Read KapsikiDC Cimə 78 Bible Online

Cimə 78 - KapsikiDC bible

Cimə 78

¹Ciməa Asaf. Mbelia ɗa yawe, fa mə wəsə mahalegəa ɗa, ve mə sleme yitea ghena nyi kesame kwa mɛa ɗa.

²Kateghwene mɛ 'ya kezha geze ghena ŋela ba'a kezha hekɛme wəshi meŋele nyi vəashi.

³Nahe gheɓəmə kefate ba'a keɗepe ghena nyi gezete ɓəmə ka shihɛ ɓəmə.

⁴Katewəfərə ghena shɛhɛ gheɓəmə va ŋwalea ɓəmə we, ama kateɓela nda yɛ slene zləvəa Mahwətə, nza ta berete ta ŋkɛ ba'a wəshi meŋele nyi menete ŋkɛ gheɓəmə ke hwelefe nya keteya.

⁵Nahe ŋkɛ kegezeyi nda ghena ke mbelia Zhakob, nahe ŋkɛ keveyi wəsə mahalegə mbe Israyɛl. Nahe ŋkɛ kegezave nda ka shihɛ ɓəmə kezha teke nda wəshia shɛhɛ ke ŋwalea nci.

⁶Ma tsagha ne, katetekeve hwelefe nya ketese, ŋwale nyi keteya ba'a kateɓela nda hɛ hɛ ke ŋwalea nci.

⁷Kateve nda ghəa nci hɛ ke Shala, katezaghə wəshi meŋelea Shala hɛ we, kateya wəshi mahalegəa ŋkɛ hɛ.

⁸Ma tsagha ne, katenza hɛ kala ka shihɛ nci, hwelefe nya keɗema kafa ghena ba'a nya ntɛaŋetɛa ghə, hwelefe nya ɗema mehele ve ba'a nya ɗema zəzə ta ŋkɛ te Shala we.

⁹Ma nda hwɛnji mbeli nyi kwa yita ta Ɛfrayim, mbeli nyi kempa le have te vecia mpa ne,

¹⁰kwa ɗema hɛ keyate jikə geva ta Shala, kese hɛ kazele wəsə mahalegəa ŋkɛ we.

¹¹Nahe hɛ kezaghəyite slene ta ŋkɛ nyi jama jama ba'a wəshi meŋele nyi ncɛte nda ŋkɛ ke hɛ.

¹²Nahe ŋkɛ kemenete wəsə meŋele kwa ntsə ta ka shihɛ nci, te hɛɗia Ɛzhipte, te ŋwela ta Sowan.

¹³Nahe ŋkɛ keŋate ŋkwa te ndərə ba'a kefəghe hɛ jive te, nahe ŋkɛ keghereŋeyi yɛmə kala zli nya biya.

¹⁴Ma heveci ne, nahe ŋkɛ kese kabeghe hɛ laka ləmbə, heviɗi, laka waŋe ta ghwə.

¹⁵Nahe ŋkɛ kepeperawemte yɛ keleɓa te ɓerama kezha ve nda yɛmə kesa kwele kwele ke hɛ.

¹⁶Ma shave mbe keleɓa ne, nahe ŋkɛ kentsake ghwa ba'a kehwɛte yɛmə kala hələ.

¹⁷Ama jaɗafa yamene nda hɛ shanda, ghə yazhɛne nda hɛ ke Shala tehwə ghweme te ɓerama.

¹⁸Nahe hɛ kedzeghakɛ Shala le ɗe ta nci ba'a ke'yɛwakɛ wəsə kezeme nya ɗe ghəa nci.

¹⁹Ma ke hɛ sha se kageze ghena te Shala kwelɛ ghəa nci: «Wərə Shala kaɗave ɓəmə wəsə kezeme te ɓerama tse na?

²⁰Kaganda, nahe ŋkɛ kempave keleɓa, kehwɛte yɛmə kwele kwele. Ama wərə ŋkɛ kandeke nda ɗafa ba'a sli ke mbelia ŋkɛ perə tse na?»

²¹Ma kwa fate ghena shɛ Mahwətə ne, pa ŋkɛ hwepete wənə, pa wənəa ŋkɛ bezenyɛ va hwelefe ta Zhakob, pa ŋkɛ hwepete nda wənə ke Israyɛl.

²²Kwa nza ŋkɛ ne, kese hɛ keve nda ghə ke Shala we, kese hɛ kayɛ wərə ŋkɛ kambelete hɛ we.

²³Pa ŋkɛ gezave nda ghena ke ləmbə nyi te ghweme, pa ŋkɛ ghwenemte gelembe nyi te ghweme.

²⁴Pa ŋkɛ betakawa mane kezha zeme nda zeme ke hɛ, ha nya pelɛ ghweme yantakawa nda ŋkɛ ke hɛ.

²⁵Yayata wəndə kezehwe ɗafa ta ka ghwene ta Shala, nahe Shala keghweneke nda wəshi kezeme ke hɛ kwele kwele.

²⁶Pa ŋkɛ ŋkamte sefə nya kesame kwa zeweve ta ghweme pelɛ ghweme, pa ŋkɛ vɛke sefə nya kesame laka bela kwa zeme laka berete ta ŋkɛ.

²⁷Pa ŋkɛ betaghe sli kənəa hɛ kala hɛɗi, 'yɛ kwele kwele kala ndaleghe nya kwa hələ.

²⁸Pa ŋkɛ beteyi hɛ te tepe ta ghedəkwəa nci, dzeyi yitea yɛ cɛ lekwesa ta nci.

²⁹Pa hɛ zehwe slia shɛhɛ behe behe, nahe Shala kendeke nda wəsə nya ɗe hɛ ke hɛ.

³⁰Ama tewə hɛ kekiɗimte zeme ta ŋkɛ, te və nya nza mɛa nci viɗi viɗi ne,

³¹pa hwepe wənə ta Shala pesleyi geva kənəa hɛ, pa ŋkɛ mpəmte mbeli nyi berete berete ma, pa ŋkɛ mpəate megelɛshia ka Israyɛl te hɛɗi.

³²Ya tsagha shɛ ŋkɛ, nahe hɛ kezhɛne kamenete jaɗafa, kese hɛ kayɛ wəshi meŋelea ŋkɛ we.

³³Pa ŋkɛ kiɗimte nza ta nci teghweme kala sefə ba'a yɛ va ta nci mbe ghazlənə.

³⁴Ma vəa ŋkwa nya se Shala kampə hɛ ne, nahe hɛ kese kazele ŋkɛ, nahe hɛ kese shɛ ba'a kese kazele kemane ta ŋkɛ.

³⁵Nahe hɛ kese kazəzə Shala nde se kagela ta nci, Shala tehwə ghweme nde se kande ya hɛ.

³⁶Ama deke le mɛ se hɛ kaghwete ŋkɛ, tseŋwə yase ghɛnia nci kasla nda.

³⁷Kese hɛ kave nda wənəa nci we, kese hɛ kanza dɛŋe dɛŋe te jikə geva ta ŋkɛ we.

³⁸Ama gheŋkɛ nya kande zhɛ heli ne, jaɗafa yase ŋkɛ kakele te wənə, kaɗema kaza sebe te hɛ. Kagweɗakwe wənəa ŋkɛ ŋkɛ mbe kweci və, kafeɗeghe pɛtɛa hwepe ta wənəa ŋkɛ ŋkɛ we.

³⁹Nahe ŋkɛ kese kazəzə deke kambeli hɛ gəmə, kasefə nya keslə kaɗema kazhɛne kase.

⁴⁰Ma mbe kweci və ne, kaka fa nda ma ghena se hɛ te ɓerama, nahe hɛ kebezemte nda ghena te ŋkwa nyi keghwele ghwelea shɛhɛ.

⁴¹Nahe hɛ kezhɛne kadzeghakɛ Shala, kabezemte nda wənə ke Shala nya kaganda ta Israyɛl.

⁴²Kezhɛne hɛ kazəzə wəsə nya menete dzeve ta ŋkɛ, veci nya mbeɗeke hɛ ŋkɛ va ka ghema ta nci we.

⁴³Nahe hɛ kezaghəyite wəshi kencɛ wəshi nyi menete ŋkɛ mbe Ɛzhipte, wəshi meŋele nyi menete ŋkɛ te hɛɗi Sowan.

⁴⁴Nahe ŋkɛ kezhɛrete yɛməa yɛ dzeve ta Nil kamimi, tsagha yɛ hələa nci kezha ɗema ka Ɛzhipte kasa yɛməa nci.

⁴⁵Nahe ŋkɛ ghwenahwe yɛ ŋgezlere nyi kehehalakawa hɛ ba'a gwambe nyi kebezakawa hɛɗia nci hwa hɛ.

⁴⁶Nahe ŋkɛ kendeke nda wəshi nyi wəzate hɛ ke yɛ dzale ba'a wəshi nyi meneke hɛ te wəve ke yɛ hegi.

⁴⁷Nahe ŋkɛ kebezemte yɛ rɛzɛŋea nci le kwacakelɛ ba'a yɛ mekweɗa ta nci le va nyi jama jama.

⁴⁸Nahe ŋkɛ kewəfəyi wəshi keseɗa ta nci te kwacakelɛ ba'a yɛ wəvəsəa wəshi keseɗa ta nci katsa hɛ va.

⁴⁹Nahe ŋkɛ kepelaghe ghwə ta hwepe wənəa ŋkɛ kənəa hɛ: beze ta wənə, ghyana, herefe, ka ghwene ta ŋkɛ nyi kekele ndiremi.

⁵⁰Kese ŋkɛ kadzakwe hwepe ta wənəa ŋkɛ we, kese ŋkɛ kaya hɛ va mte we, nahe ŋkɛ kepelave nda mpia nci ke ba.

⁵¹Nahe ŋkɛ kempəmte pɛtɛa ka tezhɛa kɛfi nyi mbe Ɛzhipte, ghenci nyi kaka ghate ta ŋwale mempɛhweta ki ghɛa Sham.

⁵²Nahe ŋkɛ kefəakave mbelia ŋkɛ kala wəshi keseɗa, nahe ŋkɛ keŋkaghe hɛ kala timɛti kadzete ɓerama.

⁵³Le gezleŋema ghə begheghe hɛ ŋkɛ, kese hɛ kaghazlənə vəa ŋkwa nya zhiɓəaghe geva ndərə kənəa ka jaga ta nci we.

⁵⁴Nahe ŋkɛ kefəghe hɛ kadzete hɛɗia ŋkɛ nya keveyi geva tekeleke, kadzeme ghweme nya kelehwe ŋkɛ le berete ta ŋkɛ.

⁵⁵Nahe ŋkɛ keŋkamte hwelefefi te kema ta nci, Nahe ŋkɛ keneheve nda hɛɗi ke hɛ kaŋa nci, Nahe ŋkɛ kefəyi yitehɛ nyi mbe Israyɛl mbe yɛ cɛ lekwesa ta nci.

⁵⁶Ama nahe hɛ kedzeghakɛ Shala tehwə ghweme, laka fa nda ma ghena, laka hawema va ghena nyi gezete ŋkɛ.

⁵⁷Nahe hɛ kehwɛnji ba'a kepamte ŋkɛ kala ka shihɛ nci, nahe hɛ kezhɛrenji kala rəgi nya ɗema tsene ganyɛ te.

⁵⁸Nahe hɛ kebezemte nda wənə le yɛ kələŋəa nci, nahe yɛ shala ta nci kemtseke hwepe wənəa ŋkɛ.

⁵⁹Ma kwa nakɛ wəsəa shɛ Shala ne, pa ŋkɛ hwepete wənə ba'a wəfəyite Israyɛl fate fate.

⁶⁰Pa ŋkɛ slənyɛ mbe ghɛa ŋkɛ nya mbe Silo, cɛ lekwesa nya mɓeyi ŋkɛ te tepe ta mbeli.

⁶¹Pa ŋkɛ pelakɛ ka ghema kakele səndəkwəa jikə geva, wəsə kencɛ berete ta ŋkɛ ba'a zləvəa ŋkɛ.

⁶²Pa ŋkɛ pelave nda mbelia ŋkɛ ke mte, pa hwepete wənə va hɛɗia ŋkɛ.

⁶³Pa ghwə teremte megelɛshi, kezhɛne mbeli kaghate nda cimə ke deghelɛshi hwa makwa we.

⁶⁴Ma kwa mpəmte ka dzeghe Shala mbeli ne, kese ka wedidi kanehwene we.

⁶⁵Tagha gɛ, pa Shala feɗeghenyɛ kala wəndə nya kese yitea hɛ, kala katsala kempa nya keghwəyi ghwəyi va tɛ.

⁶⁶Pa ŋkɛ ɗate ka jaga ta ŋkɛ se kwa sebe ba'a pəliave nda hawe nya kaghala ghala ke hɛ.

⁶⁷Pa ŋkɛ neghamte hwelefe ta Zhozɛf, pa ŋkɛ ɗema nta hwelefe ta Ɛfrayim.

⁶⁸Pa ŋkɛ ntave hwelefe ta Zhəwda, ghweme ta Siyon nya ɗehwe ŋkɛ.

⁶⁹Pa ŋkɛ ŋate ghɛa ŋkɛ tagha, kala ŋkwa nyi bebiya bebiya. Pa ŋkɛ veyi shihəa ŋkɛ kala hɛɗi kaghala ghala.

⁷⁰Pa ŋkɛ ntave David nya kande mene slene ta ŋkɛ, kwa zlema ta timɛti zeleke ŋkɛ ŋkɛ.

⁷¹Seyi yitea timɛtia ŋkɛ kelemte ŋkɛ ŋkɛ, kezha ve ŋkɛ kande ya hwelefe ta Zhakob, ta Israyɛl, hwelefe nya kaŋa ŋkɛ.

⁷²Le wənə nya ganyɛ yate hwelefea shɛ David, le mehele se ŋkɛ kancɛ nda hweŋkwa ke hɛ.