Read KapsikiDC Yɛ Ghena Ŋela 18 Bible Online

Yɛ Ghena Ŋela 18 - KapsikiDC bible

Yɛ Ghena Ŋela 18

¹Zəzə ta ŋkɛ yazele wəndə nya keɗe ghəa ŋkɛ. Kayɛ ghena nyi geze nda mbeli ŋkɛ we.

²Ɗepe wəsə yamawe nde dewə mehele we, ama geze wəsə nya zəzə ŋkɛ.

³Ɓelama ŋkwa yakele 'yaghwa mehele kase. Hawe yakele yiɗə ŋkwa kase.

⁴Kala yɛmə nyi nza ŋkwəɗə yite ghena nyi geze mbeli, kala hələ nya viɗi ŋkwa nya se ntsehwele te.

⁵Megela ŋkɛ kakemane nde 'yaghwa mehele laka ŋkeɗe wəndə nya tiɗiɗi te ghwə we.

⁶Ghəpə yakele ghena ta nde dewə mehele kase, ɗa yakele ghɛnia ŋkɛ kase.

⁷Mɛa nde dewə mehele ya kaza ta ŋkɛ, ghena nyi geze ŋkɛ ya kakeleŋa nya yite.

⁸Kala wəsə kezeme ganyɛ ghena ta nde ŋwashɛ ŋwashɛ, hwa'a kwa mendɛkwe ta heli dzawa ŋkɛ.

⁹Ma wəndə nya kepeleyite se yitea slene ta ŋkɛ ne, wəza meghekɛa nde beze ŋkwa ŋkɛ.

¹⁰Ŋkwa nya nza zli nya berete yite sləa Mahwətə. Ma wəndə nya tiɗiɗi nya kehwɛnyɛ kadzete ne, gwezlayɛ tenza ŋkɛ.

¹¹Meleme nya nza zli yite mcɛləa nde mcɛlə. Kazli nya biya newe ŋkɛ.

¹²Kadzete teɗe beghe wəndə kele ghə. Ma nda tese zləvə ne, shifə ghə ya shɛ.

¹³Ma wəndə nya kezhɛne ghena tewə ŋkɛ kefave ne, gezhia ŋkɛ yancɛ ŋkɛ ba'a hawe yave ŋkɛ te ghəa ŋkɛ.

¹⁴Kave nda berete mehele ta ŋkɛ ke wəndə mbe zereghwe. Ama kenza mehele ta ŋkɛ keyirə yirə ne, wa nde kese ŋkɛ sate te ŋkwa wa?

¹⁵Ma wəndə nya kezəzə ghena ne, katekemave ɗepe wəsə ŋkɛ. Ma wəndə nya kentsehwele ntsehwele ne, ghena ganji yaɗe ŋkɛ kafa.

¹⁶Kaghwene nda mɛ degha wəshi gəməa ŋkɛ ke wəndə, kakele ŋkɛ hɛ kalə sha mbeli nyi nza zləvə te hɛ.

¹⁷Ma wəndə nya keghate kagezete ghena te ghwə ne, kaganda ya ve newe mbeli. Ama kese nde ghema ta ŋkɛ ne, katezhɛne nda ghə ŋkɛ.

¹⁸Kakiɗi ghəpə kwasheghediɗi, kasla fete ŋkɛ kwelɛ mbeli nyi berete berete.

¹⁹Za ma dzembe meleme nya nza zli yite ke lə sha menə nya beze wənəa ŋkɛ. Kala nya ŋzle geva degha ta meghe le wəsə keŋzle ŋzle geva wənə va ghəpə.

²⁰Wərə kwete wəndə kaŋ'we wəsə kezeme ta ŋkɛ laka ghena nyi geze ŋkɛ. Mɛa ŋkɛ nde kele nda wəshi nyi zeme ŋkɛ behe behe kase.

²¹Wərə mte keɗema mpi kase mbe ghena. Ma wəndə nya keɗe geze ghena ne, katefa ghwene nya mbe ŋkɛ.

²²Zeɗe nza yakemave wəndə nya kekemave male. Wəsə ganyɛ yaŋ'wete ŋkɛ va Mahwətə.

²³Le gwedə geze ghena nde titikwə, ama le berete zhɛne ghena nde mcɛlə.

²⁴Kwele kwele ka mcɛhɛ nyi keve ndiremi te wəndə. Ama mcɛ ganyɛ ne, za ma ŋkɛ ke wəza ma.