Read KapsikiDC Cimə 56 Bible Online

Cimə 56 - KapsikiDC bible

Cimə 56

¹Se va wəndə nya te ghəa cimə. Ciməa David. Cimə nya gha mbeli kala «Gheɗepe nya hwa wəfe jama jama nyi cakeɗa cakeɗa.» Vəa ŋkwa nya keseve David ka Filisti mbe Gat.

²Shala yawe, zhɛ heli yitea 'ya, kwa nza ŋkɛ mpa yaha ɗa mbeli. Keveci keveci ne, mpa hɛ le 'ya ba'a sa ɗa yaka hɛ.

³Keveci keveci ha ɗa mpa ka jaga ta ɗa, kwele kwele ka kele ghəa shɛhɛ kezha mpa le 'ya.

⁴Ma te və nya zhɛ ɗa ghazlənə ne, ke gha ve ŋa ghəa ɗa 'ya.

⁵Katsahe Shala 'ya kezha ghena ta ŋkɛ, kave nda ghəa ɗa 'ya ke Shala, kazhɛne ghazlənə kazhɛ ɗa we. Wa wəsə nya mene ɗa wəndə ŋelɛ wa?

⁶Keveci keveci sa ɗa yaka hɛ, deke mene ɗa wəsə kwa ndiremi yazəzə hɛ.

⁷Katsa ghena hɛ, kaceha ɗa hɛ, kanewe ŋkeɗe ta seɗa ta ɗa hɛ va nya ɗe kaza mpia ɗa.

⁸Katembelenji hɛ tewəmbəreke wəsə kwa ndiremi nya tse na? Shala yawe, mpəate mbelia shɛhɛ te hɛɗi le wənə le wənə.

⁹Nahe na keɓelate zhigəa seɗa ta ɗa kahwɛ. Zəzə yɛ nehwene ta ɗa shanda, kerafete geva hɛ mbe palepa ta ŋa tse yi?

¹⁰Ma te veci nya tetsa ŋa lewela 'ya ne, katezhɛne geva ka jaga ta ɗa dzeyi te sebe. Nahe 'ya keɗepe le 'ya Shala.

¹¹Katsahe Shala 'ya kezha ghena ta ŋkɛ, Kaganda ne, katsahe Mahwətə 'ya kezha ghena shɛ.

¹²Ke Shala ndeke nda ghəa ɗa 'ya, kazhɛne ghazlənə kazhɛ ɗa we. Wa wəsə nya mene ɗa wəndə ŋelɛ wa?

¹³Shala yawe, katemene wəshi nyi meɗeyi ŋa 'ya 'ya, katedzeghe ŋa yɛ melɛ ketsa ŋa hana 'ya,

¹⁴kwa nza ŋkɛ nahe na kembelemte ɗa va mte. Nahe na keyakɛ yɛ seɗa ta ɗa va tehene kezha dzeghwa 'ya mbe kema ta ŋa, gha Shala yitea waŋea mpi.