Read KapsikiDC Ɛzayi 1 Bible Online

Ɛzayi 1 - KapsikiDC bible

Ɛzayi 1

¹Wa nyi wəshi nyi nakɛ Ɛzayi, wəzege ta Amots, te ghəa yɛ hɛɗia Zhəwda le meleme Zhɛrəzalɛm laka kelɛŋə nyi. Vəa ŋkwa nya se Oziyas, Yotam, Ahaz ba'a Ɛzɛkiyas kaka meghea kɛfi mbe Zhəwda nakɛ wəshia shɛhɛ ŋkɛ.

²Ghweme, fate! Hɛɗi, ghwene sleme! Ma ke Mahwətə gezete ghena: «Nahe 'ya kedəkwəte ŋwale kezha nza hɛ kambelia jama, ama nahe hɛ kefatema ɗa ghena.

³Nahe mca keɗepe wəndə ke gheŋkɛ, nahe kwara keɗepe dzebene nya ve nda wəsə kezeme nde sleke ŋkɛ kwa. Ama wəsə shɛ keɗepe ka Israyɛl we, wəsə shɛ kafave mbelia ɗa we.»

⁴Wa nya ndiremi te hwelefe ta ka jaɗafa, mbeli nyi bətə nyi mbe fete, hwelefe ta ka ndiremi ndiremia mehele, ŋwale nyi kebeze beze nyi gɛ! Nahe yɛ kewəfəyite Mahwətə, nahe yɛ keɓelama Shala ta Israyɛl nya keveyi geva tekeleke, nahe yɛ kezhɛrave nda wəmbə.

⁵Te nyama ŋkwa hi mbeli kaɗa ŋayɛ zhɛkwa, gheyɛ nyi kentsə geva mbe fama ghena tse wa? Bətə ghə mbe zhi, pɛtɛa wənə shewə.

⁶Slə mbe hwəa seɗa hwa'a kwa ghə ne, bela nya lɛŋe lɛŋe shɛ we. Ma dzeyi te yayata ŋkwa ne, zhi, ɓərə ɓərə ta ghweɗa, zhi nyi hanzayɛ nzanyɛ ya shɛ. Wəndə shɛ keyaɓemte hɛ we, wəndə shɛ kepeɗete hɛ we, wəndə shɛ kemenate n'yi te hɛ we.

⁷Kala ɓerama nya dɛrɛŋe rɛŋe hɛɗia ŋayɛ, hɛmɗɛke yɛ meleme ta ŋayɛ ketere tere. Kwa ntsə ta ŋayɛ ne, kafə wəshi nyi wəzate yɛ kweci hwelefefi. Nahe yɛ wəvea ŋayɛ kebezemte geva kala wəsə nya bezemte ka ghema.

⁸Deke meleme ta Siyon ya mba kala ghwəli nya mbe wəvea rɛzɛŋe, kala ŋkwa kewəfərə nya mbe wəvea hɛremɛɗɛ, kala meleme nya dzaslete ka sewajɛa ka ghema.

⁹Ma ya kaɗema Mahwətə nde berete kesərəakɛ kweci mbeli teghweme hwa gheɓəmə ne, nza kala meleme ta Sodome tenza gheɓəmə, yipə yipə le Gomore tenza gheɓəmə.

¹⁰Fa mə ghena ta Mahwətə, gheyɛ mbeli nyi te ghə nyi kala ka Sodome! Ve mə sleme yitea ghena nya geze Shala ta ɓəmə, gheyɛ mbeli nyi kala ka Gomore!

¹¹Ma ke Mahwətə gezete: «Wa wəsə nya ketekɛ ɗa melɛa ŋayɛ nyi kwele kwele le wa? Wənəakwe 'ya va melɛ kwa tere tere nyi dzeghe ɗa yɛ le timɛti ba'a merege ta levea lɛməa sla. Zeɗehwe ɗa mimia mcɛmcɛli, ŋa zhɛgwəa lɛməa timɛti ba'a ŋa zhɛfa lɛmə we.

¹²Ma vəa ŋkwa nya se nya yɛ kadzawa kema ta ɗa ne, wa nde 'yɛwete va gheyɛ kaŋkeɗe seɗa te ŋwela nyi yitea ghɛa ɗa wa?

¹³Sərəakɛ mə fə wəshi gəməa ŋayɛ nyi ɗema nyi ghə yite kase, zeɗehwe ɗa n'yia melɛ nyi dzeghe yɛ we. Sərəakɛ mə mene gəsəkəa dzemɛa ghweme ta tere, veci kezhɛne mpi ba'a tsene nyi jama jama nyi mene nyi yɛ jikə le wəsə kwa ndiremi. Katezhɛne 'ya kazereghete hɛ we.

¹⁴Kaɗe gəsəkəa dzemɛa ghweme ta tere ta ŋayɛ ba'a gəsəkəa ŋayɛ nyi jama jama 'ya we. Kawəsə nya ɗaŋeɗa hɛ kaŋa ɗa, leɓakwe 'ya va səwə hɛ.

¹⁵Ma vəa ŋkwa nya kafe dzeve yɛ yitea ghweme ne, kadərəzlə ntsə ta ɗa 'ya kezha ɗema nakɛ ŋkwa. Ya gheyɛ nza kasəkwə ghə kwele kwele zhigə ne, kave sleme 'ya yite we: bətə dzeve ta ŋayɛ mbe mimi.

¹⁶Pɛmte mə ghəa ŋayɛ, yaɓemte mə ghəa ŋayɛ wɛŋe, hendemte mə wəshi nyi ndiremi ndiremia ŋayɛ kwa ntsə ta ɗa, sərəakɛ mə mene wəsə kwa ndiremi.

¹⁷Teke mə mene wəsə ganyɛ, zele mə nza tiɗiɗi, veyi mə nde sa nda yaka ke mbeli kwa hweŋkwa. Meha nda mə ghwə nya tiɗiɗi ke ka mezhɛtiti, kelehwe mə ghena nyi te ka wedidi.»

¹⁸Ma ke Mahwətə «Nde mə, gheɓəmə kaghəpə. Ma kenza yɛ jaɗafa ta ŋayɛ ghɛmɛ kala mimi ne, katezhɛre hɛ tɛawe tɛawe kala kwacakelɛ. Ma kenza hɛ gheme hɛ kala hanci ne, katezhɛre hɛ tɛzlɛzlɛ kala shintia təmə.

¹⁹Ma keɗe yɛ kafa ghena ne, katezeme wəshi nyi ganji ganji nyi te hɛɗi yɛ.

²⁰Ama keɗema yɛ, kentsəte ghə yɛ ntɛaŋe ntɛaŋe ne, katempə yɛ va kafayɛ.» Nya ya kaghena nya gezete Mahwətə.

²¹Tsema zhɛrenyɛ meleme ganyɛ nya kala male mefətekwə wa? Ma vəashi ne, wəsə nya kehi yamene mbeli mbe, tiɗiɗi se mbeli nyi mbe kanza, ama tsetsenya ne, ka mpə ŋkwa yaviɗi mbe.

²²Zhɛrəzalɛm, nahe mze kwa tɛawetɛa ta ŋa kezhɛrenyɛ kawəvɛa gezla, nahe tɛ ganyɛa ŋa kedzetenyɛ te yɛmə.

²³Kaka fama ghena nzanji mbelia ŋa nyi te ghə, kaka mcɛhɛnyɛa ka ghərəa kɛfi. Pɛtɛ hɛ kaka ɗe wəshi gəmə, wəshi mbəɗəkwə yahwɛ hɛ yite. Kameha nda ghwə hɛ tiɗiɗi ke ka mezhɛtiti we, katsakɛ hɛ ghena nyi te ka wedidi we.

²⁴Vatse gɛ, wa nya ghena nya geze Shala Mahwətə nde berete, Shala nya berete ta ka Israyɛl nya: «Yawa, 'ya katewa dewa te ka ghema ta ɗa, 'ya katemeha ghwə te ka jaga ta ɗa!

²⁵Zhɛrəzalɛm, 'ya katekafe dzeve yitea gha: 'ya kateyaɓe ŋa wɛŋe mbe ghwə kala wəsə nya yaɓemte mbeli le zlɛampəli, 'ya katetselaŋe pɛtɛa reɗa nyi te gha.

²⁶'Ya katezhɛne kave ŋa ka meha ghwə kala nyi vəashi, ka ncɛ ntsehwele kala nya heca. Kwa sebe ta ŋkɛ ne, kateheka ŋa mbeli ‹kaMeleme ta nza tiɗiɗi› ba'a ‹kaMeleme nya ganyɛ.›»

²⁷Pələsə tembele Siyon laka nza tiɗiɗi ba'a mbeli nyi mbe nyi ketezhɛre wənəa nci laka mene wəsə nya le hweŋkwa ta ŋkɛ.

²⁸Ama kateme ɗa te ka fama ghena ba'a ka mene jaɗafa, kateza sebe te mbeli nyi kewəfəyite Mahwətə.

²⁹Tagha gɛ, katezhɛ ŋayɛ hawe va hwemeke nyi keveyi geva tekeleke nyi ɗehwe nyi yɛ kwele kwele. Katepəli ŋayɛ hawe ntsa nyi ntave nyi yɛ kezha hawe va yɛ shala tseŋwə dzeyi kwa hɛ.

³⁰Katenza yɛ kala hwemeke nya kebetemte sleke keɗema kala ntsa nyi ɗema yɛmə dzeyi mbe hɛ.

³¹Kala mezaɗe tenza wəndə nya berete, kala zliɗi ta ghwə tenza wəshi nyi mene ŋkɛ. Katere hɛ bake nci kanya kwetɛŋe, wəndə shɛ katepesle ghwəa shɛ we.