Read KapsikiDC Yɛ Ghena Ŋela 19 Bible Online

Yɛ Ghena Ŋela 19 - KapsikiDC bible

Yɛ Ghena Ŋela 19

¹Megela ma nza kande titikwə nya nza kaganda ve ke nza kande tseŋwə ba'a kande dewə mehele.

²Wəsə ganyɛ dewə zəzə we, kaɗema wəndə nya kekeci keci kamenete fete we.

³Kabeze nda dzeghwa ta ŋkɛ dewə mehele ke wəndə, ama va Mahwətə hwepe wənə ŋkɛ.

⁴Kamtsehe ka mcɛhɛ mcɛlə, ama kanehe geva nde titikwə le mcɛnyɛ nya kwetɛŋe.

⁵Kateɗema ɗa kateme te nde negha fete tseŋwə we, katembele wəndə nya kesla tseŋwə we.

⁶Kwele kwele mbeli nyi keghwete mbeli nyi nza zləvə te, yayata wəndə kamcɛnyɛa wəndə nya kevele wəshi gəmə.

⁷Pɛtɛa ka menəhɛnyɛ kaɗema ntsə ta nde titikwə, za ma ke nyagha wesle geva ka mcɛhɛnyɛ ve. Ma mba ŋkɛ kageze ghena ne, mbanji hɛ tagha we.

⁸Ghəa ŋkɛ yaɗe wəndə nya keteke zəzə ghena. Katekemave zeɗe nza wəndə nya kendeke nda ghə.

⁹Kateɗema ɗa kateme te nde negha fete tseŋwə we. Ma wəndə nya kesla tseŋwə ne, ghəa ŋkɛ yaza ŋkɛ.

¹⁰Kehi kanza nde dewə mehele mbe zeɗe nza we, tsagha kaŋa mava kasleke mbeli nyi te ghə.

¹¹Kazereghe ghena wəndə nya nza mehele ve, ghena nya kele ŋkɛ seyi te wənə ya kazləvəa ŋkɛ.

¹²Kala ghwəghwə ta nivɛrə hwepe wənə ta meghe, ama kala mɛnɛ te gwəzə ganyɛa mehele ta ŋkɛ.

¹³Ndiremi nya te yitenyɛ wəzege nya dewə nda mehele. Kala yɛmə nya ketɛtɛakwe male nya keghəpə.

¹⁴Wərə wəndə kazehwe ghɛ yitea ghɛ ba'a wəshia ka shihɛnyɛ, ama deke Mahwətə nde ve nda male nya nza mehele ve ke wəndə.

¹⁵Hɛ yave nda meɗə ke wəndə, kazhɛ nda ma ke wəndə nya kemenema slene.

¹⁶Ghəa ŋkɛ yaya wəndə nya kehawe va wəshi nyi kegezete geva. Katemte wəndə nya kepele se yitea dzeghwa ta ŋkɛ.

¹⁷Ma wəndə nya kezhɛ heli yitea nde titikwə ne, wəsə yandeke nda ŋkɛ ke Mahwətə. Katezhɛne nda wəsəa shɛ ŋkɛ.

¹⁸'Yɛ ŋwalea ŋa vəa ŋkwa nya nza na wərə ka'yɛte hɛ, ama ɗa ma hɛ na le wənə le wənə kamte ma.

¹⁹Kateŋki wəsə wəndə nya wəba wənə hwe. Ma kesərəakɛ ŋkɛ na ne, berete yamtsehe nda na.

²⁰Fa ghena nyi geze ŋa mbeli, yɛte wəshi nyi teke ŋa mbeli, tsagha ne, katenza na kande ntsehwele ntsehwele.

²¹Kwele kwele zəzə nyi kwa wənəa wəndə ŋelɛ, ama deke ɗe ta Mahwətə nde mene geva.

²²Ganyɛa mehele ya kawəsə nya neghe mbeli va wəndə. Megela ma nza kande titikwə ke nza kande tseŋwə.

²³Kakele ŋkwa hawe va Mahwətə kalə sha mpi, kanza wəndə mbe zeɗe nza, kaɗema ndiremi kakwaɗe ŋkɛ.

²⁴Kaha dzeve nde meɗə kadzawa mentsehe, ama kazhɛne ŋkɛ same kadzawa mɛ we.

²⁵Ma kaɗa nde kele ghə na ne, kave nda ntsehwele ŋkɛ ke gezhi. Ma kaŋele nde ɗepe wəsə na ne, katekemave ntsehwele ŋkɛ.

²⁶Ma wəndə nya kemene berete te yitenyɛ ba'a nya kekeka meghekɛ ne, wəzege nya keve hawe ba'a nya kekele zləvə te mbeli ŋkɛ.

²⁷Wəzege ta ɗa, ma kenza ŋa na kefa ghena nyi kegeze geva ne, wəsə shɛ katezhɛne na katekeve we.

²⁸Wəsə nya tiɗiɗi yaŋ'wəshi nde negha fete nya ndiremia mehele. Wəsə kwa ndiremi yaɗe ka 'yaghwa mehele kageze.

²⁹Ɗa yaneghe ka ŋ'wəshi ŋkwa, ghweɗa yaneghe ka dewə mehele.