Read KapsikiDC Yɛ Ghena Ŋela 28 Bible Online

Yɛ Ghena Ŋela 28 - KapsikiDC bible

Yɛ Ghena Ŋela 28

¹Katehwɛ wəndə nya kemene mashiwəshi, ya wəndə ɗema kakeka ŋkɛ. Ama kala megela nivɛrə ɗema wəndə nya tiɗiɗi kagezleŋe ghə.

²Ma kenza mbeli nyi te hɛɗi kaka fama ghena ne, kwele kwele mbembeɗe geva mbeli nyi te ghə. Ama kenza wəndə nya kentsehwele ntsehwele ba'a nya keɗepe wəsə te ghəa ŋkɛ ne, tiɗiɗi tenza mbeli.

³Ma nde ghwərə ghwərəa ntsə nya kesa nda yaka ke ka dewə ŋeli ne, yipə yipə ŋkɛ le va nya kebeze wəshi te wəve.

⁴Ka 'yaghwa mehele yatsahe ka ɗema wəsə mahalegə. Ama mpa yampa ka hawe va wəsə mahalegə le hɛ.

⁵Kafate wəsə nya tiɗiɗi ka ndiremia mehele we. Ama pɛtɛ fa wəshi mbeli nyi kezele Mahwətə.

⁶Megela ma nza kande titikwə nya kedzeghwa tiɗiɗi ke nza kande mcɛlə nya kedzeghwa mendale mendale.

⁷Kahawe wəzege nya kentsehwele ntsehwele va wəsə mahalegə. Ama hawe yapəli nda wəzege nya kedzeghwa le ka beze beze ke yitenyɛ.

⁸Ma wəndə nya kemenete mcɛlə laka yɛmə nyi kwele kwele yitea wəshi nyi nzəɓəave nda ŋkɛ ke mbeli ne, kaŋa wəndə nya ganyɛ laka ka dewə ŋeli tenza wəshia ŋkɛ.

⁹Ma wəndə nya kezhiɓə sleme va fa wəsə mahalegə ne, pa le səkwə ghə ta ŋkɛ kawəsə nya ndiremi.

¹⁰Ma wəndə nya keghwete mbeli nyi tiɗiɗi kadzawa hweŋkwa nya ndiremi ne, kateɗe ŋkɛ kadzawa ki nya late ŋkɛ. Kaŋa mbeli nyi tiɗiɗi veyi geva zeɗe nza.

¹¹Kande ntsehwele ntsehwele newe ghəa ŋkɛ nde mcɛlə, ama wərə nde titikwə nya keɗepe wəsə kapelemte zeweve yite.

¹²Zləvə nya wəba ya shɛ kehərəte ŋkwa mbeli nyi tiɗiɗi. Ama yayata wəndə kawəfərə kehərəte ŋkwa ka 'yaghwa mehele.

¹³Katejive wəndə nya kewəfərə fete nyi menete ŋkɛ te kema we. Ama katekelemte geva wəndə nya kencɛte yɛ fete ta ŋkɛ ba'a nya kesərəakɛ hɛ te wənə.

¹⁴Zlama ya va wəndə nya keghazlənə va mene wəsə kwa ndiremi. Ama mbe ndiremi teteɗe wəndə nya ntɛaŋentɛa ghə.

¹⁵Ma wəndə nya te ghə nya kesa nda yaka ke ka dewə ŋeli ne, yipə yipə ŋkɛ le nivɛrə nya keghwəghwə ba'a mtsekwele nya keŋsle bale.

¹⁶Yaka yasa nda wəndə nya te ghə nya dewə nda mehele ke mbeli. Ama katetemə wəndə nya te ghə nya keɗema mbəɗəkwə teghweme.

¹⁷Le hwɛ dzawa kwele wəndə nya kepesle ŋkwa: yagha mbeli tefɛa ŋkɛ.

¹⁸Katembele wəndə nya kedzeghwa kwa hweŋkwa nya tiɗiɗi. Ama kateza wəndə nya kebetate hweŋkwa bake te ghwa kwa kwete hwa hɛ.

¹⁹Behe tenza wəndə nya kewəza wəvea ŋkɛ va ɗafa. Ama kande titikwə tenza wəndə nya kedambeghə yitea wəshi nyi ɗema zləvə te.

²⁰Mbe zeɗe nza tenza wəndə ganyɛ. Ama kateme ɗa te wəndə nya kezele nza kande mcɛlə kahe kahe.

²¹Wəsə ganyɛ nta ghala kwa mbeli we. Ama nta ghala shɛ yamene kweci mbeli kezha kemave wəsə kezeme.

²²Sla ntsə ya hwa wəndə nya kehwɛ kwa sebe ta mcɛlə. Ama keɗepe ŋkɛ kateme yaka te we.

²³Megela ma wəndə nya keŋele wəndə nde nza kakemave tsahe ke wəndə nya nza ghɛni bake kwa mɛ ve.

²⁴Ma wəndə nya kefə wəshi yitea yita ba'a meghekɛ, nda geze ŋkɛ, fete ŋkɛ we, ke ne, ghala kwelɛ hɛ le nde ŋwasle ŋkwa we.

²⁵Ghəpə yamtse wəndə nya nza sla ntsə hwe. Ama katenza wəndə nya keve ghə te Mahwətə kande mcɛlə.

²⁶Nde dewə mehele wəndə nya keve ghə te zəzə ta ŋkɛ. Ama kambele nde dzeghwa le ntsehwele va ndiremi.

²⁷Kanza wəndə nya keɗa nda wəshi ke ka titikwəa kɛfi pala pala we. Ama kebezla bezla tenza wəndə nya kedərəzlə ntsə va hɛ.

²⁸Yayata wəndə kawəfərə kekemave wəba ka 'yaghwa mehele. Kamtsehe geva mbeli nyi tiɗiɗi vəa ŋkwa nya mpənji hɛ.