Read KapsikiDC Nde zlape ghena 9 Bible Online

Nde zlape ghena 9 - KapsikiDC bible

Nde zlape ghena 9

¹Kaganda ne, nahe 'ya kese kazəzə te wəshi nyi pɛtɛ, wa nya wəsə sləyi 'ya nya: ma mbeli nyi tiɗiɗi, mbeli nyi kentsehwele ntsehwele ba'a wəshi nyi mene hɛ ne, mbe dzeve ta Shala hɛ. Kaɗepe wəndə ŋelɛ kenza ŋkɛ ɗe keɗema ɗema ŋkwa yatedzembe ŋkɛ we. Wəsə shɛ keɗepe ŋkɛ we.

²Kanya kwetɛŋe ŋkɛ kaŋa mbeli pɛtɛ: wəsə nya kwetɛŋe nde mene nda geva ke wəndə nya tiɗiɗi le nde 'yaghwa mehele, ke wəndə nya ganyɛa mehele le nya ndiremia mehele, ke wəndə nya wɛŋe le nya wale wale, ke wəndə nya kedzeghe melɛ le nya keɗema kadzeghe melɛ. Tsagha shɛ kaŋa wəndə ganyɛ le nde jaɗafa, kaŋa wəndə nya kezeme fela le wəndə nya keghazlənə va zeme fela.

³Wa nya wəsə kwa ndiremi nya hwa pɛtɛa wəshi nyi kemene geva kwake te hɛɗi: wəsə nya kwetɛŋe nde mene nda geva ke mbeli pɛtɛ. Vatse nza wənəa mbeli viɗi va wəsə kwa ndiremi, kaka gezhia kɛfi hɛ mbe nza ta nci. Ma kwa sebe ta ŋkɛ, mte yatene hɛ kaneghe.

⁴Kwa nza ŋkɛ ne, deke wəndə nya hwa mbeli nyi teghweme nde nza kaveyi ghə te wəsə: megela ma kelɛ nya teghweme ke nivɛrə nya kemte mte.

⁵Kwa nza ŋkɛ ne, nahe mbeli nyi teghweme keɗepe katempə hɛ, ama wəsə shɛ keɗepe mbeli nyi kempə mpə we. Wəsə shɛ kaneghe hɛ we, kwa nza ŋkɛ ne, nahe mbeli kezamte ghə yitea hɛ.

⁶Nahe ɗe ta nci, ɗema ntsə ta nci ba'a zlɛa nci kezanji. Katezhɛne hɛ kadzehwa pɛtɛa wəshi nyi kemene geva kwake te hɛɗi tɛape we.

⁷Ma tsetse ŋkɛ ne, zeme ɗafa ta ŋa le zlama ba'a sa tɛa ŋa le farefa ta wənə, kwa nza ŋkɛ ne, nahe Shala keyɛhwe wəshi nyi mene na.

⁸Mbe yayata və ne, seɗe lekwesa ganji ba'a zaghəyitema mene 'wərdə na ghəa ŋa ma.

⁹Zlama yitea nza le male nya ɗe na mbe pɛtɛa hɛa nza gəmə nya ndeke ŋa Shala kwake te hɛɗi lema. Kwa nza ŋkɛ ne, gheŋkɛ ya kaŋa ŋa bela mbe nza ba'a mbe slene nya mene na kwake te hɛɗi lema.

¹⁰Ma pɛtɛa wəshi nyi nza berete ta ŋa kamenete ne, mene hɛ. Kwa nza ŋkɛ ma kwa ghɛa mbelia kwahɛɗi nya tedzawa na ne, mene slene, zəzə ghena, ɗepe wəsə keɗema ntsehwele shɛ we.

¹¹Nahe 'ya keneweve kweci wəshi kwake te hɛɗi lema zhɛkwa. Kakele kema mbeli nyi wɛrewɛ ma keveci keveci mbe hwɛ we. Kahərə ŋkwa mbeli nyi berete berete ma keveci keveci mbe mpa we. Kakemave wəshi ka ntsehwele ntsehwele keveci keveci dekwede we. Kanza ka ɗepe wəshi kaka mcɛlə keveci keveci we. Kanza zləvə te ka ɗepemte wəshi keveci keveci we. Kwa nza ŋkɛ ne, ke mbeli pɛtɛ mene nda geva zeɗe nza ba'a ndiremi.

¹²Kwa nza ŋkɛ ne, wəndə shɛ keɗepe wəsə nya ketemene nda geva we. Kala kelepe nyi kesehwe bəzhia ndiremi keɗema 'yɛ nyi kesehwe dagalawe newe ndiremi nya keteme kənə vəkə wəndə ŋelɛ ŋkɛ.

¹³Nahe 'ya keneweve kwete wəsə nya kendeke ɗa zəzə te ghəa ntsehwele kwake te hɛɗi lema.

¹⁴Nahe kwete meleme nya ɓɛhwɛ nya nza mbeli ɓɛhwɛ mbe kese. Pa kwete meghe nya wəba se kahave nda mpa. Pa ŋkɛ dzaslete ŋkɛ ba'a peyite pelɛ dzeyi yite.

¹⁵Kwete nde titikwə nya kentsehwele ntsehwele ya shɛ mbe meleme. Wərə ŋkɛ kambelete melemea shɛ laka ntsehwelea ŋkɛ, ama wəndə shɛ kezəzəte nde titikwəa shɛ we.

¹⁶Ma tagha gɛ, ma 'ya sha ŋa ɗa: megela ma ntsehwele ke berete. Ama kenza nde ntsehwele ntsehwele kande titikwə ne, kaɓela ntsehwelea ŋkɛ mbeli we, kafa ghena ta ŋkɛ mbeli we.

¹⁷Ndagwara megela ma fa ghena ta nde ntsehwele ntsehwele nya kegeze ghena le mehele ke meghe nya kezlape nda ghena ta ŋkɛ ke ka gezhia kɛfi.

¹⁸Berete ma ntsehwele ke wəshi kempa, ama kaza sebe nde jaɗafa kwetɛŋe te wəshi ganji kwele kwele.