Read KapsikiDC Yɛ Ghena Ŋela 26 Bible Online

Yɛ Ghena Ŋela 26 - KapsikiDC bible

Yɛ Ghena Ŋela 26

¹Ma zləvə nya ve mbeli te nde dewə mehele ne, yipə yipə ŋkɛ le ntasle nya kemene geva hecimə keɗema le va nya keme te vəa mene wəshi se te wəve.

²Kala zaghwala ba'a ndɛhwepɛ nyi kezlə yitea ghweme ne, tsagha ɗema bezla nya gəmə kakese wəndə.

³Ma kwərəpə ne, kezha gədəwə, lɛ kedzembe mɛ ne, kezha kwara, ma geta ne, kezha wəmbəa ka dewə mehele.

⁴Zhɛne nda ma ghena na ke gezhi kala gezhia ŋkɛ, yagha na kanza kala gheŋkɛ ma.

⁵Zhɛne nda ghena ke gezhi kala gezhia ŋkɛ, yagha ŋkɛ teve ghəa ŋkɛ kande ntsehwele ntsehwele.

⁶Ma wəndə nya keghwenakɛ gezhi le ghena ne, kala wəsə nya tsaslemte seɗa ŋkɛ yitea ghəa ŋkɛ, ghena yatemtse nda ŋkɛ ke ghəa ŋkɛ.

⁷Ma ghena ntsehwele nya kesame kwa mɛa ka gezhia kɛfi ne, dewə berete mbe kala seɗa nyi yitea gwadare.

⁸Ma tsahe nde dewə mehele ne, yipə yipə ŋkɛ le pelɛ nya kwa kwabeza pelɛ.

⁹Ma ghena ŋela nya kwa mɛa ka gezhia kɛfi ne, yipə yipə ŋkɛ le tigə nya mbe dzeve ta nde ghwəyi ghwəyi.

¹⁰Ma wəndə nya te ghə nya keve nda slene ke gezhi keɗema ke wəndə nya kedzeghwake dzeghwa ne, ghena yabeze nda ŋkɛ ke mbeli pɛtɛ.

¹¹Ma gezhi nya kememene wəshi gezhia ŋkɛ ne, yipə yipə ŋkɛ le kelɛ nya kezhɛne geva kadzeghəa vənəhwə ta ŋkɛ.

¹²Ma kenakɛ wəndə na kave ghəa ŋkɛ kande ntsehwele ntsehwele ne, megela ma ve ghə te gezhi ke gheŋkɛ.

¹³Ma ke nde meɗə sha geze: «Deghwava ya kwa hweŋkwa, nivɛrə ya pelɛ te ŋwela.»

¹⁴Kala nya zhɛre gelembe te lɛ nya zhɛre geva ŋkɛ ne, tsagha zhɛre geva nde meɗə te gezle ta ŋkɛ.

¹⁵Kaha dzeve nde meɗə kadzawa kwaneɗafa, ama kaleɓe newe kele ta ŋkɛ ŋkɛ kasame kadzawa mɛ.

¹⁶Ntsehwele ma newe ghəa ŋkɛ nde meɗə ke mbeli mberefaŋe nyi kezhɛne ghena le ntsehwele.

¹⁷Ma wəndə nya kedzehwenyɛ hwa ghəpə nya ɗema ŋkɛ hwe ne, yipə yipə ŋkɛ le wəndə nya keɗe kakese kelɛ te sleme.

¹⁸Kala gezhi nya kenegha yɛ metəlikeghwə, nya kehe yɛ have ba'a wəshi nyi kempə ŋkwa ne,

¹⁹tsagha wəndə nya keghwete ŋkwa ba'a nya kegeze: «Raberə yaraberə 'ya», a ke.

²⁰Ma vəa ŋkwa nya ɗema sheghwə shɛ mɛa ghwə ne, kamte ŋkɛ. Ma vəa ŋkwa nya ɗema nde ŋwashɛ ŋwashɛ shɛ ne, kakiɗi ghəpə.

²¹Laɗe yamene wəvene, ghwə yatse sheghwə. Tsagha meha ghwə wəndə nya keɗe ghəpə kadzembe ghəpə.

²²Kala wəshi ganji ghena ta nde ŋwashɛ ŋwashɛ, hwa'a kwa mendɛkwe ta heli dzawa hɛ.

²³Kala mze kwa tɛawetɛa nya ndiremi nya fiyi mbeli kənəa helape rekɛ ne, tsagha yɛ ghena ganji le wənə nya ndiremi.

²⁴Kawəfərə ghəa ŋkɛ wəndə nya kezlɛ le yɛ ghena ta ŋkɛ, ama ghwete ŋkwa yazəzə ŋkɛ kwa wənəa ŋkɛ.

²⁵Ma kenza ŋkɛ kageze ghena le mehele ne, vema ghə na te ma, kwa nza ŋkɛ viɗi wənəa ŋkɛ va zəzə nyi ndiremi ndiremi.

²⁶Kecaŋa caŋa ŋkɛ kezha wəfərə zlɛa ŋkɛ, ama kateɗepete 'yaghwa mehele ta ŋkɛ mbeli pɛtɛ.

²⁷Ma wəndə nya kela ki ne, kateteɗe ŋkɛ kadzawa. Ma wəndə nya kepəŋə pelɛ ne, katetəŋwələ geva pelɛ kadzeghə.

²⁸Zlɛ yazlɛ wəndə nya kesla tseŋwə va mbeli nyi kebeze nda wənə ŋkɛ ke hɛ. Ma wəndə nya ketsahe ŋkwa ne, ŋkwa yateɗe ŋkɛ.