Read KapsikiDC Yɛ Ghena Ŋela 15 Bible Online

Yɛ Ghena Ŋela 15 - KapsikiDC bible

Yɛ Ghena Ŋela 15

¹Ma zhɛne ghena nya le mehele ne, kagweɗakwe hwepe wənə nde. Ama ghena nya kezhɛ ŋkwa ne, hwepe ta wənə yamtsehe nde.

²Ma kenza nde ntsehwele ntsehwele kageze ghena ne, zeɗekə nza nde kafa. Ama kenza gezhi kaghwene mɛ ne, deke ghena gezhi nde same kwa.

³Pa tema tema newe ŋkwa ntsə ta Mahwətə. Kanewe mbeli nyi 'yaghwa mehele ba'a nyi ganji ŋkɛ.

⁴Ma ghena nya kemtsehe nda berete ke wəndə ne, wəfe ta mpi ŋkɛ. Ama ghena nya ndiremi ne, mehele yataze ŋkɛ.

⁵Ma wəzege nya kagezhi ne, kaɓela ghena ta yitenyɛ ŋkɛ we. Ama wəndə nya keyɛ ŋele ne, wəndə nya nza mehele ve ŋkɛ.

⁶Ma wəndə nya tiɗiɗi ne, kwele kwele nza wəshi ki ghɛa ŋkɛ. Ma wəshia ka 'yaghwa mehele ne, ndiremi yakele hɛ kase.

⁷Ma ghena nyi geze ka ntsehwele ntsehwele ne, ɗepe wəsə ya mbe. Ama ghəa ka gezhia kɛfi ne, gəmə ŋkɛ.

⁸Kaɗe melɛ nyi dzeghekɛ ka 'yaghwa mehele Mahwətə we. Ama səkwə ta mbeli nyi tiɗiɗi yaɗe ŋkɛ.

⁹Kaɗe dzeghwa ta ka 'yaghwa mehele Mahwətə we. Ama wəndə nya kemene wəsə nya tiɗiɗi yaɗe ŋkɛ.

¹⁰Ma wəndə nya kewəfəyite hweŋkwa ganyɛ ne, kateme ɗa nya dzawe te. Ma wəndə nya keɗema ŋele ne, katemte ŋkɛ.

¹¹Ma zeweve ta wəsə nya kemene geva kwa ghɛa mbelia kwahɛɗi ne, nahe Mahwətə keɗepete. Tsema kaŋa wənəa wəndə ŋelɛ tsagha gɛ!

¹²Kaɗe ŋele nde kele ghə we. Kalə ŋkɛ sha ka ntsehwele ntsehwele we.

¹³Ma fare fare wənə ne, megela nza kema. Ama mbe yaka ne, keyirə yirə nza mehele.

¹⁴Ma wəndə nya nza mehele ve ne, teke wəshi yazele ŋkɛ. Ama nde dewə mehele ne, ghena gezhi nde dzawa mɛa ŋkɛ.

¹⁵Ma nde titikwə ne, keveci keveci nza ŋkɛ mbe yaka. Ama wəndə nya nza zlama ve ne, kaghala ghala nza ŋkɛ mbe gəsəkə.

¹⁶Megela ma nza le wəshi ɓɛhwɛ mbe hawe va Mahwətə ke nza le wəshi kwele kwele mbe nza keyirə yirə.

¹⁷Megela ma zeme nɗeli sleke mbe ɗe ke zeme slia mɛare mbe zlɛ.

¹⁸Ma wəndə nya wəba wənə hwe ne, ghəpə yakele ŋkɛ kase. Ama wəndə nya kezereghe ghena ne, zhɛne ghə yagweɗakwe ŋkɛ.

¹⁹Tigə ya dzeyi kwa hweŋkwa ta nde meɗə. Ama ketsale tsale hweŋkwa ta mbeli nyi tiɗiɗi.

²⁰Zlama yave nda wəzege nya kentsehwele ntsehwele ke yitenyɛ. Ama kaɓela meghekɛ wəzege nya kande dewə mehele we.

²¹Ma wəndə nya dewə mehele ve ne, slene gezhi yazlama ŋkɛ yite. Ama wəndə nya nza zəzə ve ne, hweŋkwa nya tiɗiɗi yadzeghwa ŋkɛ kwa.

²²Ma keɗema mbeli ka'yɛwe ntsehwele ne, kajive slene te kema we. Ama kenza ka ncɛ ntsehwele shɛ kwele kwele ne, katemene geva ŋkɛ.

²³Megela ŋkɛ keɗepete zhɛne ghena wəndə megela. Wəsə nya ganyɛ ŋkɛ kegezete geva ghena te vəa ŋkɛ.

²⁴Ma wəndə nya nza mehele ve ne, hweŋkwa nya kedzeme sha mpi yanza ŋkɛ kwa. Nahe ŋkɛ keyate ghə va nya kedzawa sha mte.

²⁵Kaŋzla ghɛa ka kele ghə Mahwətə. Ama kaya wəvea male wede ŋkɛ.

²⁶Kaɗe zəzə nyi ndiremi ndiremi Mahwətə we. Ama ghena ganji yazeɗehwe nda.

²⁷Ma wəndə nya keɗe cɛdɛ mbəɗəkwə ne, ndiremi yakele ŋkɛ kadzeki ghɛa ŋkɛ. Ama wəndə nya keɗema wəshi mbəɗəkwə ne, katetemə ŋkɛ teghweme.

²⁸Ma nde ntsehwele ntsehwele ne, kazəzə ŋkɛ nda tezhɛne ghena ŋkɛ. Ama ka 'yaghwa mehele ne, ghena nyi ndiremi ndiremi yavənəhwe hɛ.

²⁹Patsahe ŋkwa kwelɛ yɛ Mahwətə le ka 'yaghwa mehele. Ama kafa səkwə ta mbeli nyi tiɗiɗi ŋkɛ.

³⁰Ma newe ŋkwa nya ganyɛ ne, kave nda zlama nde ke wənə. Ma ghena mɛnɛfɛ nya ganyɛ ne, kamtsehe nda berete nde ke geva.

³¹Ma wəndə nya keve sleme yitea ŋele nyi kembele ŋkwa ne, hwa mbeli nyi kentsehwele ntsehwele tenza ŋkɛ.

³²Ma wəndə nya keɗema ŋele ne, ghəa ŋkɛ yaɓelama ŋkɛ. Ama wəndə nya keve sleme yitea ŋele ne, kateteke zəzə ghena ŋkɛ.

³³Ma hawe va Mahwətə ne, gheŋkɛ ya kateke ntsehwele. Ma nda nza wəndə kakemave zləvə ne, nda ŋkɛ kashifəmte ghəa ŋkɛ.