Read KapsikiDC Yɛ Ghena Ŋela 2 Bible Online

Yɛ Ghena Ŋela 2 - KapsikiDC bible

Yɛ Ghena Ŋela 2

¹Wəzege ta ɗa, yɛte ghena nyi geze ŋa 'ya, keseyi wəshi nyi geze ŋa 'ya mbe ghə.

²Veyite sleme megela yitea ghena ntsehwele, zele kezha fave ghena shɛ.

³Kaganda ne, 'yɛwe va mehele kezha kemane ŋa, heka ɗepe ghena kezha kemane ŋa.

⁴Zele ŋkɛ kala nya zele cɛdɛ mbeli, zele ŋkɛ kala nya zele mcɛlə nya tewəfərə mbeli.

⁵Ma tsagha gɛ, katefave hawe va Mahwətə na, katekemave ɗepe Shala na.

⁶Kaganda ne, Mahwətə nde ve nda ntsehwele ke wəndə, ve se ɗepe wəshi ba'a ɗepe ghena.

⁷Kakemane mbeli nyi tiɗiɗi ŋkɛ. Kala gelə ya mbeli nyi kedzeghwa le hweŋkwa ta ŋkɛ ŋkɛ.

⁸Kaya mbeli nyi kedzeghwa tiɗiɗi ŋkɛ, kaya mbeli nyi kendeke nda ghəa nci ŋkɛ.

⁹Ma tsagha gɛ, katefave nza nya tiɗiɗi, nya le hweŋkwa ta ŋkɛ ba'a nya kaganda na. Ghenci ya kahweŋkwa kedzembe zeɗe nza.

¹⁰Katedzawa wənəa ŋa ntsehwele, kateve ŋa zlama ɗepe wəsə.

¹¹Kateya ŋa zəzə ghena va mene fete, katenewe ghweme ɗepe ghena te gha.

¹²Katefɛa ŋa hɛ yitea mene wəsə kwa ndiremi, katehende ŋa hɛ seyi yitea mbeli nyi kesla tseŋwə,

¹³seyi yitea mbeli nyi kesərə hweŋkwa nya tiɗiɗi kezha dzeghwa kwa hweŋkwa nyi nza ŋkwesle.

¹⁴Mene wəsə kwa ndiremi yazlama hɛ yite, 'yaghwa mehele yanza hɛ fare fare yite.

¹⁵Nahe dzeghwa ta nci kenza mendale mendale, hweŋkwa ta nci kenza mewətəli mewətəli.

¹⁶Tsagha ne, kateya ghəa ŋa na va male ta wəndə, va mentiɓəa male nya nza ghena nyi keghwete ŋkwa ve.

¹⁷Nahe nde kewəfəyite za makwa ta nta, tagha ne, nahe nde kezaghəyite jikə geva ta nta le Shala.

¹⁸Kele yakele ŋkɛ nza ta nta kalə sha mte, kadzawa sha mbelia kwahɛɗi kele ŋkɛ dzeghwa ta nta.

¹⁹Ma yayata wəndə nya kedzeki ghɛa nta ne, kazhɛneke geva ŋkɛ we kasləyi hweŋkwa ta mpi ŋkɛ we.

²⁰Tsagha gɛ ne, ntave dzeghwa ta mbeli ganji, tekeve nza ta mbeli nyi tiɗiɗi.

²¹Kwa nza ŋkɛ ne, katenza mbeli nyi tiɗiɗi te hɛɗi, katenza mbeli ganji te.

²²Ama katefəmte geva ka 'yaghwa mehele te hɛɗi, kateŋkamte geva ka mbəɗəkwə seyi te.