Read KapsikiDC Yɛ Ghena Ŋela 7 Bible Online

Yɛ Ghena Ŋela 7 - KapsikiDC bible

Yɛ Ghena Ŋela 7

¹Wəzege ta ɗa, ya ghena nyi geze 'ya, ndeke nda ghə ke wəshi nyi geze 'ya.

²Ma keɗe na kanza teghweme ne, ya wəshi nyi geze 'ya ba'a wəshi nyi teke 'ya kala ha ta ntsə ta ŋa.

³Hwepeyi hɛ kwa dzeve ta ŋa, rafeyi hɛ kwa wənəa ŋa.

⁴Ma pa na sha ntsehwele: «Gha ya kawəzha ta meyɛ ɗa!» Heka ɗepe wəsə kamcɛ ŋa.

⁵Kateya ŋa hɛ va male ta wəndə, va ghena keghwete ŋkwa ta male nya ɗepema na.

⁶Ma te kwete hɛ ne, pa 'ya nza ɗa mɛa wəfela ta cɛa ɗa, ntake 'ya kanewe ŋkwa jive mbe mayafe.

⁷Dəkwə 'ya te ka megelɛshi nyi kaka dewə ntsehwele, pa 'ya nakɛ mempɛhweta nya kande dewə mehele hwa hɛ.

⁸Cape ŋkɛ dzeyi kwa hweŋkwa, dekwede yitea ŋkwa nya nza male nya kevale tahe te. Ntəŋə ŋkɛ kwa hweŋkwa kedzeki ghɛa nta.

⁹Hetɛhwɛɗi ŋkwa, yipə le pəkwə ta veci, vəa ŋkwa nya nza ŋkwa zlərə zlərə ba'a nya se ŋkwesle.

¹⁰Pɛkwe malea shɛ se kezha begeme le, kala male mefətekwə seɗete lekwesa nde ba'a kala male nya keghwete ŋkwa.

¹¹Ma malea shɛ ne, kewəba zlere ba'a keci keci ve, kanza seɗa ta nta te ghweɓe ki ghɛa nta we.

¹²Te kwete və, dzeyi kwa hweŋkwa, te kwete və dzeyi te ŋkwa kebeke, se laka yayata bela ne, ŋkwa yaneghe nde.

¹³Pa nde keseve mempɛhweta shɛ ba'a həməwəve ŋkɛ, ma ke shɛ kata kata:

¹⁴«Nahe 'ya kemeɗeyi nda melɛ ketsa hana ke Shala. Ɓeshi nya dzeghekɛ melɛa shɛ 'ya.

¹⁵Vatse shave 'ya kezha begeme le gha. Gha yazele 'ya, nahe 'ya kesləyi ŋa tsetsenya.

¹⁶Nahe 'ya kepelakeyi gwada nyi welɛɗɛɗɛ te gezle ta ɗa, zlave pawa nyi kesame kwa Ɛzhipte.

¹⁷Nahe 'ya keyisəyi 'wərdə nyi ganji ganji dzeyi te.

¹⁸Nde shɛ mə ghwəyimte ghəa ɓə le ɗe pa va masheke. Fa ɓə zeɗea ɗe kanya kwetɛŋe.

¹⁹Kwa nza ŋkɛ ne, ki ghɛ za ɗa we. Nahe ŋkɛ kelə yitea dzeghwa nya cakeɗa.

²⁰Nahe ŋkɛ kelete cɛdɛ kwele kwele. Vəa ŋkwa nya nza tere taghele ghele tese ŋkɛ.»

²¹Laka caŋa ta nta ne, pa nde ghwetehwe ŋkɛ. Pa nde kesehwe mehele ta ŋkɛ le ghena ta nta nyi zeɗe zeɗe.

²²Taghanyɛ ne, cape ŋkɛ kwa sebe ta nta kala nya lə sla kadzete ŋkwa nya tesla ghə mbeli te, kala nde dewə mehele nya hwepete mbeli kezha 'yɛ,

²³pa te və nya tempahwame geva have mbe wənəa ŋkɛ. Kala 'yɛ nya kehwɛ kadzete dagalawe ne, kaɗepe ŋkɛ katenza mpia ŋkɛ we.

²⁴Ma tsetsenya gɛ ŋwalea ɗa, fa ɗa mə ŋa ɗa ba'a ndeke nda mə mehele ke ghena nyi geze 'ya.

²⁵Mba wənəa ŋayɛ keghwetehwe geva laka male nya kala nya, mba yɛ kezamte ghəa ŋayɛ kwa hweŋkwa ta nta.

²⁶Kwa nza ŋkɛ ne, kwele kwele mpəmte mbeli nde. Ya mbeli nyi berete berete ne, nahe nde kempəmte hɛ.

²⁷Ma dzeki ghɛa nta ne, gheŋkɛ dzeki ghɛa mte, gheŋkɛ dzawa ghɛa mbelia kwahɛɗi.