Read KapsikiDC Yɛ Ghena Ŋela 22 Bible Online

Yɛ Ghena Ŋela 22 - KapsikiDC bible

Yɛ Ghena Ŋela 22

¹Megela ma kemave zləvə ke mcɛlə nya wəba, ganyɛ ma zlaɓa ke mze kwa tɛawetɛa ba'a mze kwa tere tere.

²Kanya kwetɛŋe yɛ nde mcɛlə le nde titikwə, kwa nza ŋkɛ Mahwətə nde pate hɛ bake nci.

³Kawəfərə nde ntsehwele ntsehwele kenakɛ ndiremi ŋkɛ kase, ama ghə yaha nda ka gezhia kɛfi nda teme ŋkɛ te hɛ.

⁴Ma zhɛme nya mbe shifə ghə ba'a hawe va Mahwətə ne, mcɛlə, zləvə ba'a temə teghweme.

⁵Yɛ tigə ba'a yɛ keleŋa ya kwa hweŋkwa ta nde mene fete. Katesame wəndə nya keɗe kaya mpia ŋkɛ kwa.

⁶Teke nda nza ganyɛ ke wəzege warakenyɛ, kateghereŋe ŋkɛ te pa mbe meha.

⁷Mbe dzeve ta ka mcɛləa kɛfi ka titikwəa kɛfi. Mava ta wəndə nya kenzəɓəave nda dewa wəndə nya nza dewa hwe.

⁸Ma wəndə nya ketsawe wəsə nya keɗema kehi ne, ndiremi yatemene ŋkɛ se te wəve, kwa nza ŋkɛ katehwəshi geta ta hwepe wənəa ŋkɛ.

⁹Kewəpi wəpi tenza wəndə nya ganyɛa mehele, va nya ɗa nda wəsə kezeme ta ŋkɛ ŋkɛ ke nde titikwə.

¹⁰Ŋkamte nde ŋkele ntsə, katekiɗi ghəpə. Katezhɛne yɛ mpa ba'a yɛ ŋele ŋkwa kanza shɛ we.

¹¹Ma wəndə nya keɗe wənə ganyɛ ba'a ghena ganyɛ ne, katenza ŋkɛ kamcɛnyɛa meghe.

¹²Kave ntsə Mahwətə te ɗepe wəsə nya kaganda, ama kaza sebe ŋkɛ te yɛ ghena ta nde sla tseŋwə.

¹³Ma ke nde meɗə sha geze: «Nivɛrə ya pelɛ. Katepesle ɗa ŋkɛ kwa hweŋkwa!»

¹⁴Ki nya lɛame ghena ta mi nyi kevale tahe. Kateteɗe wəndə nya wənənyɛ Mahwətə ve kadzawa.

¹⁵Wəshi nyi ɗema ghə te yaɗe ŋwale. Kateŋkamte hɛ ghweɗa seyi yitea hɛ.

¹⁶Ma wəndə nya kesa nda yaka ke nde titikwə ne, katezhɛre ŋkɛ kande mcɛlə. Ma wəndə nya keɗa nda wəshi ke nde mcɛlə ne, titikwə yateve ŋkɛ te ghəa ŋkɛ.

¹⁷Veyite sleme yitea yɛ ghena ta ka ntsehwele ntsehwele, ghwenemte mehele yitea ɗepe wəsə ta ɗa.

¹⁸Katezlama na kekeseyi hɛ na kwa wənəa ŋa, katenza hɛ ɗeke ɗeke kwa mɛ va gha.

¹⁹Kaɗe 'ya kavate ghə na te Mahwətə, vatse teve ŋa ɗepe wəsə 'ya ɓeshi nya.

²⁰Nahe 'ya kerafete yɛ ntsehwele ba'a yɛ zəzə gare mahekenemsə kaŋa ŋa.

²¹'Ya kateteke ŋa geze ghena tiɗiɗi ba'a ntare ntare. Kategeze nda ghena nyi kaganda na ke wəndə nya keghwene ŋa.

²²Fəma wəshia nde titikwə na va nya nza ŋkɛ kande titikwə ma. Sa nda ma yaka na ke wəndə nya keshifə ghə te ghwə ma.

²³Kwa nza ŋkɛ ne, kateya hɛ Mahwətə ba'a kateza mpia mbeli nyi kefəhwe wəshia nci ŋkɛ.

²⁴Kesema mcɛ na le wəndə nya nza wənə hwe ma, dzeghwama na le wəndə nya beze wənəa ŋkɛ kahe kahe ma.

²⁵Ma kenza ŋkɛ tsagha ne, kateteke nza ta ŋkɛ na ba'a katedzete keleŋa na.

²⁶Nzama na hwa mbeli nyi keve ghena kwa ghəa nci, nyi keve dewa ta mbeli kwa ghəa nci ma.

²⁷Ma keɗema wəsə va gha kezha ŋki ne, kezha wa tentsehe gezle mbeli seyi yitea gha wa?

²⁸Nteɗema ghala nyi vəashi, nyi mɓete ka shihɛ ŋa na ma.

²⁹Nahe na kenakɛ wəndə nya kemene slene ta ŋkɛ megela na? Wərə ŋkɛ kadzawa kema ta meghe kenya nza ŋkɛ hwa mbeli nyi ɗema zləvə te hɛ.