Read KapsikiDC Nde zlape ghena 8 Bible Online

Nde zlape ghena 8 - KapsikiDC bible

Nde zlape ghena 8

¹Wəndə nya kenza kentsehwele ntsehwele fate fate shɛ we. Wəndə shɛ keɗepe zeweve ta wəshi nyi ketemene geva we. Ndagwara kawaŋe nda kema ta wəndə ntsehwelea ŋkɛ ba'a kaza gerese nyi kwa kema ta ŋkɛ ŋkɛ.

²Ma vəa ŋkwa nya geze ghena meghe ne, nda na kahawe ve, kala nya zemete nda fela na ke Shala.

³Sləma na kahe kahe yite ma, ntsəma geva na mbe ghena nya keɗema zeɗehwe nda ma. Kwa nza ŋkɛ ne, kala nya ɗe meghe mene ŋkɛ.

⁴Berete ya va ghena ta ŋkɛ, wəndə shɛ kategeze: «Wa wəsə nya mene nya na wa» ke shɛ we.

⁵Ma wəndə nya kehawe va ghena nya kegezete geva ne, katekwaɗe ŋkɛ ghena nya ndiremi we. Ama nahe nde ntsehwele ntsehwele keɗepe katemeha geva ghwə te yayata wəsə te və nya kesləyi geva.

⁶Kwa nza ŋkɛ ne, katemeha ghwə Shala te yayata slene te kwete hɛ, va nya nza mehele ta wəndə ŋelɛ ndiremike.

⁷Keɗepe wəsə nya ketemene geva ŋkɛ we. Wa nde tencɛ nda vəa nya temene geva ŋkɛ kwa wa?

⁸Wəndə shɛ kaveyi ghəa ŋkɛ teghweme we. Wəndə shɛ kahendeghe vecia mte ta ŋkɛ we. Ma vəa ŋkwa nya senyɛ mpa ne, wəndə shɛ kahwɛnyɛ we. Kambelete wəndə nya kemene wəsə kwa ndiremi 'yaghwa mehele we.

⁹Nahe 'ya keneweve pɛtɛa wəshi nyi vəa ŋkwa nya se 'ya kazəzə te pɛtɛa wəshi nyi kemene geva te hɛɗi lema, vəa ŋkwa nya nza berete va kwete wəndə kezha mene nda wəsə kwa ndiremi ke kwete.

¹⁰Nahe 'ya kenakɛ ka 'yaghwa mehele nyi lamte mbeli. Nahe mbelia shɛhɛ kese kadzedzembe ghɛa Shala. Ma mbe Zhɛrəzalɛm ne, nahe mbeli kezaghəyite tsema tsema se hɛ kamene. Gəmə ŋkɛ perə.

¹¹Kave geva ɗa te wəndə nya kemene wəsə kwa ndiremi te ŋkwa shɛnyɛ we. Vatse nza wənəa mbeli viɗi va wəshi nyi ndiremi ndiremi.

¹²Wərə nde jaɗafa kamenete fete gwəmsə zhigə ba'a katemə kwele kwele teghweme. Nahe 'ya keɗepe, ma ke mbeli sha geze: «Katenza mbeli nyi kehawe va Shala mbe zeɗe nza, va nya se hɛ kahawe ve.

¹³Ama katenza nde 'yaghwa mehele mbe zeɗe nza we. Kahe kahe kala shenaŋkwe tekiɗi vəa ŋkɛ ba'a kawəzegenyɛ temte ŋkɛ, va nya ɗema ŋkɛ kese kahawe va Shala.»

¹⁴Gəmə wəshi nyi kemene geva te hɛɗi lema: wəshi ganji yamene kweci mbeli, ama kala mbeli nyi kemene wəshi nyi ndiremi ndiremi mene nda mbeli ke hɛ. Wəshi nyi ndiremi ndiremi yamene kweci, ama kala mbeli nyi kemene wəshi ganji mene nda mbeli ke hɛ. Nahe 'ya kegha kagezete nahe ŋkɛ kenza gəmə perə.

¹⁵Ma 'ya le ŋa ɗa ne, kave zləvə 'ya te zlama. Kwa nza ŋkɛ ma zeɗe nza nya va wəndə ŋelɛ kwake te hɛɗi ne, deke zeme wəsə kezeme, sa wəsə kesa ba'a nza fare fare. Nya ya kawəsə nya kedzeghwa le slene ta ŋkɛ mbe hɛ nyi ndeke nda Shala kwake te hɛɗi.

¹⁶Nahe 'ya kendeke nda ghə ke ɗepe ntsehwele ba'a ke newe slene nyi mene mbeli kwake te hɛɗi. Ya wəndə ɗema kahɛ viɗi le veci ne,

¹⁷kaɗepete wəsə nya mene Shala ŋkɛ mbe pɛtɛa wəshi nyi kemene geva kwake te hɛɗi we. Ma wəsə nya leɓe ghə wəndə ŋelɛ kasepa ne, katesləyi ŋkɛ we. Ya nde ntsehwele ntsehwele geze «Nahe 'ya keɗepe» ke ne, kantsate ŋkɛ we.