Read KapsikiDC Cimə nya zeɗe ma 8 Bible Online

Cimə nya zeɗe ma 8 - KapsikiDC bible

Cimə nya zeɗe ma 8

¹Kaganda ɗe 'ya kanza na kawəza meyɛ ɗa nya se meyɛ ɗa kasa nda ŋ'wa. Ma te və nya tekeme 'ya le gha pelɛ ne, katehəməwə ŋa 'ya. Tagha gɛ, kateɓelama ɗa mbeli we.

²Katebeghe ŋa 'ya, katekele ŋa 'ya kadzembe cɛa meyɛ ɗa. Tagha gɛ, kateteke ɗa ɗe na. Katesa ŋa tɛ ganyɛ ba'a yɛməa ya ta kwakweme ta ɗa 'ya.

³Dzeve kwa gwela ta ŋkɛ ya yitea ghəa ɗa, dzeve kwa zeme ta ŋkɛ yahəməwə ɗa ŋkɛ le.

⁴Ŋwalea kwɛ nyi mbe Zhɛrəzalɛm, kampi ŋayɛ dzeve 'ya, feɗeghema ɗe yɛ ma, ghakɛma ŋkɛ yɛ kaɗema ŋkɛ kenaka kaɗe ma.

⁵Wa male nya kese nya te ɓerama, nya kedɛŋate geva nya te meghwate nda wa? Nahe 'ya kefeɗeghete ŋa yitea hwəa wəfe ta ɗe, te ŋkwa nya dzawa hwə meyɛ ŋa yitea gha, te ŋkwa nya yake ŋa nde.

⁶Veyi ɗa kala lamba mɛa wənəa ŋa, kala takase kwa dzeve ta ŋa. Kwa nza ŋkɛ nahe ɗe kenza bereteke kala mte. Nahe zlɛ kenza dzawe kala ghɛa mbelia kwahɛɗi perə. Nahe tse ta ŋkɛ kenza kala tse ta ghwə nya ghyana, kala tse ta ghwə ta Mahwətə.

⁷Kapeslekɛ ɗe pɛtɛa yɛmə nya kwa yɛ ndərə we, Kakelehwe ŋkɛ pɛtɛa yɛmə nya kwa yɛ hələ we. Ma kefəate pɛtɛa wəshi nyi ki ghɛa ŋkɛ wəndə te ɗe ne, kateɗema mbeli kaɓelama ŋkɛ we.

⁸Wəzha ta ma nya ɓɛhwɛ ya va gheɓəmə, kenaka ŋ'wa kasla ghɛ te ghenta we. Wa yatemene gheɓəmə le ghenta vəa ŋkwa nya tewəme za nde tse wa?

⁹Ma ya nahe nde kenza kala zli ne, kateŋa ŋkwa keya ŋkwa nya le mze kwa tɛawetɛa gheɓəmə te. Ma ya nahe ŋkɛ kenza kala mɛ degha ne, katezlaŋele sheghwəa lekeleke gheɓəmə mɛ.

¹⁰Ma 'ya ne, nahe 'ya kenza kazli ba'a yɛ ŋ'wa ta ɗa kaŋkwa ka ya ŋkwa. Tagha gɛ, nahe 'ya kenza sha gheŋkɛ kakwa kele nda zeɗe nza kase.

¹¹Wəvea rɛzɛŋe ya va Salomon mbe Ba'al-Hamon, nahe ŋkɛ kedapate nda ŋkɛ te dzeve ke ka wəza. Dəɓərəa mze kwa tɛawetɛa slibə yave nda yayata wəndə kezha nda yɛ ya ta rɛzɛŋe.

¹²Nahe wəvea rɛzɛŋea ɗa kenza kaŋa ɗa, nahe ŋkɛ kenza kwa kema ta ɗa. Salomon, kaŋa ŋa nza dəɓərəa mze kwa tɛawetɛa nyi slibə nyi, kaŋa ka wəza nza dəɓərə nyi gwəmsə bake.

¹³Ma gha nya mentishɛ kwa ntsa ne, ghena ta ŋa yave sleme ka mcɛhɛ yite. Ama ma pa na sha hi kageze ɗa:

¹⁴«Slə ŋa kahe kahe, gha nya ɗe 'ya! Hwɛ ŋa kala kɛme keɗema kala wəzege ta le, kwiɗi kalə kadzehwa ghweme nyi kezəŋwə ka'wərdə!»