Read KapsikiDC Cimə 88 Bible Online

Cimə 88 - KapsikiDC bible

Cimə 88

¹Cimə. Ciməa ŋwale Korɛ. Se va wəndə nya te ghəa cimə. Kezha gha yitea shela. Ghena ta Hɛman, nde Ɛzra.

²Shala Mahwətə nya kembele ɗa, veci le viɗi ne, katsa ŋa lewela 'ya.

³Kemaneve səkwə ta ɗa megela, ve sleme yitea lewela ta ɗa.

⁴Kwa nza ŋkɛ ne, behe 'ya va yaka, takwa 'ya yitea mte.

⁵Kala wəndə nya teshave sefə hwe newe ɗa mbeli, kala wəndə nya kedenenyɛ nza ta ɗa.

⁶Hwa mbeli nyi kempə mpə ŋkwa kenza ta ɗa, yipə yipə 'ya le mbeli nyi meɓelahe kwa kwele. Kazhɛne na kazəzə hɛ we, kazhɛne na kanewe ghweme te hɛ we.

⁷Nahe na kenegheyi ɗa kwa ki nya lɛame, hwa ŋkwesle nya diŋwədi ta mte.

⁸Nahe hwepe ta wənəa ŋa kedzeghəa 'ya, yaka yasa ɗa na kala gaŋkeɓe ta yɛmə.

⁹Nahe na kehendemte ɗa vare mbeli nyi ɗepe 'ya, nahe na kezhɛrete ɗa kawəsə kwa ndiremi sha hɛ. Nahe 'ya kenza jaslɛ keŋzle ŋzle mbe yaka, kazhɛne 'ya kashave ɗa we.

¹⁰Dene yadene ntsə ta ɗa va yaka. Mahwətə yawe, keveci keveci səkwə ŋa 'ya, kafe dzeve 'ya dzeme laka gha.

¹¹Katemene wəsə meŋele na kaŋa ka mpə mpə na? Katesate mbelia shɛhɛ te ŋkwa katsahe ŋa na? Zhɛne mpi.

¹²Wa nde tegeze ganyɛa ŋa kwa kwele wa? Wa nde teɓela ɗe ta ŋa kwa ghɛa mbelia kwahɛɗi wa?

¹³Nahe mbeli keɗepe wəshi meŋelea ŋa mbe ŋkwesle na? Nahe mbeli keɗepe tiɗiɗia ŋa te hɛɗia zaghə wəshi na?

¹⁴Ama gha yatsa ŋa lewela 'ya Mahwətə, Kiɗima ta ŋkwa ne, kwa kema ta ŋa səkwə ta ɗa.

¹⁵Mahwətə yawe, kezha wa neghamte ɗa na wa? Kezha wa wəfərə kema ta ŋa na va 'ya wa?

¹⁶Se kawəzegenyɛ ne, nde dewə berete 'ya ba'a takwa 'ya yitea mte. Nahe na kendeke ɗa ghazlənə ba'a nahe mehele ta ɗa ketazenyɛ.

¹⁷Nahe ghwə ta hwepe ta wənəa ŋa kedzete 'ya, Nahe 'ya kemte ɗa va ghazlənə nyi ndeke ɗa na.

¹⁸Kadzasle ɗa hɛ keveci keveci kala yɛmə, kantəslə ɗa hɛ kanya kwetɛŋe.

¹⁹Nahe na kehendemte ka mcɛhɛ ɗa ba'a ka dzeghwa le 'ya yitea 'ya. Deke ŋkwesle nde tene kamcɛ ɗa.