli nyi nza wənəa nci wɛŋe.

²Tsahe mə Mahwətə le gagera, tsahe mə ŋkɛ le getsepele nya nza zewe meŋe te.

³Gha nda mə cimə mɛnɛfɛ, tsa mə wəshi megela yitea gaghwea ŋayɛ.

⁴Kwa nza ŋkɛ ne, tiɗiɗi ghena ta Mahwətə, kagezleŋe mbeli va wəshi nyi mene ŋkɛ.

⁵Nza tiɗiɗi ba'a kaganda yaɗe ŋkɛ. Rayɛ hɛɗi lema va ɗe ta Mahwətə.

⁶Laka ghena ta ŋkɛ pate ghweme Mahwətə, laka zhɛne mpi ta ŋkɛ pate veci, tere ba'a yɛ saseregwa ŋkɛ.

⁷Katsene yɛmə nyi kwa ndərə ŋkɛ te ŋkwa nya kwetɛŋe. Kave ndərə nyi jama jama ŋkɛ te ŋa nci ŋkwa.

⁸Hawe hɛɗi lema va Mahwətə gɛ! Bare bare mbeli nyi te hɛɗi lema kwa kema ta ŋkɛ!

⁹Kwa nza ŋkɛ ma kegezete ghena ŋkɛ ne, kayipə geva ŋkɛ. Ma kegezete wəsə ŋkɛ ne, kamene geva ŋkɛ.

¹⁰Nahe Mahwətə ketazemte ntsehwele hwelefefi, nahe ŋkɛ kezamte sebe te zəzə ta mbeli.

¹¹Kaghala ghala nza zəzə ta Mahwətə, keshi keshi nza wəshi nyi ɗe ŋkɛ.

¹²Zlama ya va hwelefe nya nza Mahwətə kaShala ta ŋkɛ. Zlama ya va mbeli nyi ntave ŋkɛ kambelia ŋkɛ!

¹³Kanewe ŋkwa Mahwətə sawa pelɛ ghweme, kamare pɛtɛ mbeli ŋkɛ.

¹⁴Sawa pelɛ ŋkwa nya nza ŋkɛ ne, kamare pɛtɛa mbeli nyi te hɛɗi lema ŋkɛ.

¹⁵Gheŋkɛ nde pate wənəa mbeli pɛtɛ, nahe ŋkɛ keɗepe pɛtɛa wəshi nyi mene hɛ.

¹⁶Meghe nya kembelenyɛ shɛ va berete ta ka sewajɛa ŋkɛ, ya katsala sewajɛ va wəba ta berete ta ŋkɛ we.

¹⁷Kaketekɛ ŋkwa gədəwə kezha hərə ta ŋkwa we, kambelete ŋkwa pɛtɛa berete ta ŋkɛ we.

¹⁸Ama kave ntsə Mahwətə te mbeli nyi kehawe ve, te mbeli nyi keve ghə te ɗe ta ŋkɛ.

¹⁹Kambele hɛ ŋkɛ va mte ba'a kaya mpia nci ŋkɛ te vəa ma.

²⁰Ma gheɓəmə ne, Mahwətə yaneghe gheɓəmə, gheŋkɛ ya kande kemane ɓəmə ba'a kande ya ɓəmə.

²¹Ve se zlama ta wənəa ɓəmə, te sləa ŋkɛ nya keveyi geva tekeleke ve ghə gheɓəmə.

²²Mahwətə yawe, nza ɗe ta ŋa kənəa ghen'yɛ kala nya ve ghə ghen'yɛ te gha!