Read KapsikiDC Nde zlape ghena 6 Bible Online

Nde zlape ghena 6 - KapsikiDC bible

Nde zlape ghena 6

¹Nahe 'ya keneweve kwete wəsə kwa ndiremi kwake te hɛɗi lema zhɛkwa, wəsə kwa ndiremi nya wəba kaŋa mbeli.

²Kala wəndə nya ndeke nda mcɛlə, wəshi ba'a zləvə Shala. Pɛtɛ kemave wəshi nyi mawe ŋkɛ ŋkɛ, ama kesərəakɛ ŋkɛ Shala kazeme wəshia shɛhɛ we. Kwete wəndə nde tezeme hɛ. Gəmə ba'a wəsə kwa ndiremi nya wəba ŋkɛ perə.

³Wərə wəndə kayake ŋwale gwəmsə ba'a katemə kwele kwele teghweme. Wa zhɛme nya mbe keɗema ŋkɛ kekemave zeɗe nza mbe temə ta ŋkɛ teghweme ba'a keɗema ŋkɛ kelamte megela wa? Ma 'ya sha ŋa ɗa ne, ganyɛ ma wəzege nya kemtenyɛ kwa hwə ke gheŋkɛ.

⁴Kwa nza ŋkɛ ne, gəmə yake geva ŋkɛ, mbe ŋkwesle tedzembe ŋkɛ ba'a bətə tenza sləa ŋkɛ mbe ŋkwesle.

⁵Kenakɛ ba'a keɗepe veci ŋkɛ we. Gwezlayɛ ma ŋkɛ ke wəndə nya ketemə teghweme kwele kwele.

⁶Ya wəndəa shɛ menete va 2.000 teghweme kaɗema ŋkɛ kekemave zeɗe nza ne, ashɛ katempə pɛtɛa wəshi wəka?

⁷Ma pɛtɛa slene nya mene wəndə ŋelɛ ne, kezha mɛa ŋkɛ. Ama kegha mawe ta ŋkɛ kakiɗi we.

⁸Wa wəsə nya ndakɛ gezhi nde ntsehwele ntsehwele le tse wa? Wa wəsə nya ketekɛ nde titikwə dzeghwa tiɗiɗi mbe nza ta ŋkɛ tse wa?

⁹Ganyɛ ma newe ŋkwa le ntsə ke wəsə nya tsəkwə wəndə mawe yite. Gəmə ba'a kese sefə ŋkɛ perə.

¹⁰Ma yayata wəsə nya kenza shɛ ne, nahe ŋkɛ keɗepete geva se vəashi, nahe gheɓəmə keɗepe wa ŋkɛ wa ŋkɛ wəndə ŋelɛ. Ama kaghəpəte ghəpə ŋkɛ le wəndə nya berete ma ke gheŋkɛ we.

¹¹Ma vəa ŋkwa nya nza ghena kwele kwele ne, kwele kwele geze geva wəshi nyi gəmə gəmə: wa wəsə nya ŋ'we wəndə mbe tse wa?

¹²Kwa nza ŋkɛ ne, wa nde ɗepe wəsə nya za ma kaŋa wəndə mbe nza ta ŋkɛ teghweme, mbe hɛ nyi kwele kwele ta nza gəməa ŋkɛ nya kekiɗi kala shenaŋkwe wa? Wa nde tencɛ nda wəsə nya ketemene geva kwetere wəmbəa ŋkɛ kwake te hɛɗi lema ke wəndə ŋelɛ wa?