Read KapsikiDC Cimə 72 Bible Online

Cimə 72 - KapsikiDC bible

Cimə 72

¹Se va Salomon. Shala yawe, ndeke nda meha ghwə ta ŋa ke meghe, ndeke nda nza tiɗiɗia ŋa ke wəzege ta meghea shɛ.

²Sleke mbelia ŋa ŋkɛ le nza tiɗiɗi ba'a ka dewə berete le kaganda.

³Kele nda kwelɛŋe yɛ ghweme ba'a nza tiɗiɗi yɛ wəmbə ke mbeli.

⁴Mene nda wəsə nya kehi meghe ke ka dewə berete nyi hwa mbeli, nza ŋkɛ kande mbele ka titikwəa kɛfi, vate ɗa ŋkɛ te mbeli nyi kemene ghəa nci le hɛ.

⁵Nza meghe te ghweme pa te kiɗi ta hɛɗi lema, kala temə ta yɛ veci le tere.

⁶Nza ŋkɛ kala va nya keme kənəa wəza, kala va nya keleɓe hɛɗi.

⁷Mtsehe geva nza tiɗiɗi kala nza ta ŋkɛ te meghe, mbake geva mcɛlə kala nya teɓele tere.

⁸Sleke ŋkwa ŋkɛ se mɛa ndərə hwa'a mɛa kwete se mɛa hələa Efrate hwa'a te mendɛkwe ta hɛɗi.

⁹Kategwəɗəŋə mbeli nyi te ɓerama mbe kema ta ŋkɛ, katenza ka jaga ta ŋkɛ kwekwelebəhə hwa keləwə.

¹⁰Katefə nda wəshi gəmə meghe nya mbe Tarsis ba'a nyi te hɛɗi nyi dzeyi te ndərə kase, katetsehe nda jaɓeregwale meghe nya mbe Saba ba'a nya mbe Sɛba.

¹¹Pɛtɛa ka meghea kɛfi kategwəɗəŋə mbe kema ta ŋkɛ, pɛtɛa hwelefefi katemene nda slene.

¹²Kaganda ne, katembele ka titikwəa kɛfi nyi ke'yɛwe kemane ba'a ka dewə berete nyi ɗema wəndə te hɛ ŋkɛ.

¹³Katezhɛ heli ŋkɛ yitea nde titikwə ba'a nde dewə berete, katembele mpia ka titikwəa kɛfi ŋkɛ.

¹⁴Kateya hɛ ŋkɛ va yaka ba'a va mene berete, kateve zləvə ŋkɛ te mpia nci.

¹⁵Hɛakɛ meghe Shala! Kateve nda mze kwa tere tere nya mbe Saba mbeli, katesəkwə nda ghə mbeli kevə kevə. Wəpi ŋkɛ Shala keveci keveci.

¹⁶Menete mene ha kwele kwele te hɛɗi, gaŋkəɗə yɛ ghəa ha dzeyi kwa ghəa yɛ ghweme, kala ghweme ta Liban vəa ŋkwa nya bete ghwə ŋkɛ. Kele yɛ meleme kala gwəzə nyi mbe wəve.

¹⁷Nza zləvəa meghe kaghala ghala, pesleyi geva ŋkɛ te hɛɗi lema. Ma tsagha katewəpi ghəa nci mbeli le sləa ŋkɛ ba'a kategeze pɛtɛa hwelefefi gheŋkɛ ya kameghe nya kewəpi wəpi.

¹⁸Tsa nda ɓəmə hana ke Shala Mahwətə, Shala ta Israyɛl, deke gheŋkɛ nde mene wəshi meŋele.

¹⁹Tsa nda ɓəmə hana ke Shala nya nza zləvə te kaghala ghala. Nza hɛɗi lema viɗi va zləvəa ŋkɛ. Amɛn! Amɛn!

²⁰Teke kiɗi yɛ səkwə ghə ta David, wəzege ta Zhɛsɛ.