Read KapsikiDC Yɛ Ghena Ŋela 25 Bible Online

Yɛ Ghena Ŋela 25 - KapsikiDC bible

Yɛ Ghena Ŋela 25

¹Wa nyi kweci nyi ghena ŋela ta Salomon. Mbeli nyi yitea Ɛzɛkiyas, meghea ka Zhəwda ka rafete hɛ.

²Mene wəshi tewəfərə ya kazləvəa Shala. Zele wəsə nya wəfərəakɛ Shala ya kazləvəa ka meghea kɛfi.

³Kaɗepete dzeme ta ghweme, ya lɛamea hɛɗi mbeli we. Tsagha shɛ ne, kaɗepete yɛ zəzə ta ka meghea kɛfi mbeli we.

⁴Ma kemenemte reɗa mbeli seyi te mze kwa tɛawetɛa ne, katevɛsə wəsə nya nza zləvə te nde vɛsə mze yite.

⁵Ma keŋkamte ka 'yaghwa mehele mbeli seyi yitea meghe ne, katenza meghea ŋkɛ bereteke laka kaganda.

⁶Menema ŋkele ntsə na kwa kema ta meghe ba'a nzama na te ŋkwa mbeli nyi nza zləvə te ma.

⁷Megela ma geze mbeli: «Same ŋa teke», ke mbeli sha gha kenya kelemte zləvə mbeli te gha te kema ta wəndə kwele.

⁸Ɓelama wəsə nya nakɛ na na kahe kahe te ghwə ma. Tsema temene na kwa sebe vəa ŋkwa nya tendeke ŋa fete nde ghema ta ŋa wa?

⁹Ma kenza ghena va gha le nde ghedəkwəa ŋa ne, yipəmte mə ghena shɛ le, ama mba na kegeze ghena nyi gezete ŋa kwete wəndə.

¹⁰Kateŋele ŋa ŋkɛ kefate ghena shɛ ŋkɛ ba'a katezhɛne na kazhɛneke ghena nyi mbetsakawa na we.

¹¹Ma ghena nya kegezete geva le hweŋkwa ta ŋkɛ ne, yipə zləvəa ŋkɛ le wəsə mze kwa tere tere nya kerafekɛ geva le mze kwa tɛawetɛa.

¹²Kala ŋgwedɛba mze kwa tere tere ba'a kala wəsə nya kwa welɛ nya le mze kwa tere tere nya ganyɛ ŋele ta nde ntsehwele ntsehwele sha wəndə nya kefa.

¹³Berete yamtsehete nda nde ghwene ganyɛ ke wəndə nya keghwene ŋkɛ. Yipə yipə ŋkɛ le va nya kelɛnɛake ŋkwa hecimə.

¹⁴Ma wəndə nya kemeɗeyi nda wəsə gəmə ke wəndə, nda ɗema ŋkɛ kendeke nda ne, yipə yipə ŋkɛ le ləmbə ba'a sefə nya keɗema kame va.

¹⁵Laka zereghe ghena ne, wərə wəndə kakeseke mehele ta nde meha ghwə, kala nya nza ghɛni nya kweɗekwe kampəmte 'yɛ'yɛ.

¹⁶Ma kekemave mze na, zemema na kwele kwele ma. Ma kezehwe ŋkɛ na kwele kwele ne, katevənəhwe ŋkɛ na.

¹⁷Dzeghwama na kevə kevə ki ghɛa nde ghedəkwəa ŋa ma, tsagha ne, katewənə ŋkɛ va gha ba'a kateɗema ŋa ŋkɛ.

¹⁸Kala ghəa deme, kafayɛ ba'a have nya lɛmelɛ wəndə nya kesla nda tseŋwə ke nde ghedəkwəa ŋkɛ.

¹⁹Ma ve ghə te nde mbəɗəkwə te vəa ndiremi ne, yipə yipə ŋkɛ le mpeɗe wəsə le slene nya kegaŋkəɗə keɗema le dɛŋe geva te seɗa nya keɓele ɓele.

²⁰Ma gha nda cimə ke wəndə nya mbe ndiremi ne, yipə yipə ŋkɛ le seɗemte lekwesa kənə te vəa ntasle keɗema le nta nda ghwene hwetɛ kwa zhi.

²¹Ma kenza nde ghema ta ŋa shewə va ma ne, ɗave nda wəsə kezeme. Ma kenza ŋkɛ shewə va ndere, same nda yɛmə.

²²Ma kemenete na kala nya ne, katetaze nda mehele na, kala wəsə nya beteyi nda laɗe na kwa ghə. Tsagha gɛ, kateve ŋa zhɛme Mahwətə.

²³Va yakele sefə nya kesawa laka bela kwa gwela kase, hwepe nda wənə ke mbeli yakele tseŋwə kase.

²⁴Megela ma nza mbe cɛ kwafawe ke nza ki ghɛ le male nya keghəpə.

²⁵Kala yɛmə lɛnɛa dzawa vare ŋwələa nya hase hase ghena ganyɛ nya kese te hɛɗi nya cakeɗa.

²⁶Kala ghwa nya nza yɛmə nya kwa kewedazle wedazle keɗema kala belageji nya nza yɛmə nya kwa kareɗa wəndə nya tiɗiɗi nya kebare bare kwa kema ta nde 'yaghwa mehele.

²⁷Megela zeme mze kwele kwele, ya zele zləvə kwele kwele we.

²⁸Kala meleme nya ɗema zli yite te vəa mpa wəndə nya keɗema kagweɗakwe wənəa ŋkɛ.