Read KapsikiDC Yɛ Ghena Ŋela 8 Bible Online

Yɛ Ghena Ŋela 8 - KapsikiDC bible

Yɛ Ghena Ŋela 8

¹Ashɛ ntsehwele nde heka ŋkwa wəka? Ashɛ ɗepe wəsə nde zlape ŋkwa wəka?

²Ma dzeyi kwa ghəa wəmbə nyi mɛa hweŋkwa, dzeyi kwa yɛ baŋwa ta hweŋkwa ne, meslete ntsehwele.

³Mɛa mɛ degha nyi kedzeki meleme, dzeyi te ŋkwa nyi dzeghwa mbeli ne, ma ke sha zlape:

⁴«Gheyɛ mbeli yaheka 'ya, ke gheyɛ pɛtɛ geze ŋayɛ ghena 'ya.

⁵Gheyɛ ka dewə ntsehwele, teke mə ntsehwele, gheyɛ ka dewə mehele, teke mə nza le mehele.

⁶Fa mə, ghena nya wəba yategeze 'ya, ntare ntare tegeze ŋayɛ ghena 'ya.

⁷Kwa nza ŋkɛ ne, kaganda yageze 'ya, kaɗe sla tseŋwə 'ya we.

⁸Deke ghena nyi tiɗiɗi yageze 'ya, kasla tseŋwə keɗema kaghwete ŋkwa 'ya we.

⁹Tiɗiɗi ghena ta ɗa sha wəndə nya keɗepe ghena, dekwede hɛ kafa sha wəndə nya keɗepe wəshi.

¹⁰Yɛhwe mə wəshi nyi teke 'ya za ma ke mze kwa tɛawetɛa, ɗehwe mə ɗepe wəsə za ma ke mze kwa tere tere nya ganyɛ.

¹¹Kwa nza ŋkɛ ma 'ya ntsehwele ne, zləvə ma te 'ya ke wəshi kepesa geva, zləvə ma te 'ya ke wəshi nyi mawe mbeli.»

¹²'Ya ya kantsehwele, zəzə ganyɛ ya kaŋkwa kenza ta ɗa. Nahe 'ya keɗepe mene slene le zəzə ghena.

¹³Ma hawe va Mahwətə ne, gheŋkɛ ɗema wəsə kwa ndiremi. Ma kele ghə, ŋkele ntsə, hweŋkwa ta wəsə kwa ndiremi ba'a tseŋwə ne, kaɗe hɛ 'ya we.

¹⁴Ma slene ta ɗa ne, geze nda ghena ganji ke mbeli ba'a teke nda zəzə ghena ke hɛ. 'Ya ya kaɗepe wəsə ba'a berete ya va 'ya.

¹⁵Te zlaɓa ta ɗa ne, kasleke ŋkwa ka meghea kɛfi ba'a kameha ghwə nyi tiɗiɗi ka meha ghwə.

¹⁶Te zlaɓa ta ɗa ne, kasleke ŋkwa mbeli nyi te ghə ba'a kanza pɛtɛa mbelia jama kaka meha ghwə nyi tiɗiɗi.

¹⁷Ma 'ya ne, kaɗe mbeli nyi keɗe ɗa 'ya, katesləyi ɗa mbeli nyi kezele ɗa.

¹⁸Ma mcɛlə ba'a zləvə ne, va 'ya hɛ, tsagha wəshi nyi ketemə ba'a zeɗe nza.

¹⁹Zləvə ma te wəshi ganjia ɗa ke mze kwa tere tere nya wɛŋe, za ma wəshi gəməa ɗa ke mze kwa tɛawetɛa nya ganyɛ.

²⁰Kwa hweŋkwa nya tiɗiɗi dzeghwa 'ya, kwa hweŋkwa nya hawe mbeli va wəsə nya kehi.

²¹Kwa ne, kave nda wəshi ganji 'ya ke ka ɗe ɗa, kaviɗi ghɛa nci 'ya le wəshi nyi nza zləvə te hɛ.

²²'Ya yapate Mahwətə kaghate, mpelɛa ma ke pɛtɛa kweci wəshi nyi pate ŋkɛ.

²³Nahe 'ya kepate geva vəashi, kakwa ghate, tewə hɛɗi lema kenaka kanza.

²⁴Ma nda yake geva 'ya ne, yɛ ndərə shɛ we, ghwa nyi gwezha gwezha yɛmə same kwa hɛ shɛ we.

²⁵Nahe 'ya keyake geva nda tepesete geva yɛ ghweme, yɛ wəmbə,

²⁶nda tepate hɛɗi lema, yɛ wəve, ya kwa ghate ta keləwəa hɛɗi lema ŋkɛ.

²⁷Tagha 'ya nda pelakeyi ghweme ŋkɛ, nda ɗahete zeweve ta ghweme ŋkɛ kənəa yɛ ndərə,

²⁸nda tseneyi ləmbə ŋkɛ pelɛagha yitea ghweme ba'a nda ndeke nda berete ŋkɛ ke ɗasle nyi kwake,

²⁹nda veyi yɛ ghala ta ndərə ŋkɛ, nda gezete nda ŋkɛ ke yɛ yɛmə kezha ɗema kazlake hɛ ba'a nda mɓeyi shihəa hɛɗi lema ŋkɛ.

³⁰Ma mbe vəa shɛ ne, dzeme vare gheŋkɛ 'ya kala wəzege nya yite. Keveci keveci ne, kave nda zlama 'ya, kevə kevə ne, karaberə 'ya kwa kema ta ŋkɛ.

³¹Kateraberə 'ya te hɛɗi lema nya pate ŋkɛ. Tagha gɛ, kazlama 'ya te nza hwa mbeli.

³²Ma tsetsenya gɛ ŋwalea ɗa, fa mə ghena ta ɗa. Zlama ya va mbeli nyi kemene slene le ghena ta ɗa.

³³Fa mə ghena ta ɗa kezha nza yɛ kaka ntsehwele ntsehwele, pelema se yɛ yite ma.

³⁴Zlama ya va mbeli nyi kefa ɗa ghena, nyi kenza keveci keveci mɛa degha ta ɗa ba'a nyi keya ŋkwa kedzeki ghɛa ɗa.

³⁵Ma wəndə nya kesləyi ɗa ne, nahe ŋkɛ kesləyi mpi, nahe ŋkɛ kekemave zlaɓa ta Mahwətə.

³⁶Ama wəndə nya kesləyima ɗa ne, ghəa ŋkɛ yamene nda fete ŋkɛ. Ma pɛtɛa mbeli nyi keɗema ɗa ne, mte yaɗe hɛ.