Read KapsikiDC Cimə 35 Bible Online

Cimə 35 - KapsikiDC bible

Cimə 35

¹Ciməa David. Mahwətə yawe, ve nda fete ke mbeli nyi keve ɗa fete, ha nda mpa ke mbeli nyi keha ɗa mpa.

²Fəte yɛ geləa ŋa, nya ɓɛhwɛ ba'a nya wəba, sate te ŋkwa kezha kemane ɗa.

³Kafe megha ba'a tseyɛ yitea ka ghweze mɛ hwa 'ya. Ma pa na sha geze ɗa: «'Ya ya kande mbele ŋa.»

⁴Nza hawe ba'a yirə te mbeli nyi keɗe mte ta ɗa gɛ! Zhɛne geva ka zəzə mene ɗa wəsə kwa ndiremi dzeyi te sebe le hawe le hawe gɛ!

⁵Nza hɛ kala cɛkəvə nya kele sefə vəa ŋkwa nya teŋka hɛ nde ghwene ta Mahwətə.

⁶Nza hweŋkwa ta nci kaŋkwesle ba'a kamazleraɗa vəa ŋkwa nya tekeka hɛ nde ghwene ta Mahwətə.

⁷Gəmə ŋate ɗa keleŋa hɛ kənəa ki, gəmə late ki hɛ yitea 'ya.

⁸Senyɛ ndiremi nya wəba vəkə kadzete hɛ, keseve hɛ keleŋa nya ŋate hɛ, zamte sebe ndiremi nya wəba nya te hɛ!

⁹Tagha gɛ, katezlama 'ya tewəmbəreke Mahwətə, katenza 'ya fare fare va nya mbelete ɗa ŋkɛ.

¹⁰Ma 'ya sha tegeze le wənəa ɗa pɛtɛ: «Mahwətə yawe, wa wəndə nya kala gha wa? Kambele nde dewə ŋeli na va wəndə nya berete ma ke gheŋkɛ, kambele nde dewə ŋeli ba'a nde titikwə na va wəndə nya kemene ghəa ŋkɛ le hɛ.»

¹¹Pepelɛhetɛme ka negha fete tseŋwə sate te ŋkwa, ntake hɛ ka'yɛwe wəsə nya ɗepema 'ya va 'ya.

¹²Ndiremi yamene ɗa hɛ te ŋkwa ganyɛ. Tene 'ya kwetɛŋe ɗa.

¹³Ma vəa ŋkwa nya nza hɛ shewə ne, wəsə yahwepe 'ya hwa hwə. Kashifə ghəa ɗa 'ya laka səwə ma, kevə kevə se 'ya kasəkwə ghə.

¹⁴Kala nya yitea mcɛ keɗema wəza ma se 'ya kamene. Tɛarawe rawe ba'a keyirə yirə se 'ya kala wəsə nya mte meyɛ ɗa.

¹⁵Ma vəa ŋkwa nya teɗe 'ya ne, katsene geva hɛ kezha ŋ'wəshi ɗa. Katsene geva hɛ yitea 'ya kaɗema 'ya keɗepe, kaɗa ɗa hɛ ba'a kaŋkwahe ɗa hɛ tagha tagha.

¹⁶Ma ka ŋ'wəshi ŋkwa nyi wale wale nyi kedzaslete ɗa ne, kanca slene hɛ yitea 'ya.

¹⁷Mahwətə, pa te nyama və tenewe wəsə nya na le ntsə wa? Mbelemte ɗa va ndiremi nya, yakɛ mpia ɗa va nivɛrə nyi!

¹⁸Katetsa ŋa hana 'ya hwa tsene nya wəba, katetsahe ŋa 'ya hwa mbeli nyi tipə tipə.

¹⁹Zlamama mbeli nyi keɗema ɗa gəmə gəmə tewəmbəreke 'ya ma, metɛma ntsə mbeli nyi keɗema ntsə ta ɗa gəmə ma!

²⁰Ghena ta kwelɛŋe shɛ kwa mɛa nci we, ama tseŋwə yazəzə hɛ te mbeli nyi gwezlayɛ te hɛɗi.

²¹Hagarake mɛa nci teghwene yitea 'ya, ma ke hɛ sha geze: «Yawa, nahe ntsə ta n'yɛ kenakɛ ŋkɛ.»

²²Mahwətə, nahe na kenakɛ wəsə nya kemenete geva. Nzama na divə ma, Mahwətə yawe, nzama na cakeɗake yitea 'ya ma.

²³Shala yawe, feɗeghe kezha ve ɗa nza tiɗiɗi, Mahwətə yawe, sate te ŋkwa kezha ya ɗa.

²⁴Mahwətə nya tiɗiɗi, ndeke ɗa nza tiɗiɗi, Shala yawe, zlamama hɛ yitea 'ya ma.

²⁵Gezema hɛ kwelɛ ghəa nci: «Yawa, nya yaɗe gheɓəmə gɛ! Nahe gheɓəmə kendahwe ŋkɛ», ke hɛ ma.

²⁶Nza hawe ba'a yiɗə te hɛ pɛtɛa nci, ghenci nyi kezlama yitea ndiremi nya te 'ya gɛ! Nza hawe ba'a ŋ'wəshi te hɛ, ghenci nyi kenewe ghəa nci za ma ke 'ya gɛ ga!

²⁷Ama mbeli nyi keɗe nza tiɗiɗi ta ɗa ne, tsa gaghwe hɛ gɛ ga! Ma ke sha tegeze tagha taghanyɛ: «Mahwətə ya wəba, kwelɛŋea nde mene slene ta ŋkɛ yaɗe ŋkɛ.»

²⁸Tagha gɛ ne, katezhɛne 'ya kageze nza tiɗiɗia ŋa, katetsahe ŋa 'ya keveci keveci.