Read KapsikiDC Cimə 44 Bible Online

Cimə 44 - KapsikiDC bible

Cimə 44

¹Se va wəndə nya te ghəa cimə. Ciməa ŋwalea Korɛ.

²Shala yawe, nahe ghen'yɛ kefate le sleme ta n'yɛ, nahe ka shihɛ n'yɛ keɓelate n'yɛ slene nyi jama jama nyi menete na te vəa nci vəashi.

³Nahe na keŋkamte hwelefefi kezha ve hwelefe ta n'yɛ, nahe na keɗate mbeli kezha mbake nda ŋkwa ke mbelia ŋa.

⁴Kafayɛa nci nde ndeke nda hɛɗi ke hɛ we, berete ta nci nde ndeke nda hərə ŋkwa ke hɛ we, ama dzeve kwa zeme ta ŋa, berete ta ŋa ba'a waŋea kema ta ɗa, kwa nza ŋkɛ nahe na keɗehwe hɛ.

⁵Shala yawe, gha ya kameghea ɗa, gha nde ve nda hərə ŋkwa ke mbelia ŋa.

⁶Te zlaɓa ta ŋa ne, nahe ghen'yɛ keŋkamte ka jaga ta n'yɛ. Te sləa ŋa ne, nahe ghen'yɛ keŋkeɗe ka ghema ta n'yɛ.

⁷Kevate ghə 'ya te gwecɛa ɗa we, kandeke ɗa hərə ŋkwa kafayɛa ɗa we.

⁸Gha nde mbele n'yɛ va ka jaga ta n'yɛ, gha nde vate hawe te ka ghema ta n'yɛ.

⁹Katetsahe ŋa ghen'yɛ kevə kevə Shala, kateve zləvə ghen'yɛ kaghala ghala te sləa ŋa. Zhɛne mpi.

¹⁰Ndagwara nahe na keneghamte n'yɛ, nahe na kepəliave n'yɛ hawe. Kezhɛne na kashave le ka sewajɛa n'yɛ we.

¹¹Kazhɛne n'yɛ na dzeyi te sebe va ka ghema ta n'yɛ. Tagha gɛ, pa ka jaga ta n'yɛ fəhwe wəshia n'yɛ.

¹²Kapele nda n'yɛ na ke hɛ kala timɛti nyi tehene mbeli. Kataze n'yɛ dzeyi hwa kweci hwelefefi.

¹³Kapamte mbelia ŋa na kaɗema səkəmə ganyɛ te hɛ, wəsə shɛ kekemave na mbe pamte hɛ we.

¹⁴Kasərə ka ghedəkwəa n'yɛ na kaŋele n'yɛ, kaŋ'wəshi n'yɛ ba'a kayiɗə n'yɛ mbeli nyi dzeyi yitea ghen'yɛ.

¹⁵Kazhɛre n'yɛ kaghena heca ta hwelefefi, kandeŋe ghə mbeli va ghen'yɛ hwa mbeli.

¹⁶Keveci keveci ne, sheŋwe sheŋwe nza 'ya, kweshame nza kema ta ɗa va hawe

¹⁷va fa ŋ'wəshi ba'a ŋele, va newe nde jaga nya kewa dewa.

¹⁸Pɛtɛ wəshi nyi kemenete n'yɛ geva, ama kezaghəyite ŋa ghen'yɛ we, kese n'yɛ kanehe jikə geva ta ŋa we.

¹⁹Kese ghen'yɛ kadzeyi te sebe we, kese ghen'yɛ kasame kwa hweŋkwa ta ŋa we.

²⁰Ama pa na sahwe n'yɛ yaka te hɛɗia yɛ kelɛ gamba ba'a pa na vaghe ŋkwesle ta mte kənəa ghen'yɛ.

²¹Ma ya nahe n'yɛ kezaghəyite sləa Shala ta n'yɛ, ma ya nahe n'yɛ kese kasəkwə kweci shala ne,

²²nza kateɗepetema Shala, gheŋkɛ nya keɗepe zəzə nyi tewəfərə kwa wənə na?

²³Tewəmbəreke gha mpə n'yɛ mbeli keveci keveci, mene n'yɛ mbeli kala timɛti nyi tehene mbeli.

²⁴Mahwətə, feɗeghe ŋa, va wa nza na yitea wa? Feɗeghe ŋa, neghama n'yɛ na kaghala ghala ma!

²⁵Va wa wəfərə kema ta ŋa na wa? Va wa zaghə ndiremi ba'a yaka nya te ghen'yɛ na wa?

²⁶Kwa nza ŋkɛ ne, kwekwelebəhə ghen'yɛ hwa keləwə, bebərəɓə ghen'yɛ hwa hɛɗi.

²⁷Sate te ŋkwa kezha kemane n'yɛ gɛ! Mbelemte n'yɛ te zlaɓa ta ganyɛa ŋa gɛ!