Read KapsikiDC Nde zlape ghena 5 Bible Online

Nde zlape ghena 5 - KapsikiDC bible

Nde zlape ghena 5

¹Samema ghena kwa mɛa ŋa kahe kahe ba'a mene nda ma meɗe mɛ na kahe kahe ke Shala ma. Kwa nza ŋkɛ ne, pelɛ ghweme Shala, ama kwake na te hɛɗi. Ma tsagha gɛ ne, gezema ghena na kwele kwele ma.

²Kwa nza ŋkɛ kala se shiwə mbe kwele kwele ta zəzə ne, tsagha se gezhi mbe kwele kwele ta ghena.

³Ma kemeɗeyi nda wəsə na ke Shala ne, yipəyi wəsəa shɛ kwa kahe kahe. Kwa nza ŋkɛ ne, kaɗe ka dewə mehele Shala we. Vatse gɛ ne, yipə wəsə nya meɗeyi na kwa.

⁴Ganyɛ ma nya ɗema na kemenete meɗe mɛ kenya menete meɗe mɛ na kaɗema ma keyipəyi kwa.

⁵Yakɛ ghəa ŋa va geze ghena nyi kekese ŋa kadzembe beze ghena. Gezema na: «Nahe ŋkɛ kebeze va 'ya», pa sha nde dzeghe Shala ma. Tsagha ne, katehwepe wənəa Shala va ghena nyi geze na ba'a katebeze wəsə nya mene na ŋkɛ.

⁶Ma ghena nyi kwele kwele ne, gəmə hɛ kala shiwə nyi kwele kwele. Vatse gɛ ne, ndeke nda ghəa ŋa ke hawe va Shala.

⁷Ma kenakɛ kasa nda yaka mbeli ke nde titikwə, kaɗema wəsə nya tiɗiɗi ba'a nya le hweŋkwa ta ŋkɛ kamene geva te hɛɗi ne, nzama na heɓake ma. Kwa nza ŋkɛ ne, kwete wəndə nya wəba ya kənəa wəndə nya wəba. Ma kənəa hɛ ɓiyitsa ne, mbeli nyi jama jama ya shɛ.

⁸Ganyɛke ŋkɛ kezha hɛɗi kenza meghe nya keɗe ghena ta wəza shɛ.

⁹Ma wəndə nya keɗe cɛdɛ ne, kabehe ŋkɛ va cɛdɛ we. Ma wəndə nya keɗe mcɛlə ne, kakete ŋkɛ va wəshi nyi ve we. Gəmə ŋkɛ perə.

¹⁰Ma kwele kwele wəshi va wəndə ne, kwele kwele nza mbeli nyi kezeme hɛ. Wa wəsə nya ŋ'wete wəndə ke gheŋkɛ keɗema deke newe hɛ le ntsə wa?

¹¹Megela hɛ nde mene slene, ya gheŋkɛ zehwe wəsə kezeme ɓɛhwɛ keɗema kwele kwele. Ama behe va mcɛlə le ŋa ŋkɛ ne, kasərə wəndə ŋkɛ kadzeyitea hɛ we.

¹²Kwete ndiremi nya dzawe nya neweve 'ya ya shɛ kwake te hɛɗi: mcɛlə nya wəfərəakɛ wəndə ke gheŋkɛ kezha ndiremia ŋkɛ.

¹³Rayɛ mcɛləa shɛ zanyɛ mbe slene nya ndiremi. Ma vəa ŋkwa nya yake wəzege teza ŋkɛ ne, wəsə shɛ ketene yitea dzeve ve we.

¹⁴Kala nya sawa ŋkɛ kwa hwəa meghekɛ derelɛŋe lɛŋe ne, derelɛŋe lɛŋe teslə ŋkɛ te hɛɗi kala nya se ŋkɛ. Wəsə shɛ kekemave ŋkɛ mbe slene ta ŋkɛ we, wəsə shɛ kateslə ŋkɛ le we.

¹⁵Kandiremi nya wəba ŋkɛ kaŋa ŋkɛ kaslə te hɛɗi nya kala nya se ŋkɛ kadzete. Wa wəsə nya kemave ŋkɛ mbe slene sefə nya menete nya ŋkɛ wa?

¹⁶Ɓiyitsa ne, katekiɗi yɛ hɛa ŋkɛ ŋkɛ mbe ŋkwesle. Katetaze mehele ta ŋkɛ, katesa yaka ŋkɛ ba'a katebeze wənəa ŋkɛ kwele kwele.

¹⁷Wa nya wəsə nya neweve 'ya mbe nya: nahe ŋkɛ kehi kazeme wəsə kezeme ba'a kasa wəsə kesa, kazeme zeɗe nza nya mbe slene nya menete ŋkɛ wəndə ŋelɛ kwake te hɛɗi lema mbe hɛ nyi ndeke nda Shala. Gheŋkɛ ya kabela nya kaŋa ŋkɛ.

¹⁸Ma kendeke nda mcɛlə ba'a zeme zeɗe nza Shala ke wəndə ne, wərə ŋkɛ kafa deme te ŋa ŋkɛ bela, zhɛme nya mbe slene ta ŋkɛ. Gheŋkɛ ya kawəsə gəmə nya ve nda Shala ke wəndə.

¹⁹Tagha gɛ, katezaghə wəndə ŋelɛ tsema tsema nza hɛa ŋkɛ kebaslɛnyɛ, va nya viɗikɛ wənəa ŋkɛ Shala le zlama.