Read KapsikiDC Cimə 85 Bible Online

Cimə 85 - KapsikiDC bible

Cimə 85

¹Se va wəndə nya te ghəa cimə. Ciməa ŋwalea Korɛ.

²Mahwətə yawe, nahe na kencɛte nda ɗe ta ŋa ke hɛɗia ŋa, nahe na kezhɛneyi hwelefefia Zhakob te ŋkwa nci.

³Nahe na kekelemte fete ta mbelia ŋa te wənə, nahe na keyaɓemte jaɗafa ta nci. Zhɛne mpi.

⁴Nahe na keghereŋete beze ta wənəa ŋa, nahe na kesərəakɛ ghwə ta hwepe wənəa ŋa.

⁵Shala nya kembele n'yɛ, zhɛneke n'yɛ, fɛamte hwepe wənəa ŋa laka ghen'yɛ.

⁶Kehwepe hwepe tenza wənəa ŋa shanda va ghen'yɛ na? Keshi keshi tetemə beze ta wənəa ŋa na?

⁷Katezhɛne na kase kezha ve mpi hwa ghen'yɛ, kezha zlama mbelia ŋa te gha tse yi?

⁸Mahwətə yawe, ncɛte n'yɛ ganyɛa ŋa ba'a ndeke n'yɛ mbele ta ŋa.

⁹Katefa ghena nya geze Shala nya kaMahwətə 'ya. Kageze ghena ŋkɛ kezha kwelɛŋea hwelefe ta ŋkɛ ba'a mbelia ŋkɛ. Ama zhɛnema geva hɛ kadzembe gezhia nci ma.

¹⁰Kaganda ne, takwa takwa ŋkɛ kambele mbeli nyi kehawe ve, yitea nza zləvəa ŋkɛ te hɛɗia ɓəmə.

¹¹Kabegeme geva yɛ ganyɛ le kaganda, kahəməwə geva yɛ nza tiɗiɗi le kwelɛŋe.

¹²Kapese kaganda shave mbe hɛɗi, kasawa nza tiɗiɗi pelɛ ghweme.

¹³Kave nda zeɗe nza Mahwətə le ghəa ŋkɛ ke mbeli, kave nda wəshi nyi kese te wəve hɛɗia ɓəmə ke mbeli.

¹⁴Kadzeghwa nza tiɗiɗi mbe kema ta ŋkɛ, kaŋkeɗe yɛ seɗa ta ŋkɛ ŋkɛ dzeyi kwa hweŋkwa.