Read KapsikiDC Ɛzayi 15 Bible Online

Ɛzayi 15 - KapsikiDC bible

Ɛzayi 15

¹Ghena te ghəa Mowab. Ma mbe viɗi nya bezemte geva ŋkɛ ne, zlɛcɛ zanyɛ sebe te meleme ta Ar-Mowab. Ma mbe viɗi nya bezemte geva ŋkɛ ne, zlɛcɛ zanyɛ sebe te meleme ta Kir-Mowab.

²Nahe ka Dibon kedzeme ŋkwa nya keveyi geva tekeleke kezha nehwene pelɛ. Ghə yaŋgaɗe ka Mowab pelɛ Nɛbo ba'a pelɛ Mɛdeba. Pɛtɛ yɛ ghə keŋsə ŋsə, pɛtɛ yɛ ghwɛmɛ keŋsə ŋsə.

³Dzeyi kwa yɛ hweŋkwa ne, wəsə yahwepahwe mbeli hwa hwə. Dzeyi te dɛɓere nyi kənəa cɛ ba'a dzeyi te yɛ ŋkwa kebeke ne, ghə yaŋgaɗe mbeli pɛtɛ, pɛtɛ mbeli kanehwene sərəɓə sərəɓə.

⁴Lewela yatsa ka Hɛshebon ba'a ka Ɛlalɛ, kafefa lewela ta nci mbeli mbe Yahas. Vatse tsa lewela ka sewajɛa ka Mowab, kwetɛ kwetɛŋe mehele ta nci ketaze taze.

⁵Lewela yatsa 'ya kezha Mowab. Nahe mbeli nyi mbe kehwɛghe hwɛ hwa'a mbe Sowar, hwa'a mbe Ɛglat-Selisiya. Le nehwene dzeme hɛ vare wəmbəa Ləwhit, lewela yatsa hɛ dzeyi kwa hweŋkwa ta Horonayim.

⁶Nahe ɗaslea Nimrim kehasenyɛ, nahe gwəzə keghwelenji, mba hɛ kapese we, mba wəshi nyi menjaɓa shɛ we.

⁷Ma kweci wəshi nyi ketene va hɛ, wəshi nyi wəmbəyi hɛ ne, fə yafə hɛ hɛ kajive kema ta hələa wəfe nyi dzeyi mɛa hələ.

⁸Hərəkə hɛɗia Mowab va lewela shɛhɛ, hwa'a mbe Ɛglayim fa ŋgaɗe ghəa shɛ mbeli, hwa'a mɛa ghwa ta Ɛlim ntsehe lewela shɛhɛ.

⁹Viɗi hələa Dimon va mimi. Kateghwene nda kweci ndiremi 'ya ke Dimon, katedzembe ka Mowab nyi ketene teghweme, mbeli nyi ketetene te hɛɗia nci nivɛrə.