Read KapsikiDC Ɛzayi 10 Bible Online

Ɛzayi 10 - KapsikiDC bible

Ɛzayi 10

¹Wa nya ndiremi te mbeli nyi kegeze ghena nyi kehitema geva, nyi kerafe hɛ kawəshi mahalegə nyi keve yaka te mbeli gɛ!

²Ma kala nya nde ne, meha ghwə nya tiɗiɗi yafɛa nda hɛ ke ka titikwəa kɛfi, kafɛa hɛ hɛ yitea wəsə nya kehi kaŋa nci, kazhɛre ka wedidi hɛ kawəshi nyi keseve hɛ, kafə wəshi hɛ yitea ka mezhɛtiti.

³Tsema temene yɛ te veci kemeha ghwə, vəa ŋkwa nya tese sefə nya wəba cakeɗake wa? Sha wa tehwɛ nda hwɛ yɛ kezha kemave kemane wa? Tema tebete mcɛləa ŋayɛ yɛ wa?

⁴Ndeke vəkwə hwa ka daŋgayɛ ba'a bete hwa mbeli nyi kempə mpə wəsə nya ketetene va gheyɛ. Ya tsagha shɛ ŋkɛ ne, kegweɗakwete geva hwepe wənəa ŋkɛ we, mba nza dzeve ta ŋkɛ tekafe yitea ghweme.

⁵Wa nya ndiremi te Asiri nya kaghəa deme ta hwepe wənəa ɗa gɛ! Katencɛ hwepe wənəa shɛ 'ya le geta nya yitea dzeve ve.

⁶Kaghwene ŋkɛ 'ya yitea hwelefe nya keɗema ghena ta ɗa, yitea mbeli nyi kehwepe ɗa wənəa ɗa, kezha zləgwə wəshi hwa mpa, kezha fə mcɛlə ba'a kezha ŋkeɗe hɛ ŋkɛ kala rekɛ nya kwa hweŋkwa.

⁷Ma keɗepete Asiri kala nya we, kezəzəte wənəa ŋkɛ tsagha we. Kwa nza ŋkɛ ne, mpə ŋkwa ba'a za sebe te mbeli kwele kwele yazəzə ŋkɛ.

⁸Ma ke gezete: «Kaɗema mbeli nyi te ghəa ka sewajɛa ɗa kenza yipə yipə le ka meghe na?

⁹Kaɗema wəsə nya kwetɛŋe yamenete nda 'ya ke yɛ meleme ta Kalnɛ le ŋa Karkɛmish na? Kaɗema 'ya kemenete nda ke meleme ta Hamat kala menete nda 'ya ke ŋa Arpad na? Na, kaɗema 'ya kemenete nda ke meleme ta Samari kala nya menete nda 'ya ke ŋa Damas na?

¹⁰Nahe dzeve ta ɗa kekekave yɛ hɛɗi meghea yɛ shala tseŋwə, te ŋkwa nya nza wəshi nyi zhɛrete hɛ kashala kwele kwele ma ke nyi mbe Zhɛrəzalɛm ba'a nyi mbe Samari.

¹¹Kaɗema 'ya katemene nda ke Zhɛrəzalɛm ba'a ke wəshia ŋkɛ nyi zhɛrete ŋkɛ kashala kala nya menete nda 'ya ke Samari ba'a ke yɛ shala tseŋwəa ŋkɛ na?»

¹²Ama vəa ŋkwa nya tekiɗimte slene ta ŋkɛ Mahwətə pelɛ ghweme ta Siyon ba'a mbe Zhɛrəzalɛm ne kateme ŋkɛ kənəa meghea ka Asiri, le kele ghəa ŋkɛ ba'a le ŋkele ntsəa ŋkɛ.

¹³Kwa nza ŋkɛ ma ke gezete: «Laka berete ta dzeve ta ɗa menete 'ya ba'a laka ntsehwelea ɗa. Kwa nza ŋkɛ kande ɗepe wəsə 'ya. Nahe 'ya kezamte sebe te ghala nyi kwelɛ hɛɗia mbeli kefəhwe mcɛləa nci. Nahe 'ya kefəakawa mbeli nyi pelɛ yɛ pasla kala katsala.

¹⁴Kala nya fə ghɛa 'yɛ mbeli fəhwe mcɛləa mbeli 'ya. Kala nya fə slesle nyi wəfəyite mbeli fəhwe wəshi 'ya pɛtɛ te hɛɗi. Wəndə shɛ kese kaslepe slepe bidzə, kaghwene mɛ ba'a katsa lewela yitea 'ya we.»

¹⁵Kamene fege tseyɛ te ŋkwa wəndə nya ketsasle wəsə le na? Kakele ghə hwa kesla sheghwə te ŋkwa wəndə nya kemene slene le na? Kala wəsə nya gaŋkəɗəte dzeve ghəa deme nya mbe dzeve nya kekafete, kala wəsə nya kafete dzeve geta nya kekese dzevea shɛ.

¹⁶Vatse tepahemte mbeli nyi deke deke Shala Mahwətə nde berete, kateme ghwə yitea mbeli nyi nza zləvə te, kala nya tse ŋkwa ghwə.

¹⁷Katezhɛre waŋe ta Israyɛl kaghwə ba'a Shala nya kaganda ta ŋkɛ kaghɛnia ghwə nya ketetse ba'a nya ketetere yɛ ndəŋwə ba'a yɛ tigəa ŋkɛ te veci kwetɛŋe.

¹⁸Kateza sebe ŋkɛ te yɛ wəfe ganji ba'a pɛtɛa wəfe nyi keya. Katenza ŋkɛ kala wəndə nya tejɛghwa.

¹⁹Ɓɛhwɛ mbarave tetene wəfe mbe ghəa wəfe, wərə wəzege kateɓelate hɛ.

²⁰Ma te vecia shɛ ne, katedɛŋe geva mbeli nyi ketetene teghweme hwa mbelia Zhakob nyi ketembelenji te wəndə nya kese kaɗa hɛ we. Katedɛŋe geva hɛ te Mahwətə, Shala ta ka Israyɛl nya kaganda.

²¹Katezhɛne geva nyi ketene kase, nyi ketene hwa mbelia Zhakob sha Shala nde berete.

²²Israyɛl, ya mbelia ŋa se kala ndaleghe kwa hələ ne, deke nyi ketene ka tezhɛne geva kase. Nahe za sebe te mbeli ketarete geva, katenza nza tiɗiɗi kala hələ nya viɗi kadzeme pa te yɛ hələbə.

²³Kaganda ne, kateyipə wəsə nya tarete Shala Mahwətə, nde berete kwa te pɛtɛa hɛɗia shɛ.

²⁴Vatse gɛ ne, wa nya ghena nya geze Shala Mahwətə, nde berete nya: «Mbelia ɗa nyi le nza mbe Siyon, ghazlənəma yɛ va ka Asiri, nyi keɗa ŋayɛ nyi le geta ba'a nyi kekafe ghəa deme yitea gheyɛ kala nya se ka Ɛzhipte kamene vəashi.

²⁵Kwa nza ŋkɛ temə ɓɛhwɛ ne, kategweɗakwe hwepe ta wənəa ɗa va gha, ama katenza hwepe wənəa ɗa kaza ta nci.»

²⁶Va nya nza ŋkɛ katekafe geta ta ŋkɛ Mahwətə, nde berete yitea ka Asiri kala nya menete nda ŋkɛ ke ka Madiyan pelɛ keleɓa ta Orɛb. Katekafe geta ta ŋkɛ ŋkɛ kənəa ndərə kala nya menete nda ŋkɛ ke Ɛzhipte.

²⁷Ma te vecia shɛ ne, katekelemte wəshi nyi ɗaŋeɗa ɗaŋeɗa kwa ghə va gheyɛ ba'a sheghwə nya te welɛa ŋayɛ kala sla kewəza ŋkɛ. Ka jaga kadzembe Samari,

²⁸nahe hɛ kentsehe mbe Ayat, nahe jive nci mbe Migron, nahe hɛ kebeteyi wəshia nci mbe Mikmas.

²⁹Ma kajive hɛ kwa hweŋkwa nya mentɛawe ne, ma ke hɛ: «Hɛ ɓəmə mbe Gɛba.» Kabare bare mbeli mbe Rama, kahwɛ mbeli mbe Gibɛya, meleme ta Sawəl.

³⁰Ka Galim, tsa mə lewela! Ka Layisha, ntsehwele mə! Ka Anatot, zhɛne mə ghena!

³¹Ghəa nci yambele ka Madmɛna, wəfərə yawəfərə mbeli nyi mbe Gɛbim.

³²Te vecia shɛnyɛ ne, ghereŋe ka jaga mbe Nob. Kacɛɗɛ ghweme ta Siyon ba'a wəmbəa Zhɛrəzalɛm hɛ le dzeve kezha ghweze mɛ.

³³Wa nya Shala Mahwətə, nde berete nya kaɓele yɛ dzeve ta wəfe le berete. Nahe wəfe nyi jama jama kempəmte geva, nahe nyi bebiya bebiya kewəvasate geva te hɛɗi.

³⁴Nahe yɛ sleke nyi mbe ghɛa wəfe kempəmte geva le tseyɛ, nahe gwevɛre ganji nyi mbe Liban kempate geva te hɛɗi.