Read KapsikiDC Cimə 79 Bible Online

Cimə 79 - KapsikiDC bible

Cimə 79

¹Ciməa Asaf. Shala yawe, nahe hwelefefi kedzetenji te hɛɗia ŋa, nahe hɛ kezhɛrete ghɛa ŋa nya keveyi geva tekeleke wale wale, nahe hɛ kezhɛrete Zhɛrəzalɛm kakwəfi.

²Nahe hɛ kefəave nda geva ta ka mene slene ta ŋa ke yɛ zleŋa, slia mbelia ŋa ke wəshi keseɗa nyi hwa gamba.

³Kala ghwa shekeyi mimia nci hɛ dzeyi yitea Zhɛrəzalɛm, wəndə shɛ tagha kezha la hɛ we.

⁴Kaŋele n'yɛ hwelefefi nyi dzeyi yitea ghen'yɛ, kaŋ'wəshi n'yɛ ba'a kayiɗə n'yɛ mbeli nyi dzeyi yitea ghen'yɛ.

⁵Pa te nyama və tenza wənəa ŋa tehwepe wa Mahwətə? Kaghala ghala tetse hwepe ta wənəa ŋa kala ghwə na?

⁶Vaghe hwepe wənəa ŋa kənəa mbeli nyi keɗepema ŋa, kənəa hɛɗi nyi keɗema kahekɛme sləa ŋa.

⁷Kwa nza ŋkɛ nahe hɛ kezehwe Zhakob, nahe hɛ kebezemte hɛɗia ŋkɛ.

⁸Ɗama n'yɛ na va fete ta ka shihɛ n'yɛ ma, ama zhɛ heli yitea ghen'yɛ kahe kahe, kwa nza ŋkɛ nahe n'yɛ kenza kaka dewə berete.

⁹Shala yawe, kemane n'yɛ ba'a mbele n'yɛ kezha nza zləvə te sləa ŋa. Mbele n'yɛ ba'a kelemte jaɗafa ta n'yɛ te wənə kezha dzemte sləa ŋa.

¹⁰Kezha wa tegeze hwelefefi: «Tema Shala ta nci gɛ wa», ke hɛ wa? Ɗepete hɛ kwa ntsə ta n'yɛ tsema tsema wa mpə ta ka mene slene ta ŋa na.

¹¹Fate ŋgaɗe ghə ta ka daŋgayɛ megela. Ma gha nya berete ne, sərəakɛ mbeli nyi tempə mbeli teghweme.

¹²Shala, nahe hwelefefi nyi dzeyi yitea ghen'yɛ keŋelekɛ ŋa, waghe ŋele ta nci mberefaŋe zhigə kənəa hɛ.

¹³Ama ghen'yɛ nyi kambelia ŋa, nyi katimɛtia ŋa nyi ya na gɛ ne, katetsahe ŋa ghen'yɛ kaghala ghala ba'a kateve zləvə ghen'yɛ te gha keshi keshi.