Read KapsikiDC Cimə 68 Bible Online

Cimə 68 - KapsikiDC bible

Cimə 68

¹Se va wəndə nya te ghəa cimə. Ciməa David. Cimə.

²Ma kasate Shala te ŋkwa, kataze ka jaga ta ŋkɛ kwetɛ kwetɛŋe, kahwɛnji ka ghema ta ŋkɛ mbe kema ta ŋkɛ.

³Kala nya za n'yia ghwə ne, tsagha za hɛ na. Kala nya rɛɗɛ ɗəkə va ghwə ne, tsagha mpə ka 'yaghwa mehele mbe kema ta Shala.

⁴Ama kazlama mbeli nyi tiɗiɗi, kawetse hɛ va farefa kwa kema ta Shala.

⁵Gha nda mə cimə ke Shala, tsahe mə sləa ŋkɛ. Hi nda mə hweŋkwa ke nde wəmata kempa te ɓerama. Mahwətə ya kasləa ŋkɛ. Zlama mə kwa kema ta ŋkɛ.

⁶Ma yitenyɛa ka mezhɛtiti ba'a nde ya ka wedidi ne, gheŋkɛ Shala nya mbe ghɛa ŋkɛ nya keveyi geva tekeleke.

⁷Kave nda ghɛ Shala ke mbeli nyi ɗema mbeli te hɛ, kave nda zlama ta nza waɗe ŋkɛ ke ka daŋgayɛ. Ama mbeli nyi kefama ghena ne, kanza hɛ te hɛɗi nya keghwele ghwele.

⁸Shala yawe, ma te və nya shave na te kema ta mbelia ŋa, te və nya dzeghwa na te ɓerama ne,

⁹nahe hɛɗi kegaŋkəɗəte geva, nahe ghweme keshekakawa yɛmə, kwa kema ta Shala nya pelɛ Sinay, kwa kema ta Shala nya kaShala ta Israyɛl.

¹⁰Shala yawe, nahe na kemeke va kwele kwele, nahe na kendeke nda berete ke hɛɗia ŋa kemte mte.

¹¹Hɛɗia ŋa nya nzanji mbelia ŋa te, gha nya kaShala nya ganyɛ nde hite nda ŋkɛ ke nde titikwə.

¹²Ma kwetɛŋe kegezete ghena Mahwətə ne, ma ke wəvəsəa mi sha geze ghena mɛnɛfɛ ganyɛa shɛ:

¹³«Hwɛ mte yahwɛ ka meghea kɛfi ba'a ka sewajɛ.» Nehe yanehe wəshi nyi fəke mbeli hwa mpa mi nyi ketene ki ghɛ.

¹⁴Katenza ŋayɛ yɛ meɓelahe mbe ghedəkwə na? Kefi fi yɛ bidzəa gheɗepe le mze kwa tɛawetɛa ba'a yɛ shintia ŋkɛ le mze kwa tere tere kwa sleke sleke.

¹⁵Ma te və nya tazemte ka meghea kɛfi Shala nde berete ne, kwacakelɛ ya pelɛ ghweme ta Salmon.

¹⁶Ghweme ta Shala ghweme ta Bashan, ghweme nya nza gɛɗekwe kwele kwele te ghweme ta Bashan.

¹⁷Ghweme nyi nza gɛɗekwe kwele kwele te gheyɛ, va wa zhɛ ŋayɛ zlɛ va ghweme nya ɗehwe Shala kanza pelɛ wa? Kaganda ne, kaghala ghala tenza Mahwətə pelɛ.

¹⁸Kwele kwele wəmata kempa va Shala, slibə gare slibə zhigə. Mahwətə ya te tepe ta nci. Mbe ŋkwa nya keveyi geva tekeleke Sinay.

¹⁹Nahe na kedzeme ŋa pelɛ ghweme kezha nza pelɛ Shala Mahwətə. Nahe na kefəghe mbeli nyi keseve na kadzeme. Nahe na kekemave wəshi va mbeli, ya va mbeli nyi keyɛma ghena ta ŋa.

²⁰Tsa nda ɓəmə hana ke Mahwətə keveci keveci! Gheŋkɛ ya kaShala nya kembele ɓəmə. Zhɛne mpi.

²¹Shala shɛ ya kaShala nya kembele ɓəmə. Va Shala nya kaMahwətə hweŋkwa kembele ɓəmə va mte.

²²Ama kateŋkwape ghəa ka jaga ta ŋkɛ Shala, ghəa nde mpə ŋkwa nya nza shinti defəshemə mbe.

²³Ma ke Mahwətə gezete: «Katezhɛne hɛ 'ya sawa pelɛ Bashan, katezhɛne hɛ 'ya same kwa zeweve ta ndərə.

²⁴Tagha gɛ, katedzeghwa na hwa mimi, katezeme geva ta ka ghema ta ŋa kelɛa ketia ŋa.»

²⁵Shala yawe, nahe hɛ kenakɛ se ta ŋa, se ta Shala ta ɗa, ta meghea ɗa kadzembe ŋkwa nya keveyi geva tekeleke.

²⁶Te kema ka gha cimə, kwa sebe ka tsa wəshi ketsa, te tepe ŋwalea kwɛ nyi ketsa dimə.

²⁷Tsa nda mə hana ke Shala hwa yɛ tsene, tsa nda mə hana ke Mahwətə gheyɛ hwelefefia Israyɛl.

²⁸Bɛnjamɛn nya ɓɛhwɛ ma ya kande ghate, zhɛne ne, mbeli nyi te ghəa Zhəwda nyi mbe lekwesa nyi ketsa tsa, zhɛne ne, mbeli nyi te ghəa Zabəlon ba'a nyi te ghəa Nɛftali.

²⁹Nahe Shala ta ŋa ketarete kanza na bereteke. Ncɛte berete ta ŋa Shala yawe, gha nya kemenete slene ta ŋa kaŋa n'yɛ.

³⁰Nakɛma ta nci ke ghɛa ŋa nya mbe Zhɛrəzalɛm ne, katefə ŋa wəshi gəmə ka meghea kɛfi kase.

³¹Ɗate wəsə keseɗa nya hwa yɛ ghwəvərə, wəvəsəa mcɛmcɛli ba'a levea lɛməa mbeli nyi kegwəɗəŋə nyi kwa kema ta ŋa le dəɓərəa mze kwa tɛawetɛa ta nci. Tazemte mbeli nyi kezlama nyi yitea mpa!

³²Kateshave mbelia jama pelɛ Ɛzhipte. Katekafe nda dzeve ka Ɛtiyopi ke Shala.

³³Yɛ hɛɗia ka meghe nyi te hɛɗi lema, gha nda mə cimə ke Shala, tsahe mə ŋkɛ. Zhɛne mpi.

³⁴Kadzedzeghwa ŋkɛ pelɛ ghweme wəmata kempa ta ŋkɛ pelɛ ghweme nya ghalanza. Wa nya ŋkɛ kagaka, kagaka le berete.

³⁵Ɗepete mə berete ta Shala. Kwelea ŋkɛ ya kənəa Israyɛl, berete ta ŋkɛ ya dzeyi mbe ləmbə.

³⁶Shala yawe, kazhɛ ŋkwa ghazlənə va gha shave mbe ŋkwa nya keveyi geva tekeleke. Shala ta Israyɛl nde ve nda berete ba'a kwele ke mbelia ŋkɛ. Hana ke mbeli sha Shala!