Read KapsikiDC Cimə 90 Bible Online

Cimə 90 - KapsikiDC bible

Cimə 90

¹Səkwə ta Moyize nya kawəndəa Shala. Shala, gha nde se kaŋkwa kewəfərə ta n'yɛ keshi keshi.

²Ma tewə yɛ ghweme kepate geva ba'a hɛɗi lema kencake geva ne, gha ya kaShala se vəashi ba'a kaghala ghala.

³Kazhɛne mbeli na kadzembe hɛɗi, kwa nza ŋkɛ ma pa na gezete: «Mbeli, zhɛne mə geva kadzembe.»

⁴Kwa nza ŋkɛ nahe va slibə sha gha kenza kala hɛ nya mbeɗa, hɛ nya kekiɗinyɛ, kala və ɓɛhwɛ heviɗi.

⁵Kakele mpia wəndə ŋelɛ na. Kakiɗi ŋkɛ kala hɛ nya masheke, kala gwəzə nya kepese.

⁶Ma masheke ne, kabete ghwə ŋkɛ, kakele ŋkɛ. Ma hetɛhwɛɗi ne, katiwɛɗi ŋkɛ, kaghwele ŋkɛ.

⁷Kaganda ne, kampə n'yɛ hwepe wənəa ŋa, kaghazlənə n'yɛ va beze ta wənəa ŋa.

⁸Kave fete nyi mene n'yɛ na kwa kema ta ŋa, kaɓele waŋea ŋa kənəa wəshi nyi wəfərəakɛ n'yɛ.

⁹Kaganda ne, kakiɗi pɛtɛa hɛa n'yɛ va hwepe wənəa ŋa, kakiɗi yɛ va ta n'yɛ kala gafe.

¹⁰Va mberefaŋemsə nza temə ta n'yɛ teghweme, va deghesemsə kaŋa mbeli nyi ɓereja ɓereja ma, ama deke yaka ba'a titikwə yasa n'yɛ. Kakiɗi yɛ va kahe kahe, tagha gɛ, kazlə ghen'yɛ kalə sha mte.

¹¹Wa nde ɗepe berete ta hwepe ta wənəa ŋa wa? Kewəbanyɛ ŋkɛ kala hawe ta n'yɛ va gha.

¹²Tekete n'yɛ ɓela hɛa n'yɛ megela. Tagha gɛ, katenza n'yɛ kentsehwele ntsehwele.

¹³Pa te nyama və tetemə hwepe wənəa ŋa wa Mahwətə? Zhɛre geva laka ghen'yɛ, zhɛ heli yitea ghen'yɛ ka mene slene ta ŋa gi!

¹⁴Kiɗima ta ŋkwa ne, behe n'yɛ le ganyɛa ŋa. Tagha gɛ, katetsa gaghwe ghen'yɛ mbe pɛtɛa hɛa n'yɛ.

¹⁵Kava kwele kwele ne, nahe na kevate ɗa te ghen'yɛ, nahe n'yɛ keɗepete yɛ va ta ndiremi. Ma tsetsenya ne, zhɛrete va shɛhɛ kava ta zeɗe nza.

¹⁶Nakɛ slene ta ŋa ka mene slene ta ŋa, nakɛ zləvəa ŋa hwelefefia nci!

¹⁷Mahwətə Shala ta n'yɛ, veyi ganyɛa ŋa kənəa ghen'yɛ! Mbakete nda berete ke slene nyi mene dzeve ta n'yɛ. Kaganda ne, mbakete nda berete ke slene nyi mene dzeve ta n'yɛ.