Read KapsikiDC Yɛ Ghena Ŋela 21 Bible Online

Yɛ Ghena Ŋela 21 - KapsikiDC bible

Yɛ Ghena Ŋela 21

¹Hələ nya mbe dzeve ta Mahwətə wənəa meghe, kakele ŋkɛ dzeyi te yayata ŋkwa nya ɗe ŋkɛ.

²Yayata wəndə kazəzə tiɗiɗi dzeghwa ta ŋkɛ, ama Mahwətə nde ɗepe ŋkwa nya kwa wənə.

³Ma dzeghwa tiɗiɗi ba'a mene kaganda ne, za ma hɛ ke melɛ sha Mahwətə.

⁴Ma newe ŋkwa seyi yitea ntsə ba'a wənə nya kekele ghə ne, ghenci ya kajaɗafa ta ka 'yaghwa mehele.

⁵Katezhɛre wəndə nya kezəzə yɛ slene kande mcɛlə. Ama kande titikwə tenza wəndə nya kewədə geva.

⁶Ma mcɛlə nyi kekemave geva laka tseŋwə ne, wəshia kwadanji nyi keteteməma ta ka zele mte hɛ.

⁷Mene berete ta nci ya kaza ta ka 'yaghwa mehele, va nya ɗema mene wəsə nya tiɗiɗi hɛ.

⁸Mendale mendale dzeghwa ta nde mene fete, ama tiɗiɗi ŋa wəndə nya nza kaganda ve.

⁹Megela ma nza mbe cɛ kwafawe ke nza mbe cɛ le male nya keghəpə.

¹⁰Wəsə kwa ndiremi yamawe nde 'yaghwa mehele, kazhɛ heli ŋkɛ ya yitea mcɛnyɛ we.

¹¹Ma kaɗa nde ŋkele ntsə mbeli ne, kaŋ'we ntsehwele nde dewə mehele. Ma kateke nda wəsə mbeli ke nde ntsehwele ntsehwele ne, kakema ɗepe wəsə ŋkɛ.

¹²Kanewe ghɛa ka 'yaghwa mehele wəndə nya tiɗiɗi, katsəkwə hɛ ŋkɛ kadzembe ndiremi.

¹³Ma wəndə nya kezhiɓə sleme va lewela ta nde titikwə ne, katekemave zhɛne ŋkɛ vəa ŋkwa nya tetsa lewela ŋkɛ we.

¹⁴Kagweɗakwe wənə wəsə gəmə nya kemenete geva tewəfərə, kalɛnɛake wənə ve nda wəsə kwa slibə ke wəndə.

¹⁵Zlama yave nda hawe va wəshi mahalegə ke wəndə nya tiɗiɗi, ama ghazlənə yave nda ŋkɛ ke nde mene wəsə kwa ndiremi.

¹⁶Ma yayata wəndə nya kesərəakɛ hweŋkwa ganyɛ ne, katelə ŋkɛ kazhɛne mpi hwa mbelia kwahɛɗi.

¹⁷Kande titikwə tenza wəndə nya keɗe ɗe ta geva. Katenza wəndə nya keɗe wəshi kesa ba'a wəshi kezeme kande mcɛlə we.

¹⁸Katesa yaka nde 'yaghwa mehele te ŋkwa wəndə nya tiɗiɗi ba'a nde mbəɗəkwə te ŋkwa mbeli ganji.

¹⁹Megela ma nza kwamte te ɓerama ke nza le male nya keghəpə ba'a nya ketaze mehele.

²⁰Wəshi nyi nza zləvə te ba'a wəshi ganji ya ki ghɛa nde ntsehwele ntsehwele. Ama wəshia ŋkɛ yaza nde dewə mehele.

²¹Ma wəndə nya kezele kaganda ba'a ganyɛ ne, katekemave mpi, tiɗiɗi ba'a zləvə ŋkɛ.

²²Wərə nde ntsehwele ntsehwele kakelehwe meleme nya nza zli yite, wərə ŋkɛ kaŋzlamte zli nya vate mehele mbeli nyi mbe te.

²³Ma wəndə nya keya mɛa ŋkɛ ba'a ghɛnia ŋkɛ ne, ghəa ŋkɛ yaya ŋkɛ va ndiremi.

²⁴Ma wəndə nya keŋkele ntsə ba'a nya kekele ghə ne, wəndə nya keɓelama ŋkwa ŋkɛ. Kele ghə nde ncɛ geva mbe pɛtɛa wəshi nyi mene ŋkɛ.

²⁵Mtiwə tenza nde meɗə va wəshi nyi mawe ŋkɛ, kwa nza ŋkɛ kaɗe dzeve ta ŋkɛ kakwaɗe slene we.

²⁶Nda wəshi yamawe ŋkɛ keveci keveci, ama waɗe dzeve ta wəndə nya tiɗiɗi.

²⁷Wəsə nya ndiremi kashasha melɛa ka 'yaghwa mehele, kwa nza ŋkɛ le zəzə nyi ndiremi ndiremi dzeghe ŋkɛ hɛ.

²⁸Kateza nde negha fete nya kesla tseŋwə, ama wəndə nya kefa ghena ne, kategeze ghena ŋkɛ shanda.

²⁹Kema yaheɗe wəndə nya 'yaghwa mehele, kantsehwele wəndə nya tiɗiɗi yitea dzeghwa ta ŋkɛ.

³⁰Nde ntsehwele ntsehwele, nde ɗepe wəsə ba'a nde zəzə ghena shɛ kwa kema ta Mahwətə we.

³¹Kapa gədəwə mbeli kezha vecia mpa, ama va Mahwətə se hərə ŋkwa.