Read KapsikiDC Cimə 60 Bible Online

Cimə 60 - KapsikiDC bible

Cimə 60

¹Se va wəndə nya te ghəa cimə. Yitea ŋgwəleŋə. Ciməa David. Kezha teke nda wəshi ke mbeli.

²Vəa ŋkwa nya mpa ŋkɛ le ka Siri nyi mbe Mɛzopotami ba'a ka Soba. Ma kwa zhɛneke geva Zhowab ne, pa ɗate ka sewajɛa ka Ɛdom 12.000 kwa zlərəa ghwene.

³Shala yawe, nahe na kewəfəyite n'yɛ ba'a ketazemte n'yɛ. Ya wənəa ŋa hwepe ne, zhɛneyi n'yɛ te ŋkwa n'yɛ.

⁴Nahe na kegaŋkəɗəte hɛɗi, nahe na keperawemte ŋkɛ. Zhizhiɓəmte yɛ perawe ta ŋkɛ, kwa nza ŋkɛ ne, ŋzla yaŋzla ŋkɛ.

⁵Nahe na kevate dzeghe nyi dzawe dzawe te mbelia ŋa, nahe na kesahwe n'yɛ tɛ nya keghwəyi ŋkwa.

⁶Ke mbeli nyi kehawe va gha ne, nahe na kendeke nda wəsə kencɛ wəsə ke hɛ kezha hwɛ hɛ va yɛ have. Zhɛne mpi.

⁷Mbele n'yɛ laka berete ta ŋa ba'a fa səkwə ta n'yɛ. Tagha gɛ, pələsə tenza n'yɛ, ghen'yɛ nyi ɗehwe na.

⁸Ma ke Shala gezete mbe ghɛa ŋkɛ nya keveyi geva tekeleke: «Katehərə ŋkwa 'ya, katenehe meleme ta Sishɛm 'ya, katedzeghe zlərəa Səwkot 'ya.

⁹Ŋa ɗa Gala'ad, ŋa ɗa Manasɛ. Ɛfrayim ya kakwenə nya mbe ghəa ɗa, Zhəwda ya kageta meghe ta ɗa.

¹⁰Mowab ya kakwapɛ ta ɗa. Te Ɛdom tedɛke seɗa 'ya kezha kele ŋkɛ. Katsa kaka 'ya yitea Filisti.»

¹¹Wa nde tekele ɗa kadzembe meleme nya berete tse wa? Wa nde tebeghe ɗa hwa'a mbe Ɛdom tse wa?

¹²Ashɛ gha nya kaShala nya kebetakɛ n'yɛ wəka? Ashɛ gha Shala nya keɗema kezhɛne kadzemte mpa yitea ka sewajɛa n'yɛ wəka?

¹³Nde kakemane n'yɛ va nde ghema, kwa nza ŋkɛ gəmə kemane ta wəndə ŋelɛ.

¹⁴Ma le Shala ne, katehərə ŋkɛ ghen'yɛ. Gheŋkɛ nde teŋkeɗe ka ghema ta n'yɛ.