Read KapsikiDC Cimə 41 Bible Online

Cimə 41 - KapsikiDC bible

Cimə 41

¹Se va wəndə nya te ghəa cimə. Ciməa David.

²Zlama ya va wəndə nya kezəzə ka dewə ŋeli! Ma te vecia ndiremi ne, kambele ŋkɛ Mahwətə.

³Kasərə ŋkɛ Mahwətə teghweme ba'a kave nda zeɗe nza ŋkɛ te hɛɗi. Kave ŋkɛ mbe dzeve ta ka jaga ta ŋkɛ we.

⁴Kakemane ŋkɛ Mahwətə te gezlea yaka ta ŋkɛ, kanewe ghweme ŋkɛ te vəa ŋkwa nya nza ŋkɛ shewə.

⁵Ma 'ya sha se kageze: «Mahwətə, zhɛ heli yitea 'ya, mbete ɗa, kwa nza ŋkɛ nahe 'ya kemenete ŋa jaɗafa.»

⁶Ma ke ka jaga ta ɗa sha geze ghena kwa ndiremi te 'ya: «Hweŋkwa temte ŋkɛ wa? Hweŋkwa teza sebe te sləa ŋkɛ wa?»

⁷Ma kese kwete wəndəa nci kanewe ɗa ne, kezha beze sləa ɗa. Ghena nyi ndiremi ndiremi yatsene ŋkɛ. Shavema ta ŋkɛ ne, ghena shɛhɛ yadzeghwa ŋkɛ le.

⁸Kaŋwashɛ ŋwashɛ ɗa pɛtɛa ka ɗema ntsə ta ɗa kanya kwetɛŋe, Kazəzə ndiremi nya ketedzete 'ya hɛ. Ma ke:

⁹«Zereghwe nya ndiremi nde dzetenyɛ te, ɓelahema ta ŋkɛ ne, katezhɛne ŋkɛ kasate we.»

¹⁰Ya mcɛ nya vate ghə 'ya te, nya zeme wəsə kezeme 'ya le ne, nahe ŋkɛ kezhɛrenyɛ kande ghema ta ɗa.

¹¹Ama gha gɛ Mahwətə, zhɛ heli yitea 'ya, kesakate ɗa te ŋkwa. Tsagha gɛ, kateve nda wəsə nya kehi va hɛ 'ya ke hɛ.

¹²Wa nya wəsə nya ɗepete ganyɛa ŋa 'ya te nya: kezhɛne nde jaga ta ɗa kaghate geza kənəa 'ya we.

¹³Nahe na kekemanakɛ ɗa, kendeke ɗa lɛŋelɛ, nahe na keveyi ɗa kwa kema ta ŋa kaghala ghala.

¹⁴Tsa nda ɓəmə hana ke Mahwətə, Shala ta Israyɛl, se hecanyɛ ba'a kaghala ghala! Amɛn, Amɛn!