Read KapsikiDC Nde zlape ghena 1 Bible Online

Nde zlape ghena 1 - KapsikiDC bible

Nde zlape ghena 1

¹Ghena ta Nde ntsehwele ntsehwele, wəzege ta David ba'a meghe nya mbe Zhɛrəzalɛm.

²Ma ke Nde ntsehwele ntsehwele: Gəmə wəshi pɛtɛ, wəsə shɛ kaketekɛ ŋkwa we, gəmə wəshi pɛtɛ.

³Wa wəsə nya ŋ'we wəndə ŋelɛ mbe slene nya mene ŋkɛ kwake te hɛɗi tse wa?

⁴Kakiɗi vəa kweci mbeli, kase ŋa kweci, ama mba hɛɗi lema shanda.

⁵Kasame veci kwa ghɛ, kapəkwə ŋkɛ, kazhɛne geva ŋkɛ kahe kahe kadzawa ŋkwa nya same ŋkɛ kwa.

⁶Kavɛ sefə dzawa laka bela kwa zeme te kwete və, dzeme laka bela kwa gwela te kwete, kavɛ geva sefə, kazhɛre geva ŋkɛ zhɛne, kavɛ geva ŋkɛ jive laka ŋkwa nya shave ŋkɛ.

⁷Kahwɛ pɛtɛa hələ kadzawa ndərə, ama kaviɗi ndərə tɛape we. Ma dzawa ŋkwa nya hwɛ yɛ hələ ne, nda hwɛ yahwɛ hɛ shanda.

⁸Kewənə wənə mbeli va pɛtɛa ghena, mba mbeli shɛ geze hɛ we. Kaleɓe ntsə va newe ŋkwa we, kabehe sleme va fa ghena we.

⁹Ma wəsə nya kese vəashi ne, katese ŋkɛ zhɛkwa. Ma wəsə nya kese kamene geva ne, katemene geva zhɛkwa. Wəsə mɛnɛfɛ shɛ kwake te hɛɗi lema we.

¹⁰Wərə mbeli kageze te kwete wəsə: «Newema mə wəsə mɛnɛfɛ!», ke mbeli. Ndagwara nahe wəsəa shɛ kegha ka se vəashi, tewə gheɓəmə kenaka kaya.

¹¹Mba wəsə nya vəashi yitea ghəa ɓəmə we. Ma mbeli nyi keteya kwa sebe ta ɓəmə ne, wəsə shɛ katenza mbe ghəa nci kezha sərə nda ke nyi keteya kwa sebe we.

¹²Ma 'ya, 'ya Nde ntsehwele ntsehwele ne, nahe 'ya kese kameghea ka Israyɛl mbe Zhɛrəzalɛm.

¹³Nahe 'ya kendeke nda ghə ke fa ba'a ɗepe zeweve ta wəshi nyi kemene geva te hɛɗi lema laka ntsehwelea ɗa. Nahe ŋkɛ kenza kaslene nya dzawe nya ndeke nda Shala ke mbeli kezha ve nda ghə hɛ.

¹⁴Nahe 'ya kenakɛ pɛtɛa wəshi nyi kemene geva te hɛɗi lema. Ama gəmə ba'a kese sefə wəshi pɛtɛ.

¹⁵Ma wəsə nya hwelaŋgwaɗe ne, ka'yɛte ŋkɛ mbeli we. Ma wəsə nya keɗema shɛ ne, kaɓelate ŋkɛ mbeli we.

¹⁶Ma 'ya mbe ghəa ɗa: «Nahe 'ya kekemave ba'a kembakete ntsehwele za ma ke pɛtɛa mbeli nyi kese meghe mpelɛa ma ke 'ya mbe Zhɛrəzalɛm. Kwele kwele tekeve ntsehwele ba'a ghena ta nza 'ya.»

¹⁷Nahe 'ya kendeke nda ghə ke ɗepe ntsehwele ba'a dewə ntsehwele, ke ɗepe wəsə ba'a dewə mehele. Ma wəsə nya fave 'ya mbe ne, kala kese sefə ŋkɛ.

¹⁸Kwa nza ŋkɛ ma kwele kwele ntsehwele ne, kwele kwele nza yirə ta mehele. Ma wəndə nya kembake ɗepe wəsə ne, yaka yambake nda ŋkɛ ke ghəa ŋkɛ.