Read KapsikiDC Cimə 96 Bible Online

Cimə 96 - KapsikiDC bible

Cimə 96

¹Gha nda mə cimə mɛnɛfɛ ke Mahwətə, gha nda mə cimə ke Mahwətə, gheyɛ mbeli nyi te hɛɗi lema.

²Gha nda mə cimə ke Mahwətə, tsahe mə ŋkɛ, zlape mə mbele ŋkwa ta ŋkɛ keveci keveci.

³Geze nda mə zləvəa ŋkɛ ke hwelefefi, wəshi meŋelea ŋkɛ ke pɛtɛa mbeli.

⁴Kwa nza ŋkɛ ne, Mahwətə ya wəba, gheŋkɛ yahi mbeli katsahe, ghazlənə ma mbeli ve ke pɛtɛa kweci shala.

⁵Nahe pɛtɛa yɛ shala ta kweci mbeli kenza gəmə, ama nahe Mahwətə kepate ghweme.

⁶Dzasle ŋkɛ kwa waŋe ba'a zləvə, berete ba'a kwele ya mbe ghɛa ŋkɛ.

⁷Gheyɛ hwelefefi nyi te hɛɗi lema, tsahe mə Mahwətə, ve nda mə zləvə ba'a kwele ke Mahwətə.

⁸Ɗepete mə zləvə nya te sləa Mahwətə. Fə mə wəshi kase, dzete mə yɛ ŋwela ta ghɛa ŋkɛ.

⁹Gwəɗəŋə mə ntiŋə ghə mbe hɛɗi mbe kema ta Mahwətə, vəa ŋkwa nya ncɛ ghəa ŋkɛ ŋkɛ kaShala. Mbeli nyi te hɛɗi lema, bare bare mə mbe kema ta ŋkɛ.

¹⁰Ma pe yɛ sha pɛtɛa hwelefefi: «Mahwətə ya kameghe. Kaganda ne, ntɛaŋe ntɛaŋe nza hɛɗi, kagaŋkəɗə ŋkɛ we. Kameha ghwə nya tiɗiɗi ŋkɛ te mbeli.»

¹¹Zlama ghweme, nza hɛɗi fare fare, gaŋkeɓe yɛ ndərə le wəshi nyi kwa.

¹²Nza yɛ gamba mbe gəsəkə le wəshi nyi mbe, tsa gaghwe pɛtɛa wəfe nyi mbe ghɛa wəfe

¹³kwa kema ta Mahwətə, kwa nza ŋkɛ se yase ŋkɛ, kwa nza ŋkɛ se yase ŋkɛ kameha ghwə te hɛɗi. Katemeha ghwə nya tiɗiɗi ŋkɛ te hɛɗi lema, katemeha ghwə ŋkɛ te mbeli laka kaganda.