Read KapsikiDC Cimə 89 Bible Online

Cimə 89 - KapsikiDC bible

Cimə 89

¹Ghena ta Ɛtan, nde Ɛzra.

²Kategha wəshi ganjia Mahwətə 'ya keveci keveci, kategeze ɗe ta ŋkɛ mɛa ɗa keshi keshi.

³Kaganda ne, ma 'ya sha geze: «Kaghala ghala nza ganyɛa ŋa. Nahe ɗe ta ŋa keveyi geva megela pelɛ ghweme.»

⁴Ma pa na gezete «Nahe 'ya kemenete jikə geva le wəndə nya ntave 'ya. Ma 'ya gezete nda ke nde mene slene ta ɗa David:

⁵Kateve nda meghe 'ya mbe hwelefe ta ŋa kaghala ghala, kateve pasla ta ŋa 'ya keshi keshi.» Zhɛne mpi.

⁶Mahwətə, tsahe wəshi meŋelea ŋa ŋkwa nya pelɛ ghweme tsahe geva ganyɛa ŋa hwa tsene ta mbeli nyi keveyi geva tekeleke.

⁷Wa ya kala Mahwətə pelɛ ghweme wa? Wa ya yipə yipə le Mahwətə hwa kweci shala wa?

⁸Ma hwa tsene ta mbeli nyi keveyi geva tekeleke ne, mbeli pɛtɛ kaghazlənə va Shala. Ghazlənə ma mbeli ve ke pɛtɛa shala nyi dzeyi yite.

⁹Shala Mahwətə nde berete, wa ya berete kala gha wa? Mahwətə, ganyɛa ŋa yadzasle yitea gha.

¹⁰Gha nde sleke berete ta ndərə ba'a nde gweɗakwe yɛ gaŋkeɓe ta ŋkɛ.

¹¹Gha nde ŋkeɗemte Rahab kala wəndə kemte mte ba'a nde tazemte ka jaga ta ŋa na laka berete ta ŋa.

¹²Gha yanza ghweme ba'a hɛɗi kaŋa ŋa, gha nde pate hɛɗi lema ba'a pɛtɛa wəshi nyi te.

¹³Gha nde pate bela kwa gwela ba'a bela kwa zeme, katsahe sləa ŋa yɛ ghweme ta Tabor le ŋa Hɛrmon.

¹⁴Gha yanza dzeve ta ŋa bereteke, mɓəa ŋa dzəŋə dzəŋə ba'a dzeve kwa zeme ta ŋa kekafe kafe.

¹⁵Wəsə nya tiɗiɗi ba'a nya kehi ya kashihəa pasla ta ŋa, ganyɛ ba'a kaganda ka dzeghwa mbe kema ta ŋa.

¹⁶Zlama ya va mbeli nyi keɗepe tsahe ŋa. Mahwətə, katedzeghwa hɛ yitea waŋea kema ta ŋa.

¹⁷Katezlama hɛ kevə kevə tewəmbəreke sləa ŋa, katesate hɛ te ŋkwa tewəmbəreke tiɗiɗia ŋa.

¹⁸Kaganda ne, gha ya kaberete nya wəba ta nci, te zlaɓa ta ŋa ne, kakafe ghə n'yɛ.

¹⁹Kwa nza ŋkɛ ŋa Mahwətə geləa ɓəmə, ŋa Shala nya kaganda ta Israyɛl meghea ɓəmə.

²⁰Ma te kwete və ne, nahe na kencɛte nda ghəa ŋa ke mbelia ŋa. Ma pa na gezete nda ke hɛ: «Nahe 'ya kekemanakɛ katsala za, nahe 'ya kevate zləvə te mempɛhweta ta mbelia ɗa.

²¹Nahe 'ya kentave David kande mene slene ta ɗa, nahe 'ya kefikɛ ŋkɛ le n'yia ɗa keve ŋkwa tekeleke.

²²Gheŋkɛ yatetawe dzeve ta ɗa ba'a yateve nda berete mɓəa ɗa.

²³Katepesle nde jaga yitea cɛha ŋkɛ we, katepesle nde fama ghena yitea ve hawe te we.

²⁴Katencɛhwe ka jaga ta ŋkɛ 'ya kwa ntsə ta ŋkɛ, kateɗa mbeli nyi keɗema ntsə ta ŋkɛ 'ya.

²⁵Katenza ganyɛa ɗa ba'a ɗe ta ɗa vare gheŋkɛ, katenza ŋkɛ kakatsala te zlaɓa ta ɗa.

²⁶Kateve ndərə 'ya mbe dzeve ta ŋkɛ, katenza yɛ hələ mbe dzeve kwa zeme ta ŋkɛ.

²⁷Ma ke sha teheka ɗa: Gha ya kaYiteyɛ ɗa, gha ya kaShala ta ɗa, gela nya kembele ɗa.

²⁸Ma 'ya ne, katezhɛre ŋkɛ 'ya katezhɛa wəzege ta ɗa, kameghe nya wəba ma hwa ka meghea kɛfi nyi te hɛɗi lema.

²⁹Katewəmbə nda ɗe ta ɗa 'ya kaghala ghala, fəyitekeghə tenza jikə geva ta ɗa laka gheŋkɛ.

³⁰Kateve hwelefe ta ŋkɛ 'ya kaghala ghala, katetemə pasla ta ŋkɛ kala temə ta ghweme.

³¹Ma kewəfəyite wəsə mahalegəa ɗa ŋwalea ŋkɛ, keɓelama wəshi nyi gezete 'ya hɛ,

³²kedzawanji hɛ wəmbəa ghena nyi gezete 'ya ba'a keyatema ghena nyi tarete 'ya hɛ ne,

³³kateɗa hɛ 'ya le geta va fama ghena ta nci, kate'yɛ hɛ 'ya le ghweɗa va fete ta nci.

³⁴Ama katekele ganyɛa ɗa 'ya va hɛ we, katedzawa ɗa 'ya wəmbəa meɗe mɛa ɗa we.

³⁵Katepele jikə geva ta ɗa 'ya we, kazhɛre ghena nya kesame kwa mɛa ɗa 'ya we.

³⁶Fəyitekeghə ne, ma 'ya gezete laka nza ta ɗa tekeleke: katesla nda tseŋwə 'ya ke David tɛape we.

³⁷Kaghala ghala tenza hwelefe ta ŋkɛ, kwa kema ta ɗa tenza pasla ta ŋkɛ kala temə ta veci,

³⁸kala temə ta tere tetemə ŋkɛ kaghala ghala, gheŋkɛ nya kande negha fete ganyɛ nya kənəa ləmbə.» Zhɛne mpi.

³⁹Ndagwara nahe na keneghamte meghea nya ntave na, nahe na keɓelama ŋkɛ, nahe wənəa ŋa kehwepe ve.

⁴⁰Nahe na kenehemte jikə geva le nde mene slene ta ŋa, nahe na keneghahwe derə meghea ŋkɛ hwa hɛɗi ba'a kedevələmte ŋkɛ.

⁴¹Nahe na keŋeŋate ŋkwa te pɛtɛa zlia ŋkɛ, nahe na keŋzlamte ghɛa ŋkɛ nyi berete berete.

⁴²Pɛtɛa ka dzeghwa kefəhwe wəshia ŋkɛ, nahe ŋkɛ kezhɛre kawəsə keŋ'wəshi ta ka ghedəkwəa ŋkɛ.

⁴³Nahe na kendeke nda hərə ŋkwa ke ka jaga ta ŋkɛ, nahe na kendeke nda zlama ke pɛtɛa ka ghema ta ŋkɛ.

⁴⁴Nahe na kezhɛnaghe wəshi kempa ta ŋkɛ kənə, kese na katawe ŋkɛ hwa mpa we.

⁴⁵Nahe na kezamte sebe te zləvəa ŋkɛ, nahe na ketsəkwəyi pasla ta ŋkɛ te hɛɗi.

⁴⁶Nahe na kehalemte ŋkɛ kahe kahe, nahe na kepəliave nda hawe. Zhɛne mpi.

⁴⁷Pa te nyama və tewəfərə na kevə kevə wa Mahwətə? Kaghala ghala tetse hwepe ta wənəa ŋa kala ghwə na?

⁴⁸Zəzəte temə ta nza ta ɗa teghweme gi! Gha pate mbeli kezha za sebe te hɛ na?

⁴⁹Kanzanyɛ wəndə teghweme kaɗema kamte na? Kambelenyɛ wəndə va dzawa ghɛa mbelia kwahɛɗi na? Zhɛne mpi.

⁵⁰Shala yawe, tema lənji wəshi ganjia ŋa nyi vəashi wa? Tema wəshi nyi meɗeyi nda na ke David laka ganyɛa ŋa wa?

⁵¹Shala yawe, zəzəte ka mene slene ta ŋa nyi ŋ'wəshi mbeli, pɛtɛa mbeli nyi te dzeve nyi va 'ya.

⁵²Mahwətə yawe, nahe ka jaga ta ŋa keŋelekɛ meghe nya ntave na, nahe hɛ kentifəyi ndɛghwɛɗɛ kwa yɛ ŋkeɗe ta seɗa ta ŋkɛ.

⁵³Tsa nda mə hana ke Mahwətə kaghala ghala! Amɛn, Amɛn!