Read KapsikiDC Nde zlape ghena 11 Bible Online

Nde zlape ghena 11 - KapsikiDC bible

Nde zlape ghena 11

¹Gezleŋema ghə na va ve ghena kwa ghəa ŋa ma, kwa nza ŋkɛ ma te kwa keɗaŋe ne, katekemave zhɛme ganyɛ na.

²Vema pɛtɛa mcɛləa ŋa na te ŋkwa nya kwetɛŋe ma, kwa nza ŋkɛ keɗepe ndiremi nya kenza kamenete geva te hɛɗi na we.

³Ma viɗi ləmbə va va ne, kame ŋkɛ kadzete hɛɗi. Ma keteɗe wəfe laka bela kwa zeme keɗema laka bela kwa gwela ne, te ŋkwa nya teɗe ŋkɛ nza ŋkɛ.

⁴Katsawe wəshi wəndə nya kenewe vɛ sefə we. Kamene wəshi wəndə nya kenewe me ta va se te wəve we.

⁵Kala nya ɗema na kaɗepe tsema tsema pa geva mpi keɗema 'yɛ'yɛ kwa hwəa male nya le hwə ne, tsagha ɗema na kaɗepe slene ta Shala nya kepate wəshi pɛtɛ.

⁶Vatse gɛ ne, tsawe felehwe ta wəshia ŋa mba ŋkwa masheke, zhɛne nda ma mpi na ke dzeve ta ŋa pa va tɛhwɛɗi ma. Kwa nza ŋkɛ ne, keɗepe na nyama nyama slene ta ŋa nya ketenza kewəpi wəpi keɗema nya teŋ'we zhɛme na mbe na we.

⁷Ganyɛke waŋe, megela ŋkɛ sha ntsə kezha newe veci.

⁸Ma ketemə wəndə teghweme kava kwele kwele ne, zlama ŋkɛ yitea pɛtɛa va shɛhɛ. Ama zəzəve ŋkɛ kwele kwele tenza hɛ nyi kaŋkwesle ba'a gəmə tenza pɛtɛa wəshi nyi ketese.

⁹Ma gha nya kamempɛhweta ne, zlama yitea nza ta ŋa kamempɛhweta. Nza fare fare mbe vəa shɛ. Mene pɛtɛa wəshi nyi ɗe ghəa ŋa, pɛtɛa wəshi nyi zeɗehwe ŋa. Ama ɗepete katemeha ghwə Shala te yayata wəsə nya menete na.

¹⁰Ya wənəa ŋa va beze keɗema ya geva ta ŋa va zereghwe. Kwa nza ŋkɛ ne, gəmə nza kamempɛhweta ba'a nza le shinti nyi ɗɛkeɗɛa ɗɛkeɗɛa.