Read KapsikiDC Yɛ Ghena Ŋela 12 Bible Online

Yɛ Ghena Ŋela 12 - KapsikiDC bible

Yɛ Ghena Ŋela 12

¹Ma wəndə nya keyɛ ŋele ne, ɗepe wəsə yaɗe ŋkɛ. Ma wəndə nya kenehwene va ghena ne, gezhi ŋkɛ.

²Kazlama Mahwətə yitea wəndə nya kemene ganyɛ, ama kave ɗa ŋkɛ te wəndə nya kezəzə wəsə kwa ndiremi.

³Wəndə shɛ kamtsehete nda berete ke ghəa ŋkɛ le 'yaghwa mehele we, wəsə shɛ kateɗemte wəndə nya tiɗiɗi we.

⁴Ma male nya nza zləvə te ne, zləvəa za nta nde. Ama male nya kemene wəsə hawe ne, zhi nya mbe 'yɛ'yɛa ŋkɛ nde.

⁵Ma mbeli nyi tiɗiɗi ne, hawe yahawe hɛ va wəsə nya kehi. Ama ka 'yaghwa mehele ne, mene mbəɗəkwə yazəzə hɛ.

⁶Ma ghena ta ka 'yaghwa mehele ne, keleŋa nyi kempə ŋkwa hɛ. Ama ghena ta mbeli nyi tiɗiɗi ne, ŋkwa yambele hɛ va mte.

⁷Ma kezamte geva ka 'yaghwa mehele ne, sebe shɛ katene te hɛ we. Ama mbeli nyi ki ghɛa mbeli nyi tiɗiɗi ne, yitea ghweme tenza hɛ.

⁸Katsahe wəndə nya ganyɛa mehele mbeli, ama kaɓela nde dewə mehele mbeli we.

⁹Ganyɛ ma nza kawəndə nya ɗema zləvə te ba'a nya nza nde mene slene kwetɛŋe ve ke wəndə nya kekele ghəa ŋkɛ kaɗema wəsə kezeme ve.

¹⁰Kanewe ghweme wəndə nya tiɗiɗi te wəshi keseɗa ta ŋkɛ, ama ka 'yaghwa mehele ne, zhɛ heli shɛ va hɛ we.

¹¹Ma wəndə nya kewəza wəvea ŋkɛ ne, behe tenza ŋkɛ va wəshi kezeme. Ama wəndə nya kewəza wəshia kwadanji ne, nde dewə zəzə ŋkɛ.

¹²Ma ka 'yaghwa mehele ne, wəshi mbəɗəkwə yamawe hɛ. Ama ntsə geva ta mbeli nyi tiɗiɗi ne, zhɛme ya mbe.

¹³Ma wəndə nya ndiremia mehele ne, katekese ŋkɛ keleŋa ta tseŋwəa ŋkɛ. Ama wəndə nya tiɗiɗi ne, pələsə tenza ŋkɛ va ndiremi.

¹⁴Wərə wəndə kakemave ganyɛ laka ghena nyi geze ŋkɛ, kala nya kema zhɛme wəndə te slene nya mene ŋkɛ.

¹⁵Ma zəzə nde dewə mehele ne, wəsə nya tiɗiɗi yamene ŋkɛ keveci keveci. Ama wəndə nya kentsehwele ntsehwele ne, kafa ntsehwele nyi ncɛ nda mbeli ŋkɛ.

¹⁶Ma nde dewə mehele ne, te ŋkwa shɛnyɛ ncɛ hwepe wənəa ŋkɛ ŋkɛ. Ama wəndə nya nza mehele ve ne, kanda ghena ŋkɛ.

¹⁷Ma wəndə nya kegeze kaganda ne, wəsə nya tiɗiɗi yamene ŋkɛ. Ama nde negha fete tseŋwə ne, mene fete yamtsehe ŋkɛ.

¹⁸Ma wəndə nya ketseha mɛ gəmə ne, kala kafayɛ tsasle ŋkwa ŋkɛ. Ama ghena ta ka ntsehwele ntsehwele ne, kambe ŋkwa hɛ.

¹⁹Ma wəndə nya kegeze kaganda ne, kaghala ghala nza ŋkɛ. Ama wəndə nya kesla tseŋwə ne, kavə ɓɛhwɛ temə ŋkɛ.

²⁰Ma mbeli nyi kezəzə wəshi nyi ndiremi ndiremi ne, viɗi wənəa nci va wəshi nyi ndiremi ndiremi. Ama ka ncɛ nda ghena ta kwelɛŋe ke mbeli ne, viɗi wənəa nci va zlama.

²¹Wəsə kwa ndiremi shɛ kame te wəndə nya tiɗiɗi we, ama kwele kwele yaka te ka 'yaghwa mehele.

²²Kaɗe ntsə ta mbeli nyi kesla tseŋwə Mahwətə we, ama mbeli nyi kegeze kaganda yaɗe ŋkɛ.

²³Ma wəndə nya nza mehele ve ne, kawəfərə wəsə nya ɗepe ŋkɛ ŋkɛ. Ama wənəa ka dewə mehele ne, ghena gezhia nci yancɛ hɛ.

²⁴Ma dzeve nyi kemene slene tsape ne, katesleke ŋkwa hɛ. Ama dzeve nyi kemeɗə ne, kaka mavashi ve ŋkwa hɛ.

²⁵Ma kenza ghena kwa wənə va wəndə ne, keyirə yirə nza mehele ta ŋkɛ. Ama kenza ghena ganyɛ shɛ ne, kagweɗakwe ŋkɛ.

²⁶Ma wəndə nya tiɗiɗi ne, hweŋkwa ganyɛ yancɛ nda ŋkɛ ke wəndə. Ama ka 'yaghwa mehele ne, hweŋkwa ta nci nde za hɛ.

²⁷Ma nde zlɛaŋezlɛa nya kemeɗə ne, kanza sli ve kezha ta we. Ama wəndə nya kemene slene ne, wəsə nya nza zləvə te ya ve.

²⁸Ma kwa hweŋkwa ta wəsə nya tiɗiɗi ne, mpi ya shɛ. Ma kenza wəndə kadzeghwa kwa hweŋkwa shɛ ne, kamte ŋkɛ we.