Read KapsikiDC Cimə 74 Bible Online

Cimə 74 - KapsikiDC bible

Cimə 74

¹Cimə. Se va Asaf. Shala yawe, va wa wəfəyite ŋkwa na kaghala ghala wa? Wa raberə hwepe nda wənə na ke wəshi keseɗa ta ŋa nyi zeme nda gwəzə na wa?

²Zəzəte mbelia ŋa, nahe na kentave hɛ se vəashi, hwelefefi nyi se nyi na ka'yɛwe kanza kaŋa ŋa, ghweme ta Siyon nya menete na kaghɛa ŋa.

³Dzeghwa dzeyi laka ŋkwa nyi keŋzla ŋzla. Ma mbe ghɛa ŋa ne, nahe ka jaga kebezemte pɛtɛa wəshi.

⁴Nahe ka ghema ta ŋa kese katsa kaka te ŋkwa nya se na kabegeme le ghen'yɛ. Nahe hɛ kemɓemɓeyi yɛ drapea nci te.

⁵Nahe hɛ keyipəte ghəa nci le ka mpə sheghwə le tseyɛ mbe ghɛa wəfe.

⁶Le tseyɛ ba'a ndevele mpəakawa pɛtɛa pa ta wəshi nyi mbe ghɛa ŋa hɛ.

⁷Nahe hɛ kendəyite ghwə yitea ghɛa ŋa, kempəate ŋkɛ te hɛɗi ba'a kekelemte zləvə te ŋkwa kenza ta ŋa.

⁸Ma ke hɛ kwelɛ ghəa nci: «Mpəmte ɓəmə hɛ pɛtɛ kanya kwetɛŋe.» Nahe hɛ keteremte pɛtɛa ŋkwa kebegeme le Shala nyi te hɛɗi.

⁹Kazhɛne n'yɛ kanakɛ wəshi kencɛ wəshia n'yɛ we, kezhɛne ka mɛ ŋkwa kanza shɛ we, wəndə shɛ hwa ghen'yɛ keɗepe temə ta vəa shɛ we.

¹⁰Shala yawe, pa te nyama və tesərə nde jaga na kaghweze mɛ hwa gha wa? Mba tenza nde ghema kaŋ'wəshi ŋa kajive kajive na?

¹¹Wa raberə ɗema na kemane n'yɛ wa? Wa raberə mteyi dzeve kwa zeme ta ŋa na wa?

¹²Shala yawe, ndagwara gha ya kameghea n'yɛ se vəashi, gha nde mbele n'yɛ keveci keveci te hɛɗi nya.

¹³Gha nde perawate ŋkwa te ndərə le berete ta ŋa, gha nde ŋkweŋkwapemte ghəa yɛ shishi meŋele kwa yɛmə.

¹⁴Gha nde jejɛwəmte yɛ ghəa kele nya wəba, gha nde ndeke nda ŋkɛ kawəsə kezeme ke yɛ kelɛ gamba.

¹⁵Gha nde menete yɛ ɗasle ba'a yɛ hələ, gha nde hehasemte ghwa nyi keɗema kashifə.

¹⁶Gha nde pate veci ba'a viɗi perə, gha nde veyi tere ba'a veci te ŋkwa nci.

¹⁷Gha nde dzeghete ghala ta hɛɗi, gha nde menete ghele ba'a vɛa.

¹⁸Mahwətə, zəzəte ghena nya: kaghweze mɛ ka jaga hwa gha, kayiɗə ŋa hwelefe ta ka gezhia kɛfi.

¹⁹Pele nda ma mpia mbelia ŋa nyi ɗehwe na tsape na ke ka jaga ta nci ma, zaghəma mpia mbelia ŋa nyi kaka titikwə na kaghala ghala ma.

²⁰Zəzəte jikə geva nya menete na le ghen'yɛ: tsene yatsene geva mbeli dzeyi te ŋkwa nyi zhikwətəkwə tewəfərə kezha mene berete.

²¹Pəli nda ma hawe na ke mbeli nyi kesa yaka ma, tsahe ŋa ka titikwə ba'a ka dewə berete.

²²Shala yawe, sate te ŋkwa, mpa yitea ghəa ŋa. Zəzəte yɛ ŋele ta ka gezhia kɛfi nyi keveci keveci gi!

²³Zaghəma gaka ta ka jaga ta ŋa, lewela nyi tsa ka ghema ta ŋa yitea gha kevə kevə na ma.