Read KapsikiDC Yɛ Ghena Ŋela 4 Bible Online

Yɛ Ghena Ŋela 4 - KapsikiDC bible

Yɛ Ghena Ŋela 4

¹Ŋwalea ɗa, fa mə ghena nyi geze ŋayɛ yiteyɛ ŋayɛ, ve nda mə ghə ke teke nza kaka ɗepe wəshi.

²Kaganda ne, ghena ganyɛ yateke ŋayɛ 'ya, betema ghena nyi teke ŋayɛ 'ya yɛ ma.

³'Ya perə ne, kawəzege ganyɛ se 'ya sha yiteyɛ ɗa, kwele kwele se meyɛ ɗa kaɗe ɗa kala wəzege kwetɛ.

⁴Ma ke yiteyɛ ɗa sha se kateke ɗa ghena: «Ve mehele yitea ghena nyi geze 'ya. Mene wəshi nyi geze 'ya yitea nza na teghweme.

⁵Nza kande ntsehwele ntsehwele ba'a kande ɗepe wəshi. Zaghəyitema yɛ ghena ta ɗa na ma, zhɛre nda ma wəmbə na ke hɛ ma.

⁶Wəfəma ntsehwele na ma, kateya ŋa ŋkɛ, ɗehwe ŋkɛ, katenewe ghweme ŋkɛ te gha.

⁷Ma gha ta ntsehwele ne, mene yayata wəsə kezha nza kande ntsehwele ntsehwele. Mene slene le pɛtɛa wəshi nyi va gha kezha nza kande ɗepe wəshi.

⁸Həməwəve ntsehwele, kateve ŋa kwele ŋkɛ, kateve zləvə ŋkɛ te gha kekeseve ŋkɛ na.

⁹Katenza ŋkɛ mbe ghəa ŋa kala derə meghe, kala wəsə kepesa geva nya ganyɛ yitea ghə.»

¹⁰Fa wəzege ta ɗa, keseyi ghena nyi geze 'ya, ma tsagha ne, katenza yɛ va ta ŋa kwele kwele teghweme.

¹¹Nahe 'ya ketekete ŋa hweŋkwa ta ntsehwele, nahe 'ya kencɛte ŋa dzeghwa kwa hweŋkwa nya tiɗiɗi.

¹²Tsagha ne, katedzeghwa na tedərəzlə ntsə, kateteɗe na vəa ŋkwa nya hwɛ na we.

¹³Keseve wəsə nya tekeve na megela, pelema ŋkɛ na ma. Wəmbəyi ŋkɛ, kwa nza ŋkɛ ne, mpia ŋa ŋkɛ.

¹⁴Dzeghwama na kwa hweŋkwa ta ka 'yaghwa mehele ma, kelema hweŋkwa ta ka ndiremia mehele na ma.

¹⁵Ya ghəa ŋa ve, dzeghwama na kwa ma! Same ŋa kwa shɛ na wətəlite ŋkwa!

¹⁶Kadzeyitea hɛ hɛ kemenetema wəsə kwa ndiremi hɛ we, kakele hɛ hɛ keweleyima wəndə hɛ we.

¹⁷Wəsə kwa ndiremi ya kawəsə kezeme ta nci, mene berete ya kawəsə kesa ta nci.

¹⁸Ama nahe hweŋkwa ta mbeli nyi tiɗiɗi kenza kala wakaka ta ŋkwa nya kemtsehe waŋe pa kwa ghə veci.

¹⁹Nahe hweŋkwa ta ka 'yaghwa mehele kenza kaŋkwesle, kanakɛ tehene nyi ketetsa hɛ hɛ we.

²⁰Wəzege ta ɗa, ndeke nda mehele ke ghena nyi geze 'ya, ve sleme yitea ghena nyi ncɛ ŋa 'ya.

²¹Zaghəyitema hɛ na tɛape ma, keseyi hɛ kwa wənəa ŋa.

²²Kwa nza ŋkɛ ne, mpi hɛ sha mbeli nyi kesləyi hɛ, lɛŋelɛ hɛ kaŋa pɛtɛa geva ta nci.

²³Kakwa ghate ta wəsə ne, ya wənəa ŋa kwa nza ŋkɛ ne, same kwa same mpi.

²⁴Fɛa mɛa ŋa yitea sla tseŋwə, gezema ghena kwa ndiremi na te wəndə ma.

²⁵Newe ŋkwa nya te kema ta ŋa ntsə ta ŋa, nza newe ŋkwa ta ŋa tiɗiɗi te kema ta ŋa.

²⁶Zəzəve hweŋkwa nya tekele na megela, dzeghwa kwa hweŋkwa nya tiɗiɗi.

²⁷Samema na kwa laka bela kwa zeme, ya laka bela kwa gwela ma. Ya ghəa ŋa va wəsə kwa ndiremi.