Read KapsikiDC Cimə nya zeɗe ma 6 Bible Online

Cimə nya zeɗe ma 6 - KapsikiDC bible

Cimə nya zeɗe ma 6

¹Gha nya ganyɛ ma hwa mi, tema lənyɛ wəndə nya ɗe na wa? Nyama hweŋkwa nya kelete ŋkɛ yitea lə n'yɛ kasepa ŋkɛ le gha wa?

²Nahe wəndə nya ɗe 'ya kedzawa ntsa ta ŋkɛ, kedzawa ntsa nya kezəŋwə kizə kizə kezha ŋ'we wəsə kezeme ta ŋkɛ ba'a kezha nda ghwə ta yɛ gatawəfa.

³Nahe 'ya kenza kaŋa wəndə nya ɗe 'ya, nahe wəndə nya ɗe 'ya kenza kaŋa ɗa. Kaŋ'we wəsə kezeme ta ŋkɛ ŋkɛ dzeyi hwa gatawəfa nyi nza ghwə te hɛ.

⁴Mcɛ ɗa, kendeɗe ŋa na kala meleme ta Tirsa. Keganyɛ ŋa na kala Zhɛrəzalɛm, dzawe kala wəvəsəa ka sewajɛ.

⁵Kelemte yɛ ntsə ta ŋa te 'ya, kwa nza ŋkɛ mehele yataze ɗa hɛ. Kala wəvəsəa kwi nyi kehwɛ dzawa vare ghweme ta Gala'ad, yɛ shintia ghəa ŋa.

⁶Kala wəvəsəa timɛti nyi kesame kwa ŋkwa kepɛ yɛ slene ta ŋa. Kanehweli kanehweli hɛ pɛtɛ, kwete shɛ kwetɛŋenyɛ we.

⁷Shave mbe wəsə nya kənəa ghəa ŋa ne, kala kema ta ya ta kwakweme nya gheme yɛ ghweleme ta ŋa.

⁸Wərə meghe kanza le mi ŋkwaŋemsə, ka meghwateshi 80 ba'a deghelɛshi kwele kwele.

⁹Ma kaŋa ɗa ne, male kwetɛŋe ya te hɛɗi, ghenta ya kaghwəɗəŋkwə ta ɗa nya ɗema beze te. Deke ghenta ya kawəzha makwa va meghekɛ ba'a kawəzege ta nta nya ɗehwe nde. Ma kenakɛ ŋkɛ kweci ŋwalea kwɛ ne, kageze nza ta nta mbe zeɗe nza hɛ. Ma ke mi ba'a ka meghwateshia meghe sha tsahe ŋkɛ:

¹⁰«Wa nya male nya kenca nya kala kiɗi ta ŋkwa, nya ndeɗe nya kala tere, nya keɓele nya kala veci, ba'a nya dzawe nya kala wəvəsəa ka sewajɛ wa?»

¹¹'Ya kadzawa ntsa ta wəfe nyi keya kezha newe yɛ kwatepese ta wəfe kwa zlərə, kezha newe kenza nde ɗa yaɗa rɛzɛŋe ba'a kenza nde ghwə yabete yɛ kwakweme.

¹²Ama kefa ghəa ɗa 'ya we. Nahe na kezhɛrete ɗa kweɗe kweɗe wəzha ta mbeli ganji.