Read KapsikiDC Ɛzayi 18 Bible Online

Ɛzayi 18 - KapsikiDC bible

Ɛzayi 18

¹Wa nya ndiremi te hɛɗi nya nza zlave bake te yɛ kwambeləa ŋkɛ, nya dzeyi mɛa yɛ hələa Ɛtiyopi gɛ!

²Gheŋkɛ nde ghwene ka ghwene nyi kedzeghwa dzeyi te hələa Nil kwa kwambelə nyi tsate mbeli le tere. Gheyɛ ka ghwene nyi wɛrewɛ, lə mə sha mbeli nyi bebiya bebiya ba'a nyi nza hweta ta geva ta nci kewiɗewa wiɗewanji, sha mbeli nyi ghazlənə mbeli va hɛ se teke hwa'a te mendɛkwe ta hɛɗi lema, sha hwelefe nya berete nya keŋkeɗe ka jaga ta ŋkɛ. Zhɛne mə geva kadzete hɛɗia ŋayɛ nya dzawanji yɛ hələ mbe.

³Ma gheyɛ pɛtɛa mbeli nyi te hɛɗi lema, gheyɛ mbeli nyi te hɛɗi ne, newe mə ŋkwa, vəa ŋkwa nya temɓe geva drape hwa ghweme, ghwene mə sleme, vəa ŋkwa nya tevɛ geva tereme.

⁴Kwa nza ŋkɛ ma ke Mahwətə sha 'ya: «Sawa pelɛ ŋkwa kenza ta ɗa ne, divə ɗa tenza 'ya kezha mare wəshi nyi kemene geva, kala ghyana ta ŋkwa mbe ghwə ta veci, kala tələ ta mɛnɛ mbe hwələa mene wəshi se te wəve.»

⁵Ma nda temene geva wəshi se te wəve, vəa ŋkwa nya betemte ghwə rɛzɛŋe, nya zhɛrenji ghwəa shɛhɛ kaya nyi kenehe ne, kateslera dzeve nyi kehitema geva, yɛ meɗəkwə ba'a yɛ sleke mbeli le hwətə.

⁶Katewəfəyite nda geva hɛ ke zleŋa nyi hwa ghweme ba'a ke wəshi keseɗa nyi hwa gamba. Tagha tekiɗi vɛa yɛ zleŋa, tagha tekiɗi ghele wəshi keseɗa pɛtɛ nyi hwa gamba.

⁷Ma te vəa shɛ ne, katefə nda wəshi gəmə nyi kese va mbeli nyi bebiya bebiya ba'a wiɗewa wiɗewa, mbeli nyi ghazlənə nyi mbeli va hɛ se teke hwa'a te mendɛkwe ta hɛɗi, mbeli nyi berete berete nyi keŋkeɗe ka jaga ta nci ba'a mbeli te hɛɗi nya dzawanji yɛ hələ mbe mbeli ke Mahwətə nde berete. Katefə wəshi gəməa shɛhɛ mbeli kadzeme ghweme ta Siyon nya nza Mahwətə nde berete pelɛ.