Read KapsikiDC Cimə 51 Bible Online

Cimə 51 - KapsikiDC bible

Cimə 51

¹Se va wəndə nya te ghəa cimə. Ciməa David.

²Te və nya se nde mɛ ŋkwa Natan sha David, kwa sebe ta nya ɓelahehwe ɓelahe ŋkɛ le Bacɛba.

³Shala yawe, zhɛ heli yitea 'ya tewəmbəreke ɗe ta ŋa, tewəmbəreke wəba ta ganyɛa ŋa ne, sehwemte jaɗafa ta ɗa.

⁴Yaɓemte ɗa wɛŋe va fete ta ɗa, pɛmte ɗa wɛŋe va jaɗafa ta ɗa.

⁵Kwa nza ŋkɛ nahe 'ya keɗepete fete ta ɗa, kevə kevə nza jaɗafa ta ɗa kwa kema ta ɗa.

⁶Deke ke gha menete ŋa jaɗafa 'ya, wəsə nya ndiremi kwa ntsə ta ŋa yamenete 'ya. Tsagha gɛ, katenza na tiɗiɗi te və nya sla fete na, kateɗema fete va gha te və nya meha ghwə na.

⁷Kaganda ne, sawa hwa jaɗafa yake geva 'ya, ma ghala dzawa hwə 'ya va meyɛ ɗa ne, mbe jaɗafa 'ya.

⁸Ama kaganda nya kwa wənəa wəndə ŋelɛ yaɗe na, Kancɛ nda ntsehwele na ke mehele ta ɗa.

⁹Kelemte jaɗafa ta ɗa yitea nza 'ya wɛŋe, pɛmte ɗa yitea nza 'ya tɛawetɛa ma ke kwacakelɛ.

¹⁰Fave ɗa zlama ba'a farefa. Tagha gɛ, katewetse 'yɛ'yɛa ɗa nyi mpəmte na.

¹¹Zhɛremte kema ta ŋa va yɛ jaɗafa ta ɗa, yaɓemte pɛtɛa fete nyi menete 'ya.

¹²Shala yawe, peyi wənə nya wɛŋe mbe 'ya, veyi mehele mɛnɛfɛ mbe 'ya.

¹³Negha ɗa ma na cakeɗake yitea gha ma, kelema sefəa ŋa nya keveyi geva tekeleke na shave mbe 'ya ma.

¹⁴Ndeke ɗa zlama ta nza kembele mbele, kemane ɗa laka mehele ganyɛ.

¹⁵Kateteke nda hweŋkwa ta ŋa 'ya ke ka jaɗafa. Tagha gɛ, katezhɛre geva ka mene fete kase sha gha.

¹⁶Shala yawe, Shala nya kembele ɗa, mbele ɗa va mte. Tagha gɛ ne, katetsa gaghwe 'ya va nya mbelete ɗa na.

¹⁷Mahwətə, ghwenemte ɗa mɛa ɗa, tagha gɛ, katetsahe ŋa 'ya.

¹⁸Kateɗe na kadzeghe melɛ 'ya we, kateyɛ melɛ kwa tere tere na we.

¹⁹Shala yawe, ma melɛ nya ɗe na ne, mehele gwedə. Shala yawe, kanegha wənə nya kagwedə ba'a nya kebeze beze na we.

²⁰Te zlaɓa ta ŋa ne, menete nda ganyɛ ke Siyon, zhɛne ŋate zli nya yitea Zhɛrəzalɛm.

²¹Ma tsagha gɛ, kateɗe melɛ nyi kehi ba'a wəshi keseɗa nyi tere mbeli cɛhwa cɛhwa na. Tagha gɛ, katedzeghe melɛ mbeli le mcɛmcɛli te reghwetɛa ŋa.