Read KapsikiDC Cimə nya zeɗe ma 2 Bible Online

Cimə nya zeɗe ma 2 - KapsikiDC bible

Cimə nya zeɗe ma 2

¹Ma 'ya ne, nahe 'ya kenza kaghwə ta wəfe nya te ŋwela ta Saron, kagatewəfa nya kwelɛ yɛ zlərə.

²Kala gatawəfa hwa tigə ne, tsagha nza ta meghwate ɗa hwa deghelɛshi.

³Kala maŋgwerə nya te tepe ta gamba ne, tsagha nza ta wəndə nya ɗe 'ya hwa ŋwale tezhili. Kaɗe 'ya kantishɛ yitea shenaŋkwe ta ŋkɛ, kezeɗe zeɗenji yɛ ya ta ŋkɛ kwa mɛa ɗa.

⁴Kakele ɗa ŋkɛ kadzeki ghɛa tɛ, ɗe ya kadrape nya mɓate ŋkɛ te 'ya.

⁵Dɛŋete ɗa mə wənəa ɗa kahe kahe le ghwempe ta rɛzɛŋe, mbete ɗa mə le yɛ maŋgwerə, kwa nza ŋkɛ nahe 'ya kenza shewə va ɗe.

⁶Dzeve kwa gwela ta ŋkɛ ya yitea ghəa ɗa, dzeve kwa zeme ta ŋkɛ yahəməwə ɗa ŋkɛ le.

⁷Yawa, ŋwalea kwɛ nyi mbe Zhɛrəzalɛm, kazeme ŋayɛ fela 'ya le sləa yɛ kɛme keɗema le nyi hwa gamba: feɗeghema ɗe yɛ ma, ghakɛma ŋkɛ yɛ kaɗema nde kenaka kaɗe ma.

⁸Fa mə gaka ta wəndə nya ɗe 'ya, wa nya ŋkɛ kase. Bale yaŋsle ŋkɛ dzeyi kwa ghəa yɛ ghweme, mpereke yampereke ŋkɛ dzeyi te yɛ wəmbə.

⁹Nahe wəndə nya ɗe 'ya kenza kala kɛme keɗema kala wəzege ta le. Wa nya ŋkɛ meghereŋe wəmbəa zlia n'yɛ. Ŋkwa yanewe ŋkɛ dzawa te wəfela, ŋkwa yawəmbɛne ŋkɛ jive hwa wəsə nya kala kacare.

¹⁰Ma ke sha 'ya: «Meghwate ɗa ganyɛ, sate ba'a nde.

¹¹Nahe vəa ntasle kekiɗi, nahe va keghereŋe, nahe nde kejɛghɛ.

¹²Kanewe ghwə ta wəfe mbeli te hɛɗi. Nahe vəa gha cimə kese. Kafefa ŋwələa ghwəɗəŋkwə mbeli kwamte hwa gamba.

¹³Ya yaya yɛ dasekwa, zəŋwə yazəŋwə ghwə ta rɛzɛŋe. Sate ŋa meghwate ɗa ganyɛ, nde gi!

¹⁴Ghwəɗəŋkwə ta ɗa nya kwelɛ perawe ta gela, nya kewəfərə wəfərə hwa gela, ncɛte ɗa kema ta ŋa, fate ɗa ŋwələa ŋa. Nahe ŋwələa ŋa kenza zeɗekə, nahe kema ta ŋa kenza ganyɛke.»

¹⁵Kesave n'yɛ mə mbeyiga shɛhɛ, ŋwalea mbeyiga nyi kebeze yɛ rɛzɛŋea n'yɛ nyi, kwa nza ŋkɛ ghwə yabete yɛ rɛzɛŋe.

¹⁶Nahe wəndə nya ɗe 'ya kenza kaŋa ɗa ba'a nahe 'ya kenza kaŋa. Kaya wəshi keseɗa ta ŋkɛ ŋkɛ dzeyi hwa yɛ gatawəfa.

¹⁷Ma nda tese lɛnɛa tɛhwɛɗi, vəa ŋkwa nya nza yɛ shenaŋkwe bebiyake ne, katezhɛne geva na kase, gha nya ɗe 'ya. Hwɛ kala kɛme keɗema kala wəzege ta le dzeyi kwa ghəa ghweme nyi kenehe nehe.