Read KapsikiDC Yɛ Ghena Ŋela 3 Bible Online

Yɛ Ghena Ŋela 3 - KapsikiDC bible

Yɛ Ghena Ŋela 3

¹Wəzege ta ɗa, zaghəyitema ghena ta ɗa na ma, veyi wəshi nyi gezete 'ya kwa wənəa ŋa.

²Te zlaɓa ta nci ne, katetemə na kwele kwele teghweme ba'a katezlama na.

³Nza dɛŋe dɛŋe te ganyɛa mehele ba'a te kaganda, hwepeyi hɛ kwa welɛa ŋa ba'a rafeyi hɛ kwa wənəa ŋa.

⁴Ma tsagha gɛ, katesləyi zlaɓa ba'a jive mbe kema na kwa ntsə ta Shala ba'a kwa ntsə ta mbeli.

⁵Ndeke nda pɛtɛa wənəa ŋa ke Mahwətə, dɛŋema geva na te ɗepe wəsəa ŋa ma.

⁶Dɛŋate geva te mbe yayata wəsə nya mene na, kateya ŋkeɗe ta seɗa ta ŋa ŋkɛ.

⁷Vema ghəa ŋa na kande ntsehwele ntsehwele ma, ama hawe va Mahwətə ba'a hendemte geva vare wəsə kwa ndiremi.

⁸Gheŋkɛ nde tenza kaghwɛa geva ta ŋa, kawəsə keve nda berete ke 'yɛ'yɛa ŋa.

⁹Ve zləvə te Mahwətə le wəshia ŋa, le tsəməa wəshia ŋa nyi kese te wəve.

¹⁰Ma tsagha gɛ, viɗi viɗi tenza yɛ tame ta ŋa va ha ba'a pɛre pɛre tenza yɛ weta ta ŋa va tɛ.

¹¹Wəzege ta ɗa, neghama 'yɛ ta Mahwətə ba'a yɛ ŋele ta ŋkɛ na ma.

¹²Kwa nza ŋkɛ ne, ka'yɛ wəndə nya ɗe ŋkɛ Mahwətə kala nya 'yɛ wəzege ta ŋkɛ nya ɗe ŋkɛ yita.

¹³Zlama ya va wəndə nya kesləyi ntsehwele, nya kekemave ɗepe wəshi!

¹⁴Za ma wəsə nya ŋ'we ŋkɛ ke ŋ'we mze kwa tɛawetɛa, za ma zhɛme nya kema ŋkɛ ke mze kwa tere tere.

¹⁵Zləvə ma te ke wəshi kepesa geva. Wəsə shɛ yipə yipə le hwa wəshi nyi mawe mbeli we.

¹⁶Kave nda biya ta hɛ ŋkɛ ke mbeli, kave nda mcɛlə ba'a zləvə ŋkɛ ke hɛ.

¹⁷Kabeghe hɛ ŋkɛ kwa hweŋkwa ganji, tedərəzlə ntsə tedzeghwa hɛ kwa hɛ.

¹⁸Gheŋkɛ ya kawəfe ta mpi kaŋa ka keseve ŋkɛ, zlama ya va mbeli nyi kendeke nda ghə.

¹⁹Laka ntsehwelea ŋkɛ pate hɛɗi Mahwətə, laka ɗepe wəsəa ŋkɛ veyi ghweme ŋkɛ.

²⁰Laka ɗepe mene wəsəa ŋkɛ gwezha gwezha yɛmə same kwa hɛɗi ba'a me geva va sawa te ləmbə.

²¹Wəzege ta ɗa, ndeke nda ghə ke ɗepe nehe ghena ba'a zəzə ghena. Sərəma hɛ na tɛape ma.

²²Kateve ŋa nza teghweme ba'a zeɗe nza hɛ.

²³Ma tsagha gɛ, tedərəzlə ntsə tedzeghwa na, katetsa ŋa tehene we.

²⁴Ma keɓelahe na ne, kateghazlənə na we. Ɓelahema ta ŋa ne, megela tehɛ na.

²⁵Dakema na va wəshi ghazlənə nyi kese vəkə, ya va mpa nyi have ŋa ka 'yaghwa mehele ma.

²⁶Kwa nza ŋkɛ ne, Mahwətə nde tenza kagezleŋema ghə ta ŋa, kateya seɗa ta ŋa ŋkɛ va yayata keleŋa.

²⁷Nzama ŋa na kemene nda ganyɛ ke wəndə nya kehi vəa ŋkwa nya nza na kamenete nda ma.

²⁸Geze nda ma na ke nde ghedəkwəa ŋa kazhɛne geva kase hendɛ, vəa ŋkwa nya nza na kandeke nda wəsə nya 'yɛwe ŋkɛ taghanyɛ ma.

²⁹Zelema na kamene nda wəsə kwa ndiremi ke mcɛ ŋa vəa ŋkwa nza ŋkɛ le gezleŋema ghə vare gha ma.

³⁰Tsehama mɛ na gəmə le wəndə kaɗema ŋkɛ kemenete ŋa wəsə kwa ndiremi ma.

³¹Zhɛma ŋa zlɛ va wəndə nya kemene berete ma, tekema wəshi nyi mene ŋkɛ na ma.

³²Kwa nza ŋkɛ kaɗe wəndə nya kemene wəsə kwa ndiremi Mahwətə we, ama mcɛnyɛa wəndə nya tiɗiɗi ŋkɛ.

³³Kabezla ghɛa ka 'yaghwa mehele Mahwətə, ama kawəpi ŋa mbeli nyi tiɗiɗi ŋkɛ.

³⁴Kaŋ'wəshi mbeli nyi keŋ'wəshi ŋkwa ŋkɛ, ama kaɗe mbeli nyi keshifə ghəa nci ŋkɛ.

³⁵Zləvə nde tenza te ka ntsehwele ntsehwele, ama hawe nde tenza te ka gezhia kɛfi.