Read KapsikiDC Yɛ Ghena Ŋela 30 Bible Online

Yɛ Ghena Ŋela 30 - KapsikiDC bible

Yɛ Ghena Ŋela 30

¹Ghena ta Agwər, wəzege ta Yakɛ. Wa nya ghena nya gezete nda wəndəa shɛ ke Itiyɛl, Itiyɛl ba'a ke Əwkal nya:

²«Kaganda ne, 'ya ya gezhi ma hwa mbeli, mehele ta wəndə ŋelɛ shɛ mbe ghəa ɗa we.

³Kegha 'ya kakemave ntsehwele we, keɗepe ɗepe wəsə ta Shala 'ya we.

⁴Wa nde dzeme pelɛ ghweme ba'a sawanyɛ wa? Wa nde keseyi sefə mbe hwəa dzeve ta ŋkɛ wa? Wa nde hwepeyi yɛmə mbe lekwesa ta ŋkɛ wa? Wa nde mɓeyi yɛ ghala ta hɛɗi wa? Wa sləa ŋkɛ wa? Wa tenza sləa wəzege ta ŋkɛ wa? Gezete ɗa kenza ŋkɛ nahe na keɗepe.

⁵Pɛtɛa ghena nyi gezete Shala kenza kakaganda. Gelə ŋkɛ kaŋa mbeli nyi kewəfərə mbe gheŋkɛ.

⁶Mtsehema wəsə na yitea ghena ta ŋkɛ, yagha ŋkɛ teŋele ŋa ba'a teveyi ŋa kande tseŋwə ma.

⁷Shala yawe, wəshi bake ya'yɛwe 'ya va gha, ndaŋe ɗa ma na te hɛ nda temte 'ya ma.

⁸Kelemte mbəɗəkwə ba'a tseŋwə cakeɗake yitea 'ya, veyi ɗa ma na kande titikwə lagana keɗema kande mcɛlə lagana ma. Ɗave ɗa wəsə kezeme wərə zeme ta ɗa.

⁹Ma kenza wəshi kwele kwele va 'ya, kateɗepema ŋa 'ya, ‹Wa ŋkɛ Mahwətə wa›, a 'ya sha tegeze. Ma kenza 'ya kande titikwə lagana ne, kateghərə 'ya. Tsagha ne, katekelemte zləvə 'ya te Shala ta ɗa.

¹⁰Ŋwashɛ ŋwashɛma nde mene slene na va nde sleke ŋkɛ ma. Katebezla ŋa ŋkɛ ba'a katenza fete ta ŋa kwa ghəa ŋa.

¹¹Mbeli nyi keŋele yiteyɛa nci ba'a nyi keɗema katsahe megheyɛa nci ya shɛ.

¹²Mbeli nyi keveyi ghəa nci wɛŋe, nda kaɗema hɛ kepɛmte geva va reɗa ta nci ya shɛ.

¹³Mbeli nyi kekele ghə ba'a nyi keɓelama ŋkwa ya shɛ.

¹⁴Mbeli nyi nza slene ŋ'wəshi kwa mɛ va hɛ kala kafayɛ slene ghweleme kala hwa ya shɛ. Ɗeke ɗeke hɛ kaza sebe te ka dewə ŋeli te hɛɗi ba'a kampə ka titikwəa kɛfi shave hwa mbeli.»

¹⁵Ŋwalea kwɛ ya shɛ bake va mamerede, ma ke hɛ sha geze: «Ndeke ɗa, ndeke ɗa!» Wəshi ya shɛ mahekene nyi keghama kabehe keɗema wəfaɗe nyi keghama kageze: «Wərə», ke hɛ:

¹⁶ghɛa mbelia kwahɛɗi, male jɛŋa, hɛɗi nya keɗema kabehe va va ba'a ghwə nya keghama kageze: «Wərə», a ke.

¹⁷Ma kenza wəndə kaŋ'wəshi yitenyɛ ba'a kaɗema kahawe va meghekɛ ne, katetsakwe ntsə ghame nyi mɛa hələ kwa ba'a kateslekwe ŋkɛ yɛ zele.

¹⁸Wəshi ya shɛ mahekene nyi kendakɛ ɗa berete keɗema wəfaɗe nyi favema 'ya:

¹⁹hweŋkwa ta zele pelɛagha yitea ghweme, hweŋkwa ta shishi dzate te pelɛ, hweŋkwa ta kwambelə dzeyi te ndərə ba'a hweŋkwa ta za kalə sha jɛmbezlɛ.

²⁰Wa nya tsetse nza ta male kwa vale tahe: pa nde zehwe wəsə kezeme ba'a sehwemte mɛa nta, kwa sebe ta ŋkɛ, ma ke sha geze: «Wəsə kwa ndiremi shɛ kemenete 'ya we!»

²¹Wəshi ya shɛ mahekene nyi gaŋkəɗə hɛɗi va hɛ keɗema wəshi wəfaɗe nyi ɗema nde kazereghete:

²²mava nya kezhɛrenyɛ kameghe, gezhi nya behe va ɗafa,

²³male nya kezlere zlere nya kewəmeve za ba'a kwatera nya kekelehwe ŋkwa male nya kesleke.

²⁴Kweci mama ta wəshi keseɗa ya shɛ wəfaɗe ɓɛhwɛ ɓɛhwɛ te hɛɗi, ama kentsehwele ntsehwele hɛ fate fate:

²⁵lɛshekwɛnɛa nyi ɗema berete mbe hɛ nda tsene wəshi kezeme ta nci hɛ hefeghwe,

²⁶kese nyi ɗema berete mbe hɛ nda mene ghɛa nci hɛ dzeyi mbe yɛ gela,

²⁷dzale nyi ɗema meghe hwa hɛ nda ɗepe slə hɛ kanya kwetɛŋe,

²⁸kaja nyi nza mbeli kakeseve hɛ le dzeve nda dzeki hɛ pa ki ghɛa meghe.

²⁹Wəshi nyi kezhɛne mpi ya shɛ mahekene nyi nza ntishɛ ta nci megela keɗema wəfaɗe nyi nza dzeghwa ta nci megela:

³⁰nivɛrə nya katsala ma hwa wəshi keseɗa, nya keɗema kazhɛne dzeyi te sebe va yayata wəsə,

³¹ŋələ nya keslete te seɗa ta ŋkɛ keɗema zhɛfa ba'a meghe nya kedzeghwa te kema ta ka sewajɛa ŋkɛ.

³²Ma kendeke ŋa kele ghə gezhia ŋa, nda zəzəve ghena na kwa sebe ne, mpave ghəa ŋa le dzeve te mɛ,

³³kwa nza ŋkɛ ma keŋwetsate ŋ'wa mbeli ne, kakema mɛmre ŋ'wa mbeli, ma kempave wəndə wəsə te ŋshi ne, kasawa tavana, ma kehwepete geva wənə ne, ghəpə yamtse geva kase.